އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީ ކުރެއްވުމުގެ މަޝްރޫޢަށް އަބޫދާބީ ފަންޑް ފޯރ ޑިވެލޮޕްމަންޓްގެ ފަރާތުން ގާތްގަނޑަކަށް 40 މިލިއަން ޑޮލަރުގެ ލޯނު އެހީ ހަމަޖެހިފައިވާ ކަމަށް ފިނޭންސް މިނިސްޓަރ އަޙްމަދު މުނައްވަރު ވިދާޅުވެއްޖެއެވެ.
މިނިސްޓަރ ވިދާޅުވީ، އެއަރޕޯޓް ތަރައްޤީކުރެއްވުމުގެ މަޝްރޫޢަށް ބޭނުންވާ ލޯން އެހީގެ ބޮޑު ބައި މިހާރު ހަމަޖެހިފައިވާ ކަމަށާއި، އަންނަ އަހަރުގެ ކުރީކޮޅު އިތުރު ފަރާތްތަކާއެކު ލޯނު އެގްރީމެންޓްތަކުގައި ސޮއިކުރެއްވުމަށް ހަމަޖެހިފައިވާ ކަމަށެވެ.
އެއަރޕޯޓް ތަރައްޤީ ކުރެއްވުމުގެ މަޝްރޫޢުގެ ދަށުން އެއަރޕޯޓުގައި އަޅާ އައު ރަންވޭއަށް ބޭނުންވާ ބިން ހިއްކެވުމުގެ މަސައްކަތް މިހާރު ފައްޓަވާފައިވާއިރު، އެ މަސައްކަތް ކުރައްވަމުން ގެންދަވަނީ ދުބާއީގެ މަޝްހޫރު ކުންފުންޏެއް ކަމަށްވާ "ގަލްފް ކޮބްލާ" އާ ޙަވާލުކުރައްވައިގެންނެވެ. މި މަޝްރޫޢުގެ ތެރޭގައި ހިމެނޭ އައު ޓާމިނަލްގެ މަސައްކަތް ސަޢޫދީ އަރަބިއްޔާގެ އެންމެ ބޮޑު އެއް ކުންފުނި ކަމަށްވާ ބިންލާދިން ގުރޫޕާއި ވަނީ ޙަވާލުކުރައްވާފައެވެ. އަދި އައު ރަންވޭގެ މަސައްކަތާއި، ފިއުލްފާމްއާއި، ކާގޯ ކޮމްޕްލެކްސް ތަރައްޤީ ކުރުމުގެ މަސައްކަތް ޙަވާލުކުރައްވާފައި ވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއެވެ.
ފިޔަވަހިތަކަކަށް ބައްސަވާލައްވައިގެން ހިންގަވާ މި މަޝްރޫޢުގެ ޢަމަލީ މަސައްކަތް ސަރުކާރުން މިހާރު ފައްޓަވާފައިވާއިރު، މި މަޝްރޫޢަށް ހޭދަވާނެކަމަށް ބެލެވޭ 800 މިލިއަން ޑޮލަރުގެ ތެރެއިން، ބޮޑު ބައެއް މިހާރު ވަނީ ބޭރުގެ އެކި ފަރާތްތަކުގެ ލޯން އެހީއާއެކު ހަމަޖެހިފައެވެ. ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، މި މަޝްރޫޢަށް ބޭނުންވާ ލޯން އެހީ ހޯއްދެވުމަށް ސަރުކާރުން އެކި ފަރާތްތަކާއެކު މަޝްވަރާ ކުރައްވަމުން ގެންދަވާ ކަމަށެވެ. އެގޮތުން އަބޫ ދާބީ ފަންޑް ފޯރ ޑިވެލޮޕްމަންޓްގެ ފަރާތުން ގާތްގަނޑަކަށް 41 މިލިއަން ޑޮލަރުގެ ލޯން އެހީއެއް ދެއްވުމަށް މިހާރު މަޝްވަރާ ކުރައްވަމުންދާ ކަމަށް މިނިސްޓަރ ވިދާޅުވިއެވެ. އަދި އެކަމުގެ އެއްބަސްވުމުގައި އަންނަ އަހަރުގެ ކުރީކޮޅު ސޮއިކުރެއްވުމަށް ހަމަޖެހިފައިވާ ކަމަށް އެމަނިކުފާނު ވިދާޅުވިއެވެ.
ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، މި މަޝްރޫޢަށް މިހާރުވެސް ޚަރަދުކުރައްވާ، އަދި ޚަރަދަކުރައްވަން ޝަޢުގުވެރިވާ ބޭރުގެ އިންވެސްޓަރުންނާއެކު، އަންނަ އަހަރުގެ ކުރީކޮޅު އެއް މޭޒެއްގެދޮށުގައި މަޝްވަރާ ކުރެއްވުމަށް ޚާއްސަ ބައްދަލުވުންތަކެއް ބޭއްވެވުމަށް މަސައްކަތް ކުރައްވަމުން ގެންދަވާ ކަމަށެވެ. އަދި މި ބައްދަލުވުންތަކުގައި އެއަރޕޯޓް ތަރައްޤީ ކުރެއްވުމުގެ މަޝްރޫޢު މިހާރު ގޮސްފައިވާ ހިސާބާއި، ސަރުކާރުގެ ސިޔާސަތު އަދި މި މަޝްރޫޢަށް ބޭނުންވާ އިތުރު އެހީތަކާއި ގުޅޭގޮތުން އިންވެސްޓަރުންނާއެކު މަޝްވަރާ ކުރައްވާނެކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ، ސަރުކާރުގެ އަމާޒަކީ އަންނަ އަހަރުގެ މާޗް މަހުގެ ނިޔަލަށް މި މަޝްރޫޢަށް ބޭނުންވާ ހުރިހާ ލޯން އެހީއެއް ހަމަޖެހިގެންދިޔުން ކަމަށެވެ.
އެއާރޕޯޓް ތަރައްޤީ ކުރެއްވުމުގެ މަޝްރޫޢަކީ މުޅި މާލެ ހިމެނޭ ސަރޙައްދުގެ މަލަމަތި އެއްކޮށް ބަދަލުކޮށްލާނެ މަޝްރޫޢެކެވެ. އަދި މިމަޝްރޫޢާއެކު ރާއްޖޭގެ އިޤްތިޞާދީ ދުވެލި ކުރިއަރައި، ވަކިން ޚާއްސަގޮތެއްގައި ރާއްޖޭގެ ފަތުރުވެރިކަމުގެ ދާއިރާއަށް އިންޤިލާބީ ބަދަލެއް ގެނުވާނެ ކަމަށް ސަރުކާރުން ޤަބޫލު ކުރައްވައެވެ. މިމަޝްރޫޢާއެކު މިހާރު ބޭނުންކުރަމުންދާ އެއާރޕޯޓަށް 30 އިންސައްތައިގެ ޖާގަ އިތުރުވެ، އަހަރަކު ގާތްގަނޑަކަށް 7.5 މިލިޔަން މީހުންނަށް ޚިދުމަތްދެވޭނެއެވެ.