ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ރައީސް ބައްލަވާލައްވައިފި

މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ރައީސުލްޖުމްހުރިއްޔާ ޑރ.މުޙައްމަދު ބައްލަވާލައްވައިފިއެވެ.

ރައީސްގެ މި ޒިޔާރަތުގައި އިޤްތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު، ވަޒީރު، އެމްޕިއެލްގެ ސިއީއޯ ޙުސައިން ޝަފީޤް ބައިވެރިވެވަޑައިގެންނެވިއެވެ. އަދި މި ޕްރޮޖެކްޓްގެ އިންޓަރނޭޝަނަލް ކީ ވޯލްގެ މަސައްކަތް ކުރިއަށްގެންދާ ޗައިނާގެ ކުންފުނިން ބައިވެރިވިއެވެ.

މާލޭ ވިޔަފާރި ބަނދަރަކީ 1986ވަނަ އަހަރު ޚިދުމަތް ފެށި ބަނދަރެއެވެ. 2015ވަނަ އަހަރު ފަށައިގެން ޚިދުމަތް ދެމުންދަނީ، ބަނދަރުގެ ކެޕޭސިޓީއަށްވުރެ އިތުރަށެވެ.

މާލެ ވިޔަފާރި ބަނދަރު ތިލަފުއްޓަށް ބަދަލުކުރުމާ ގުޅޭ މަސައްކަތްތައް ކުރިއަށްގެންދަނީ އެކި ފިޔަވަހިތަކަށް ބަހާލައިގެންނެވެ. މީގެދަށުން ފުރަތަމަ ފިޔަވަހީގެ މަސައްކަތްތައް މިދިޔަ އަހަރު ވަނީ ފަށާފައެވެ. އަދި މިހާރު ވަނީ އެތަނުގައި ހަދާ 100 މީޓަރުގެ ޑޮމެސްޓިކް ކީވޯލްގެ މަސައްކަތް ނިންމާފައެވެ. މުޅި މަޝްރޫޢު ނިމޭއިރު 2 ކިލޯމީޓަރުގެ ސަރަޙައްދެއް ތަރައްޤީކުރާނެއެވެ.

އަދި އިންޓަރނޭޝަނަލް ކީވޯލްގެ މަސައްކަތް ޗައިނާ ކުންފުންޏަކާ ވަނީ ހަވާލުކޮށްފައެވެ.

މިހާރު ބޭނުންކުރާ ޕޯޓަކީ 5 ހެކްޓަރުގެ ޖާގައިގެ ޕޯޓެކެވެ. ތިލަފުށީގައި ޕޯޓު ތަރައްޤީކުރުމަށް 60 ހެކްޓަރުގެ ބިމެއް ވަނީ ހަމަޖައްސާފައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ މަސައްކަތް ކުރިއަށްދާގޮތާމެދު ވަރަށް ހިތްހަމަޖެހޭކަމަށެވެ. އަދި ސަރުކާރުގެ ޢަމާޒާ އެއްގޮތަށް، އަންނަ އަހަރުގެ ފަހުކޮޅު ޚިދުމަތްތައް ތިލަފުއްޓަށް މުޅިން ބަދަލުކުރެވޭނެކަމަށެވެ. ޚިދުމަތްތައް 4 ގުނަ ފުޅާވާނެކަމަށް ރައީސް ވިދާޅުވިއެވެ.

"އަންނަ އަހަރުގެ ނޮވެމްބަރު 11ގެ ކުރިން މުޅި ޕޯޓުގެ ޚިދުމަތް ތިލަފުއްޓަށް ބަދަލުކުރުން ޢަމާޒަކީ. މީގެތެރެއިން ބައެއް ޚިދުމަތްތައް މާލެ އިންޑަސްޓްރިއަލް ޒޯންގައިވެސް ތަރައްޤީކުރާނެ." ރައީސް ވިދާޅުވިއެވެ.

ތިލަފުށީ ޕޯޓުގެ މަސައްކަތްކާއެކު، ރާއްޖެއަށް މުދާ އެތެރެކުރުމުގެ ޚިދުމަތްތައް ބޮޑުތަނުން އަވަސްވާނެއެވެ. މިއާއެކު ވިޔަފާރިތަކަށް ލިބޭ ފައިދާގެ އިތުރުން،އޭގެ ސަބަބުން އާއްމު ފަރުދުންނަށްވެސް އޭގެ މަންފާ ކުރާނެކަމަށް އިޤްތިޞާދީ ތަރައްޤީއާ ބެހޭ ވަޒީރު ވިދާޅުވިއެވެ.