ރަސްފަންނުގައި ތަރައްޤީކުރާ އޯވަރހެޑް ބްރިޖް، ޖެނުއަރީ މަހު ހުޅުވޭނެކަމަށް ހައުސިން މިނިސްޓަރ ވިދާޅުވެއްޖެއެވެ.
ހައުސިންގ މިނިސްޓަރ ޑރ. މުޙައްމަދު މުޢިއްޒު މިހެން ވިދާޅުވީ، ސަރުކާރަށް 3 އަހަރު ފުރުމުގެ ގޮތުން ހައުސިންގ މިނިސްޓްރީގެ ކޭކް ފެޅުއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ސަރުކާރަށް 3 އަހަރު ފުރުން ފާހަގަކުރުމުގެ ގޮތުން ހައުސިންގ މިނިސްޓްރީގެ ފަރާތުން ރަސްފަންނުގައި ބޭއްވެވި ކޭކް ފެޅުއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވީ ރައީސުލްޖުމްހޫރިއްޔާ އަބްދުﷲ ޔާމީންގެ ސަރުކާރުގެ 3 އަހަރުގެ ކާމިޔާބީގައި ހައުސިންގ މިނިސްޓްރީ އާއި ޙަވާލުކުރެވިފައިވާ މަސައްކަތްތައް ވަރަށް ކާމިޔާބުކަމާއެކީ ކުރެވިފައިވާ ކަމަށެވެ. މިއީ ހުރިހާ މުވައްޒަފުން ގުޅިގެން ކުރެވުނު މަސައްކަތް ކަމަށާއި، ކުރިއަށްއޮތް 2 އަހަރުވެސް މިގޮތުގައި މަސައްކަތް ކުރުމަށް އަމާޒު ކަނޑައަޅުއްވާފައިވާ ކަމަށެވެ.
މިނިސްޓަރ ވިދާޅުވީ ހައުސިންގ މިނިސްޓްރީގެ މިވޭތުވެދިޔަ 3 އަހަރުގެ ކާމީޔާބީ މަސައްކަތްތަކުގެ ތެރެއިން ރަސްފަންނަކީ މީގެ އެއް މަސައްކަތް ކަމަށާއި، ރަސްފަންނު އިތުރަށް ތަރައްޤީ ކުރެއްވުމަށް އިތުރު މަސައްކަތްތަކެއް މިހާރުވެސް ކުރައްވަމުންދާ ކަމަށެވެ. އެގޮތުން ރަސްފަންނުގެ ޕެވިލިއަން ތަރައްޤީ ކުރުމުގެ މަސައްކަތް އެމްޑަބްލިޔުއެސްސީއިން ކުރަމުންދާކަން ފާހަގަކުރައްވާ، މިތަނުގައި ހަދާ އޯވަރހެޑް ބްރިޖްގެ މަސައްކަތް ނިންމާ އަންނަ އަހަރުގެ ޖެނުއަރީ މަހުގެ 1 ވަނަ ދުވަހު ހުޅުވާލެއްވޭނެ ކަމަށް މިނިސްޓަރ ވިދާޅުވިއެވެ. އޯވަރހެޑް ބްރިޖަކީ، ޕެވިލިއަންގެ ފުރަތަމަ ފަންގިފިލާއިން މަގުގެ އެއްފަޅިން އަނެއްފަޅިއަށް ދެވޭ ގޮތަށް ހަދާ ބްރިޖެކެވެ. މީގެ އިތުރަށް ރަސްފަންނުގައި ބާބަކިޔު ފިހާރައެއް ހުޅުވުމަށްޓަކައި އެމްޓީސީސީ އާއި ޙަވާލުކުރައްވައިގެން ކުރިއަށްދާ ކަމަށާއި އެތަން ޖެނުއަރީ މަހުގެ 1 ވަނަ ދުވަހު ހުޅުވޭނެކަމަށް މިނިސްޓަރ ވިދާޅުވިއެވެ.
މިނިސްޓަރ މުޢިއްޒު ވިދާޅުވީ ރަސްފަންނުގައި މޫދު ކުޅިވަރު ކުޅެވޭނެ އިންތިޒާމުވެސް ހަމަޖައްސަވަމުންދާ ކަމަށެވެ. މި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަޙީމް އަބްދު ﷲ ވިދާޅުވީ މި ސަރުކާރުގެ މިވޭތުވެދިޔަ 3 އަހަރަކީ ދިވެހި ތާރީޚު ދުށް އެންމެ ކާމިޔާބު 3 އަހަރު ކަމަށެވެ. މަޝްރޫޢުތައް ކާމިޔާބުކަމާއެކީ ކުރިއަށްގެންދިޔުމުގައި އެންމެ ބޮޑު ޙިއްސާއެއް އަދާކުރާ އެ މިނިސްޓްރީގެ މުވައްޒަފުންނާއި ވާހަކަ ދައްކާލުމުން އެފަރާތްތަކުން ބުނީ މިއީ ހުރިހާ ފަރާތްތަކެއް ގުޅިގެން ކުރެވުނު މަސައްކަތުގެ ނަތީޖާ ކަމަށެވެ.
ސަރުކާރުގެ މިވޭތުވެދިޔަ 3 އަހަރުގެތެރޭގައި ހައުސިންގ މިނިސްޓްރީން ވަނީ 36 ރަށެއްގެ ބަނދަރު ހެއްދެވުމުގެ މަސައްކަތް އެއްކޮށް ނިންމާފައިވާއިރު، 48 ބަނދަރެއްގެ މަސައްކަތް މިހާރުވެސް ދަނީ ކުރައްވަމުންނެވެ. ބިން ހިއްކުމާއި ރިވެޓްމެންޓް ޖެހުމުގެ 10 މަޝްރޫއެއް މި 3 އަހަރުގެތެރޭގައި ވަނީ ނިންމަވާފައެވެ. މީގެ އިތުރަށްވެސް ޗައިނާ މޯލްޑިވްސް ފްރެންޑްޝިޕް ބްރިޖްގެ މަސައްކަތްތަކާއި، މާލެ އާއި އަތޮޅުތެރޭގެ 12 ރަށެއްގެ މަގު ރަނގަޅު ފެންވަރަކަށް ހެދުމުގެ މަޝްރޫޢާއި، ފްލެޓްތައް ޢިމާރާތްކުރުމުގެ މަޝްރޫޢުތަކެއް ހައުސިންގ މިނިސްޓްރީގެ ބެއްލުމުގެ ދަށުން ދަނީ ކުރައްވަމުންނެވެ.