އާބާދީގެ ސިއްޙީ ހާލަތު ދެނެގަތުމުގެ ސަރވޭ ފަށާނީ އަންނަ އަހަރު

އާބާދީގެ ސިއްޙީ ހާލަތާއި ގުޅުންހުރި އެންމެ ފަހުގެ މައުލޫމާތާއި ތަފާސްހިސާބުތައް ދެނެގަތުމަށް ކުރިއަށް ގެންދިޔުމަށް ނިންމާފައިވާ "މަލްޓިޕްލް އިންޑިކޭޓަރ ކަލަސްޓަރ ސާރވޭ" އަންނަ އަހަރުގެ ކުރީކޮޅު ފެށުމަށް ތައްޔާރުވަމުންދާކަމަށް ޞިއްޙަތާއި އާއިލާ އާއި އިޖުތިމާޢީ އެހީއާބެހޭ ވަޒީރު ޤީލާ އަލީ ވިދާޅުވެއްޖެއެވެ.

"މަލްޓިޕްލް އިންޑިކޭޓަރ ކަލަސްޓަރ ސާރވޭ (މިކްސް)" އަކީ ބައިނަލްއަޤްވާމީ ފެންވަރެއްގައި، އަބާދީގެ ޞިއްޙީ ހާލަތާއި ކުޑަކުދިންގެ ރައްކާތެރިކަމާއި ތައުލީމު ހިމެނޭހެން 100 އަށްވުރެ ގިނަ މިންގަނޑުތަކަށް މައުލޫމާތު އެއްކުރެވޭނެ ދިރާސާއެކެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޤިލާ ވިދާޅުވީ އެ ސަރވޭ ކުރިއަށް ގެންދިޔުމަށް ބޮޑު ހޭދައެއް ކުރަން ޖެހޭ ކަމަށެވެ. އެ މަސައްކަތަށް ދަޢުލަތުގެ ބަޖެޓުންނާއި، ޔުނިސެފާއި، ދުނިޔޭގެ ސިއްޙަތު ޖަމްޢިއްޔާގެ އެހީ ލިބޭނެކަން ވަޒީރު ފާހަގަކުރެއްވިއެވެ. އެގޮތުން ސަރވޭއަށް ދަޢުލަތުގެ ބަޖެޓުން 150 މިލިޔަން ރުފިޔާ ޚަރަދުވާނެކަމަށް އަންދާޒާ ކުރެވޭކަމަށް ވަޒީރު ވިދާޅުވިއެވެ.

ވަޒީރު ޤީލާ ވިދާޅުވީ، އެ ސަރވޭ ކުރިއަށް ގެންދިޔުމަށް ބޭނުންކުރާނެ ސުވާލުތަކާއި، ރަށްތަކާއި، މީހުން ކަނޑައެޅުން ފަދަ މުހިއްމު މަސައްކަތްތައް މިހާރު ކުރިއަށްދާ ކަމަށެވެ. އަދި އަންނަ އަހަރުގެ ކުރީކޮޅު ސަރވޭ ފެށުމަށް ތައްޔާރުވަމުންދާކަން ވަޒީރު ފާހަގަކުރެއްވިއެވެ.

"ސިއްޙީ ގިނަ މައްސަލަތަކަށް އަމާޒުކުރާނެ. ނަފްސާނީ މަޢުލޫމާތުތައް ހިމެނޭނެ. އާބދީއެއްގެ ތެރޭގައި ހުރި މައްސަލަތައް ދެނެގަނެވޭނެ. މިސަރވޭއިން އިތުރަށް ބަލީގެ ނިސްބަތް ދެނެގަނެވޭނެ. އަންނަ އަހަރުގެ މެދެއްހާ ތަނުގައި ރިޕޯޓް ނިންމާ އާންމުކުރެވޭނެ." ޞިއްޙަތާއި އާއިލާއާއި އިޖުތިމާޢީ އެހީއާބެހޭ ވަޒީރު ޤީލާ އަލީ ވިދާޅުވިއެވެ.

މަލްޓިޕްލް އިންޑިކޭޓަރ ކްލަސްޓަރ ސާރވޭއަކީ، ޔުނިސެފުގެ އެހީއާއެކު އެކި ޤައުމުތަކުގައި ކުރާ ދިރާސާއެކެވެ. މި ދިރާސާގެ މުހިއްމު އެއް ބޭނުމަކީ، ރާއްޖޭގެ ދުރުރާސްތާ ޕްލޭންއާއި ސިޔާސަތުތަކަށް ބޭނުންވާ މައުލޫމާތާއި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރެވޭ މިންވަރު ބެލެހެއްޓުމަށް ބޭނުންވާ ތަފާސްހިސާބުތައް އަދާހަމަ ކުރުމެވެ.

މީގެ ކުރިން ރާއްޖޭގައި މިކްސް ސާރވޭ ހަދާފައިވަނީ 1996 އަދި 2001 ގައެވެ. އެންމެފަހުން ރާއްޖޭގައި ޤައުމީ ފެންވަރެއްގައި ކުރެވުނު އެންމެ ބޮޑު ސިއްޙީ ދިރާސާއަކީ "ޑިމޮގްރަފިކް ހެލްތު ސާރވޭ"އެވެ. އަދި މި ދިރާސާ ކޮށްފައިވަނީ 2016-2017ގައެވެ.

މި ފަދަ ދިރާސާތަކަކީ ޤައުމުތަކުގައި ކޮންމެ 5 އަހަރަކުން ކުރާ ދިރާސާތަކެކެވެ. 2022 އިން 2024 އަށް ޑިމޮގްރެފިކް ހެލްތު ސާރވޭ ހެދުމަށް ބޭނުންވާ ބަޖެޓް ހޯދުމަށް ސިއްޙީ ވުޒާރާއިން މަސައްކަތް ކުރިނަމަވެސް ބަޖެޓް ހޯދުމުގައި ދަތިތަކެއް ވަނީ ދިމާވެފައެވެ. މީގެ އިތުރުން 2025 ވަނަ އަހަރު ބައިނަލްއަޤްވާމީ "ޑިމޮގްރަފިކް ހެލްތު ސާރވޭ" ޕްރޮގްރާމްވަނީ ހުއްޓުމަކަށް އައިސްފައެވެ.

އެހެންކަމުން ރާއްޖޭގެ ސިއްޙީ ހާލަތާއި ގުޅުންހުރި އެންމެ ފަހުގެ މައުލޫމާތާއި ތަފާސްހިސާބުތައް ދެނެގަތުމަކީ މުހިއްމު ކަމަކަށްވާތީ މިފަހަރު "މިކްސް ސާރވޭ"ގައި މެންޓަލް ހެލްތު އަދި ބޯ ފެނުގެ ކޮލިޓީ ޓެސްޓުކުރުން ފަދަ ބައިތައް ހިމެނުމަށް ރާވާފައިވެއެެވެ. އަދި މި ސާރވޭގައި، ހެލްތު ޕްރޮޓެކްޝަން އެޖެންސީއިން އިސްނަގައިގެން ހަދާ "މައިކްރޮނުއިޓްރިއެންޓް ސާރވޭ"ގެ ބައިތައް ހިމެނުމަށްފަހު، އެއް ސާރވޭއެއް ގޮތުގައި ކުރިއަށް ގެންދިއުމަށް ވަނީ ރާވާފައެވެ.