ރާއްޖޭގައި ޖަޕާނު އެމްބަސީ ޤާއިމުކުރިތާ 10 އަހަރު ފުރުން ފާހަގަކޮށްފި

ޖަޕާނުގެ އެމްބަސީ ރާއްޖޭގައި ޤާއިމުކުރިތާ 10 އަހަރުފުރުން ފާހަގަކޮށްފިއެވެ. ޖަޕާން އެމްބަސީ ރާއްޖޭގައި ޤާއިމްކޮށްފައިވަނީ 2016ވަނަ އަހަރުއެވެ.

ޖަޕާންގެ އެމްބަސީ ރާއްޖޭގައި ޤާއިމްވިތާ 10 އަހަރުފުރުން ފާހަގަކުރުމަށް ހޮޓެލް ޖެންގައި ބޭއްވި ޚާއްސަ ރައްމިއްޔާތު ޝަރަފުވެރިކޮށްދެއްވީ ޚާރިޖީ ވަޒީރު އިރްތިޝާމް ޢާދަމް އެވެ.

މި މުނާސަބަތާއި ގުޅުވައިގެން ރައީސުލްޖުމްހޫރިއްޔާގެ އަނބިކަބަލުން ސާޖިދާ މުޙައްމަދު ވަނީ ޚާއްސަ ވީޑީއޯ މެސެޖެއް ދެއްވާފައެވެ. ރާއްޖޭގެ އުމްރާނީ ތަރައްޤީއަށް ޖަޕާނުން ވެދެއްވާފައިވާ އެހީތެރިކަން ފާހަގަކުރައްވައި ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ، ދެ ޤައުމުގެ ސަރުކާރުގެ މެދުގައި އޮތް ގުޅުމުގެ އިތުރުން ރައްޔިތުންގެ މެދުގައިވެސް ބަދަހި ގުޅުމެއް އުފެދިފައިވާކަމަށެވެ.

މި ރަސްމިއްޔާތުގައި ވާހަކަފުޅުދައްކަވަމުން ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވިދާޅުވީ 2016ވަނަ އަހަރު މާލޭގައި ޖަޕާނުގެ އެމްބަސީއެއް ހުޅުވުމަކީ، މި ޒަމާންވީ ގުޅުމުގެ އައު ބާބެއް ފެށިގެންދިޔަ ކަމެއްކަމެއްކަމަށާއި، އެކަމުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެ، މަޝްވަރާތަކާއި އެއްބާރުލުން އިތުރުވެ، ވިސާ ދޫކުރުމާއި ކޮންސިއުލަރ ފަދަ ޚިދުމަތްތަކާއި ކަންކަން ސީދާކޮށް ފޯރުކޮށްދިނުމަށް މަގުފަހިވެގެންދިޔަކަމަށެވެ.

ރާއްޖޭގެ ތަރައްޤީގެ ދަތުރުގައި، އެކި ދާއިރާތަކުން ހިލޭ އެހީއާއި ފަންނީ އެއްބާރުލުން ފޯރުކޮށްދިނުމުގައި ބައިވެރިވުމަކީ ޖަޕާނުން އުފާ ކަމެއްކަމެއްކަމަށް ސަފީރު ވިދާޅުވިއެވެ. ދެ ޤައުމުގެ މެދުގައި އުފެދިފައިވާ އިޤްތިޞާދީ އަދި ވިޔަފާރީގެ ގުޅުމަކީވެސް ޒަމާންވީ ގުޅުމެއްކަން ފާހަގަކުރައްވަމުން ސަފީރުވަނީ 'ޔަންމާ' އިންޖީނުގެ ސަބަބުން ރާއްޖޭގެ މަސްވެރިކަމަށް ބޮޑު ބަދަލެއް އައިއިރު، 'މަކިޓާ' އާއި 'ހިޓާޗީ' ފަދަ އުފެއްދުންތަކަކީ ދިވެހިންގެ އާންމު ދިރިއުޅުމުގެ ބައެއްކަމަށް ވިދާޅުވިއެވެ. ޖަޕާނުގެ މަޝްހޫރު 'ޔަމަކީ' ކުންފުނިން އައްޑޫ ސިޓީގައި ހިންގާ އޮޕަރޭޝަންތަކުން މަތީ ފެންވަރުގެ އުފެއްދުންތައް އެކްސްޕޯޓް ކުރާއިރު، ދިވެހި ކުންފުންޏެއް ކަމަށްވާ 'ސާރާ އިންޓަނޭޝަނަލް' އިން ދަނީ ޖަޕާނުގެ މަތީ ފަންތީގެ ކާބޯތަކެތި ރާއްޖެއަށް ތަޢާރަފުކުރަމުންކަމަށް ވިދާޅުވިއެވެ.

