އަންނަ އަހަރު ބާއްވަވާ ލޯކަލް ކައުންސިލްތަކުގެ އިންތިޚާބުގައި ރަށްވެހިވެފައިވާ ރަށް ނޫން އެހެންތަނެއްގައި ވޯޓްދިނުމަށް ރަޖިސްޓްރީކުރުމުގެ އެންމެފަހު ތާރީޚަކީ މިމަހުގެ 14 ވަނަ ދުވަސްކަމުގައި އިލެކްޝަންސް ކޮމިޝަނުން ކަނޑައަޅުއްވައިފިއެވެ.
އެކޮމިޝަނުން މިގޮތަށް ކަނޑައެޅުއްވީ، ސިވިލް ކޯޓިގެ ވަގުތީ އަމުރާއެކު ރީ-ރަޖިސްޓްރީކުރުން ވަކި މުއްދަތެއް ނެތި ހުޅުއްވާލެއްވުމަށްފަހުގައެވެ. އިލެކްޝަންސް ކޮމިޝަނުން ވިދާޅުވީ، މިހާރު ރީ-ރަޖިސްޓްރީވުމުގެ ސުންގަޑި ހަމަވާނީ މިމަހުގެ 14 ވަނަ ދުވަހުގެ ހަވީރު 4:00 ގައި ކަމަށެވެ.
ރީ-ރަޖިސްޓްރީކުރުން އޮންނާނީ މާލޭގައިނަމަ ބާ ޖަމާލުއްދީން ޢިމާރާތުގައި ހުންނަ އިލެކްޝަންސް ކޮމިޝަންގެ އިންތިޚާބީ މަރުކަޒުގައެވެ. އަދި އަތޮޅުތަކުގައިނަމަ އެރަށެއްގެ ކައުންސިލް އިދާރާގައެވެ. އަދި ކައުންސިލް އިންތިޚާބުގައި އޮބްޒާރވަރުންނާއި މޮނިޓަރުންނަށް ވުމަށް އެދި ހުށަހެޅުމަށް ދެއްވާފައިވާ މުއްދަތުވެސް އެކޮމިޝަނުން ވަނީ ދެވަނަ ފަހަރަށް މިއަދު އިތުރުކުރައްވާފައެވެ. ލޯކަލް ކައުންސިލްތަކުގެ އިންތިޚާބުގެ ކަންތައްތައް ހިނގާނުހިނގާގޮތް ބެލުމަށް ކެންޑިޑޭޓުންގެ މަންދޫބުންނަށް ވުމަށް އެދި ހުށައެޅުމުގެ މުއްދަތު މިއަދު ހަމަވާގޮތަށް އޮތްނަމަވެސް، އިލެކްޝަންސް ކޮމިޝަނުން މިހާރު ވަނީ އެ މުއްދަތުވެސް މިމަހުގެ 14 ވަނަ ދުވަހުގެ 4:00 އާ ހަމައަށް އިތުރު ކުރައްވާފައެވެ.
އަންނަ އަހަރުގެ ޖެނުއަރީ މަހުގެ 14 ވަނަ ދުވަހު ލޯކަލް ކައުންސިލްތަކުގެ އިންތިޚާބު ބޭއްވެވުމަށް އިލެކްޝަންސް ކޮމިޝަނުން ނިންމަވާފައި ވަނިކޮށް އިންތިޚާބު ދެމަސް ދުވަހަށް ފަސްކުރެއްވުމަށް ސިވިލް ކޯޓުން ވަނީ އިލެކްޝަންސް ކޮމިޝަންގެ މައްޗަށް އަމުރެއް ނެރުއްވާފައެވެ.އިލެކްޝަންސް ކޮމިޝަނުން ވަނީ އެ ނިންމެވުން ހައި ކޯޓުގައި އިސްތިއުނާފް ކުރައްވާފައެވެ.