"ތަރައްޤީވެފައިވާ ޤައުމަކަށް ރާއްޖެ ހެދުމަށް ޒުވާނުން އިސްނަގަންޖެހޭ"

ރާއްޖެ ތަރައްޤީވެފައިވާ ޤައުމަކަށް ހެދުމުގައި ޒުވާނުން އަމިއްލަ އިސްނެގުމަށް ބައިވެރިވެ މަސައްކަތްކޮށްދިނުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސެއިން މުޙައްމަދު ލަތީފް ގޮވާލައްވައިފިއެވެ. އެމަނިކުފާނު މިކަމަަށް ގޮވާލައްވާފައިވަނީ، މިއަހަރުގެ ވިލާ ކޮލެޖުގެ ސްޓޫޑެންޓް އެޗީވްމެންޓްސް އެވޯޑްސް ރަސްމިއްޔާތު ޝަރަފުވެރިކޮށްދެއްވާ ވާހަަކަފުޅު ދައްކަވަމުންނެވެ.

ވިލާ ކޮލެޖުން ދަސްވެނިވި ދަރިވަރުންގެ ތެރެއިން ޚާއްސަ އެވޯޑުތައް ހާސިލުކުރި ދަރިވަރުންނަށް އެވޯޑު ދިނުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅު ބިނާކުރެއްވީ ދަސްވެނިވި ދަރިވަރުން މުޖުތަމަޢަށް ބޭނުންތެރި ބަޔަކަށްވުމުގެ މައްޗަށެވެ. އެމަނިކުފާނުގެ ވާހަކަފުޅު ފައްޓަވާފައިވަނީ އެވޯޑުތައް ހާސިލުކުރެއްވި ދަރިވަރުންނަށް މަރުހަބާ ދަންނަވަމުންނެވެ.

ރައީސުލްޖުމްހޫރިއްޔާގެ ނައިބު ވިދާޅުވީ، ދަސްވެނިވި ދަރިވަރުން ހާސިލުކުރި ޢިލްމާއި ހުނަރުތައް ބޭނުންކޮށްގެން ޤައުމަށް ބޭނުންތެރި ދާއިރާތަކުން، ހައްލު ހޯދައި އީޖާދީ ވިސްނުން އިސްކުރަންޖެހޭ ކަމަށެވެ. މުޅި މުޖުތަމަޢަށް ބޭނުންވެފައި ހުރި ކަންކަމަށް ދާއިމީ ހައްލުތައް ހޯދުމަށް މިހާރު ދަރިވަރުންގެ ވިސްނުން އިސްކުރަން ޖެހޭ ކަމަށެވެ. އަދި އެމަގަށް ދަރިވަރުން މަސައްކަތް ކުރައްވާނެކަން ޔަޤީންކުރައްވާ ކަމަށް އެމަނިކުފާނު ވިދާޅުވިއެވެ.

މަސައްކަތުގެ މާހައުލުގައި މިހާރުވެސް ދަސްވެނިވި ބައެއް ދަރިވަރުން ޒިންމާދާރު މަޤާމުތަކުގައި މަސައްކަތްކުރައްވަމުންދާކަން ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ. އަދި މުޅިން އަލަށް މަސައްކަތުގެ މާހައުލަށް ނިކުންނަ ދަސްވެނިންވެސް ތިބިއިރު މުޢައްސަސާތަކުގެ ޚިދުމަތުގެ ފެންވަރު ރަނގަޅު ކުރުމަށް އެފަރާތްތަކުގެ އީޖާދީ ވިސްނުން ބޭނުންވާނެ ކަމަށް ވިދާޅުވިއެވެ.

ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ދިވެހިރާއްޖެ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރު ވަނީ ފާހަގަކުރައްވާފައެެވެ. މިކަމަކީ ކޮންމެ ރައްޔިތެއްގެވެސް އުއްމީދާއި ގުޅިފައިވާކަމެއްކަން ފާހަގަކުރައްވާ އެމަނިކުފާނު ވަނީ، މި ތަޞައްވުރު ހާސިލުކުރުމަށް ޒުވާނުން އިސްނެގުމަށް ގޮވާލައްވާފައެވެ.

"ރައީސް ވަނީ މި ތަޞައްވުރަށް ވާސިލުވުމަށް މަސައްކަތް ފަށާފައި. އެއީ، 2040 ވަނަ އަހަރު ދިވެހިރާއްޖެ ފުރިހަމައަށް ތަރައްޤީވެފައިވާ ޤައުމަކަށް ހެދުމުގެ ތަޞައްވަރު. މި ތަޞައްވުރު ހާސިލުކުރަން ތިޔަ އެންމެހާ ބޭފުޅުންގެ އެހީތެރިކަން ބޭނުންވޭ. ޚާއްސަކޮށް ޒުވާނުން އިސްނަގައިގެން އީޖާދީ ވިސްނުންތައް ބޭނުން ކުރައްވައިގެން މިމަސައްކަތުގައި އަމިއްލަފުޅަށް ބައިވެރިވާނެ." ރައީސުލްޖުމްހޫރިއްޔާގެ ނައިބު ވިދާޅުވިއެވެ.

އެމަނިކުފާނުގެ ވާހަކަފުޅުގައި ތަޢުލީމީ ނިޒާމުގެ މުހިންމުކަން ވަނީ ފާހަގަކުރައްވާފައެެވެ. އަދި ގިނަ އަދަދެއްގެ ދަރިވަރުން ދަސްވެނިވެގެންދާތަން ފެނުމަކީ މުޅި ޤައުމުގެ މައްސަލަތައް ހައްލުކުރުމަށް ދެއްވާ އަހައްމިއްޔަތު ފެނިގެންދާ ކަމެއްކަމަށް ރައީސުލްޖުމްހޫރިއްޔާގެ ނައިބު ވިދާޅުވިއެވެ. އެމަނިކުފާނު ވަނީ، ކުރިމަގުގައި މަސައްކަތް ކުރައްވާއިރު ޒަމާނީ ވަސީލަތްތަކަށް ހުނަރުވެރިކަމަށް އިސްކަންދިނުމަށް ގޮވާލައްވާފައެވެ.

ރައީސުލްޖުމްހޫރިއްޔާގެ ނައިބުގެ ވާހަކަފުޅު ނިންމަވާލެއްވީ، ވިލާ ކޮލެޖުން ހޯދާފައިވާ ކުރިއެރުންތަކާއި ކަމީޔާބީތައް ފާހަގަކުރައްވަމުންނެވެ. އަދި ކޮލެޖުގެ ބާނީ ޤާސިމް އިބްރާހީމް އަދި ކޮލެޖުގެ ވެރިން ކުރައްވާ މަސައްކަތް ފާހަގަކޮށް އެކަމަށް ޝުކުރު އަދާކުރެއްވިއެވެ.

މިރަސްމިއްޔާތުގައި ރައީސުލްޖުމްހޫރިއްޔާގެ ނައިބު ވަނީ، ޤާސިމް އިބްރާޙީމް އެވޯޑް ފޯރ އެކްސެލެންސް ހާސިލުކުރެއްވި ދަރިވަރުންނަށް އެވޯޑު ހަވާލުކޮށްދެއްވާފައެވެ.