ސަފީރު އިޝިގާމީ ރުމީކޯ ވިދާޅުވީ ސަގާފަތާއި، ތަޢުލީމާއި، ކުޅިވަރުގެ ތެރެއިން ވެސް ރަޙުމަތްތެރިކަން ދަނީ ބަދަހިވަމުންކަމަށާއި މިއަދާ ހަމައަށް 200 އަށްވުރެ ގިނަ ދިވެހި ދަރިވަރުން ވަނީ ޖަޕާނުގެ އެކި ސްކޮލަރޝިޕްތަކާއި ޕްރޮގްރާމްތަކުގައި ބައިވެރިވެފައިކަމަށެވެ. 'ކިޒޫނާ މޯލްޑިވްސް' ނަމުގައި ޖަޕާނުން ކިޔެވި ކުދިންގެ ޖަމުޢިއްޔާއެއް އުފެދިފައިވުމަކީ ލިބޭ ބޮޑު އުފަލެއްކަމަށް ވިދާޅުވިއެވެ.

ކޯވިޑް-19 ގެ ކުރިން، ޖައިކާ މެދުވެރިކޮށް ދިވެހިރާއްޖޭގެ ޤައުމީ ޔުނިވަރސިޓީގައި ޖަޕާނު ބަސް އުނގަންނައިދިނުމަށް ވަނީ އެހީތެރިވެދީފައިކަމަށާއި މިއަދު ވެސް ޖަޕާނު ފައުންޑޭޝަނާއި އެމްބަސީ ގުޅިގެން މި މަސައްކަތް ދަނީ ކުރަމުންކަމަށް ވިދާޅުވިއެވެ. ޖަޕާނާއި ރާއްޖެއަކީ ޖިއޮގްރަފީ ގޮތުން ދުރުގައި އޮތް ދެ ޤައުމު ކަމަށްވިޔަސް، ދެ ޤައުމަކީ ވެސް ޖަޒީރާ ޤައުމުތަކަކަށް ވުމާއެކު ކަނޑުގެ މުހިންމުކަމާއި މޫސުމީ ބަދަލުތަކުގެ ގޮންޖެހުންތައް އިޙްސާސް ކުރެވޭކަމަށް ވިދާޅުވިއެވެ.

މި އެއްގޮތް ކަންތައްތަކަކީ ބައިނަލްއަޤްވާމީ މައިދާނުގައި އެކުގައި މަސައްކަތްކުރުމަށް އޮތް ވަރުގަދަ ބިންގަލެއްކަމަށާއި، އެގޮތުން ޤާނޫނީ ހަމަތަކުގެ މައްޗަށް ބިނާވެފައިވާ ބައިނަލްއަޤްވާމީ ނިޒާމެއް ކުރިއެރުވުމަށް ޖަޕާނުން އަބަދުވެސް މަސައްކަތްކުރާނެކަމަށް ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވިދާޅުވިއެވެ.

"މި މުހިންމު މުނާސަބަތު ފާހަގަކުރާއިރު، ދެ ޤައުމުގެ މެދުގައި އޮތް ގުޅުން އިތުރަށް ހަރުދަނާކުރުމަށް އަޒުމް އާކުރަމާ ހިނގާ. އަންނަ އަހަރަކީ ދެ ޤައުމުގެ ސިޔާސީ ގުޅުމަށް 60 އަހަރު ފުރޭ އަހަރު. އަޅުގަނޑުގެ ދުޢާއަކީ ދެ ޤައުމުގެ މެދުގައި އޮތް ރަޙުމަތްތެރިކަން އިތުރަށް ބަދަހިވެ، އަމާން އަދި ތަނަވަސް މުސްތަޤްބަލަކަށް އެކުގައި ދަތުރުކުރުން" ސަފީރު ވިދާޅުވިއެވެ.

މި ރަސްމިއްޔާތުގައި ދިވެހިރާއްޖޭގެ ޤައުމީ ޔުނިވަރސިޓީގައި ޖަޕާނު ބަސް ކުރިއެރުވުމަށް ކޮށްދެއްވި ޚިދުމަތުގެ އަގުވަޒަންކުރުމުގެ ގޮތުން، ޤައުމީ ޔުނިވަރސިޓީގެ ފެކަލްޓީ އޮފް އާޓްސްގެ ކުރީގެ ޑީން އާސިމް ޢަބްދުއްސައްތާރަށް 'ޖަޕާނު ސަފީރުގެ އެވޯޑް' ވަނީ އަރުވާފައެވެ. މީގެ އިތުރުން، އެމްބަސީން ބޭއްވި 'ކެންޑޯ' ދައްކާލުމުގެ ޙަރަކާތުން، ޖަޕާނުގެ ސަގާފަތަށް ދިވެހިންގެ ޝައުޤުވެރިކަން ހުރި މިންވަރު ހާމަވެ 'ކެންޑޯ ކްލަބް' ރަސްމީކޮށް އިފްތިތާޙުކޮށް، އެ ކްލަބަށް ސެޓްފިކެޓް ވަނީ އަރުވާފައެވެ. މި ހަފްލާގެ ތެރެއިން ވަނީ ދެ ޤައުމުގެ ދެމެދުގެ ގުޅުމާއި ތަރައްޤީގެ އެކި ދާއިރާތަކުން ކޮށްފައިވާ މަސައްކަތްތަކުގެ ކުރު ވީޑިއޯ ކްލިޕްތަކެއް ލޯންޗުކޮށްފައެވެ.