ޅ.އަތޮޅު ނައިފަރުގައި ކުރިއަށްގެންދަވާ މަގުބައްތި ޖެހުމުގެ މަސައްކަތުގެ ބޮޑު ބައި ނިމިފައިވާ ކަމަށް ނައިފަރު ކައުންސިލުން ވިދާޅުވެއްޖެއެވެ.
މި މަޝްރޫޢަކީ ނައިފަރު މަގުތައް އަލިކޮށް، އެ މަގުތަކަކީ އެންމެނަށް ރައްކާތެރި މަގުތަކަށް ހެއްދެވުމުގެ ގޮތުން ނައިފަރު ކައުންސިލުން ހިންގަވާ މަޝްރޫޢެކެވެ. ޕީއެސްއެމް ނިއުސްއަށް ދެއްވި އިންޓަރވިއުއެއްގެ ނައިފަރު ކައުންސިލްގެ މެމްބަރު ޔަޙުޔާ މުޙައްމަދު ވިދާޅުވީ، މިމަޝްރޫޢުގެ ދަށުން ނައިފަރުގައި މަގުބައްތި ޖެހުމަށް ހަމަޖެހިފައިވަނީ އެރަށުގެ އެންމެ ބޮޑު ތިން މަގުގައި ކަމަށެވެ. އަދި މިހާރު ކުރިއަށް ދަނީ ކަރަންޓް ކޭބަލް ވަޅުލުމުގެ މަސައްކަތް ކަމަށްވެސް އޭނާ ވިދާޅުވިއެވެ.
ނައިފަރު މަގުތަކުގައި ބަގުބައްތި ޖެހުމުގެ މަޝްރޫއުގެ ދަށުން އެރަށުގެ ބޮޑު، ތިން މަގުގައި 30 ބައްތި ޖެހުމަށް ހަމަޖެހިފައިވެއެވެ. މިއީ ނައިފަރު ކައުންސިލްގެ ބަޖެޓުން ދުއިސައްތަހާހަށްވުރެ ގިނަ ރުފިޔާ ޚަރަދުކުރައްވައިގެން ކުރިޔަށް ގެންދަވާ މަޝްރޫއެކެވެ. ނައިފަރަކީ 5400 މީހުންގެ އާބާދީއެއް ދިރިއުޅޭ ރަށެކެވެ.