އައްޑޫސިޓީ ހިތަދޫގައި ހުންނަ އިކުއެޓޯރިއަލް ކޮންވެންޝަން ސެންޓަރު 100 އެނދުގެ ހޮސްޕިޓަލަކަށް ބަދަލުކުރެއްވުމުގެ ޢަމަލީ މަސައްކަތް މިމަހު ތެރޭގައި ފައްޓަވާނެ ކަމަށް ހައުސިންގ މިނިސްޓްރީން ވިދާޅުވެއްޖެއެވެ. ކޮންވެންޝަން ސެންޓަރު 100 އެނދުގެ ޖާގައިގެ ހޮސްޕިޓަލަކަށް ބަދަލުކުރެއްވުމުގެ މަސައްކަތް ސަރުކާރުން ޙަވާލުކުރައްވާފައިވަނީ އެލިޔާ ކޮންސްޓްރަކްޝަން ޕްރައިވެޓް ލިމިޓެޑާއެވެ. މި މަޝްރޫޢަށް ގާތްގަނޑަކަށް 161 މިލިއަން ރުފިޔާ ޚަރަދުވާނެ ކަމަށާއި، އެކަމަށް ބޭނުންވާ ފައިސާ ސަޢޫދީ ފަންޑުންނާއި، އޮޕެކް ފަންޑުން ހަމަޖެހިފައިވާ ކަމަށް ސަރުކާރުން ވިދާޅުވެއެވެ.
ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވީ، މިހާރު އެންމެ ބާރު ސްޕީޑުގައި ކުރައްވަމުންދާ މަސައްކަތަކީ އިކުއެޓޯރިއަލް ކޮންވެންޝަން ސެންޓަރުގައި ހުރި ހިފާގެންގުޅޭ ސާމާނު އެތަނުން ނެރެ، އެ ޢިމާރާތް ހުސްކުރައްވައި، ކޮންޓްރެކްޓަރާ އެތަން ޙަވާލުކުރެއްވުމުގެ މަސައްކަތް ކަމަށެވެ. މިނިސްޓަރ ވިދާޅުވިގޮތުގައި އައްޑޫސިޓީގައި އަލަށް ހައްދަވާ މި ހޮސްޕިޓަލުގެ މަސައްކަތް މިމަހު ފެއްޓެވުމަށް ވަނީ ހަމަޖެހިފައިވީނަމަވެސް އިތުރު ތަފްޞީލެއް އަދި ހާމައެއް ނުކުރައްވައެވެ.
"މިވަގުތު އެންމެ ބާރަށް ކުރަމުންމިދާ މަސައްކަތަކީ އެތަނުގައި ހުރި ހިފާގެންގުޅޭ ސާމާނު އިމާރާތުން ނެރެ، އެތަން ހުސްކުރުމަށްފަހު ކޮންޓްރެކްޓަރަށް ޙަވާލުކުރުމުގެ މަސައްކަތް. އަޅުގަނޑުމެންގެ އުއްމީދަކީ 2018 ވަނަ އަހަރުގެ މެއިމަހުގެ ނިޔަލަށް އެތަނުގެ މަސައްކަތް ނިންމާ، ހޮސްޕިޓަލުގެ ބޭނުންކުރަން ފެށުން" ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވިއެވެ.