'ރެޑީ ސެޓް މަޢުރަޒު 26'އަށް ބޮޑު ތަރުހީބެއް!

ދިވެހީންގެ އުފެއްދުންތެރިކަމުގެ މަޢުރަޒު 2026އާ ގުޅުވައިގެން ބޭއްވި 'ރެޑީ ސެޓް މަޢުރަޒު 26'އަށް އާންމުންގެ ފަރާތުން ބޮޑު ތަރުހީބެއް ލިބިއްޖެއެވެ.

މިއީ، އިޤުތިޞާދިީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއާއި، ބިޒްނަސް ސެންޓަރ ކޯޕަރޭޝަން، ބީސީސީއިން ގުޅިގެން ކުރިއަށްގެންދާ ހަރަކާތެކެވެ. މި ހަރަކާތް ކުރިއަށް ގެންދިޔުމަށް ހަމަޖެހިފައިވަނީ، މިއަދު ހަވީރު 4އިން ރޭގަނޑު 11އަށް ހުޅުމާލެ ފޭސް 1ގެ ދިރާގު ފަހަތުން އޮންނަ ބީޗު ސަރަހައްދުގައެވެ.

ބީސީސީން ވިދާޅުވީ، މި ހަރަކާތަކީ ކުރިއަށް އޮތް ދިވެހީންގެ އުފެއްދުންތެރިކަމުގެ މަޢުރަޒު 2026އަށް ތައްޔާރުވުމުގެ ގޮތުންނާއި، އެ މައުރަޒުގައި ހިމެނޭ ކަންކަމުގެ މަޢުލޫމާތު އާންމުންނަށް ދިނުމުގެ މަޤުސަދުގައި ބޭއްވި ހަރަކާތެއް ކަމަށެވެ. އެގޮތުން މި ހަރަކާތުގައި އާއިލާތަކަށާއި ކުޑަކުދިންނަށް އަދި އާންމު ފަރާތްތަކަށް ޚާއްސަކޮށްގެން ގިނަ ހަރަކާތްތަކެއް ކުރިއަށް ގެންގޮސްފައިވެއެވެ.

މި ހަރަކާތުގެ ތެރެއިން މިއަދު ހަވީރު ބީޗު ސަރަހައްދުގައި ކުޑަކުދިންނަށް ޚާއްސަ ކުޅިވަރުތަކާއި، ބައުންސީ ކާސަލް ފަދަ މަޖާ ހަރަކާތްތައް ކުރިއަށް ގެންގޮސްފައިވެއެވެ. މީގެ އިތުރުން ރޭގަނޑުގެ ވަގުތުތަކުގައި ބޮޑުބެރުގެ ހުށަހެޅުންތަކާއި އެހެނިހެން މުނިފޫހިފިލުވުމުގެ ހަރަކާތްތައް ކުރިއަށް ގެންދިޔުމަށް ވަނީ ހަމަޖެހިފައެވެ.

"ދިވެހީންގެ އުފެއްދުންތެރިކަމުގެ މައުރަޒު 2026" އޮންނާނީ، މިމަހުގެ 25 އިން ނޮވެމްބަރު 2ގެ ނިޔަލަށް ހުޅުމާލެ ސެންޓްރަލް ޕާކުގައެވެ. މި މައުރަޒަށް އާންމުންނާއި ވިޔަފާރިތަކުގެ ބޮޑު ތަރުހީބެއް ލިބެމުންދާއިރު، ބައިވެރިވުމަށް އެދި މިހާތަނަށް 800 އަށްވުރެ ގިނަ ފޯމު ވަނީ ހުށަހަޅާފައެވެ.

މި މަޢުރަޒުގައި 16 ދާއިރާއަކުން 73 ގިންތިއެއްގެ އުފެއްދުންތަކާއި ޚިދުމަތްތައް ދައްކާލުމަށް ހަމަޖެހިފައިވާއިރު، މުބާރާތުގެ ބައިގައި ވާދަކުރުމަށް 6،000 އަށްވުރެ ގިނަ ދިވެހި އުފެއްދުން ވަނީ ރަޖިސްޓްރީކޮށްފައެވެ.

މިދިޔަ އަހަރުގެ މައުރަޒުގައި 5 ޑިސްޓްރިކް ހުރިނަމަވެސް، މިއަހަރު ތަފާތު އެކި ބާވަތުގެ އުފެއްދުންތެރިކަން ދައްކުވައިދޭ 7 ޑިސްޓްރިކްޓެއް ހުންނާނެއެވެ. އޭގެތެރޭގައި ދީނީ ދާއިރާ، ޓެކްނޮލޮޖީ ދާއިރާ އަދި އިންޓަރނޭޝަނަލް ޑިސްޓްރިކްޓެއްވެސް މިއަހަރުގެ މައުރަޒުގައި ހިމެނެއެވެ.

މިމައުރަޒުގެ ބޭނުމަކީ ދިވެހިންގެ އުފެއްދުންތެރިކަން ކުރިއަރުވައި، ވިޔަފާރިތަކަށް މާކެޓު ހޯދައިދީ އީޖާދީ ޚިޔާލުތައް ބަދަލުކުރުމުގެ މަގުފަހިކޮށްދިނުމެވެ.