އޯގާތެރިކަމަކީ ޞިއްޙީ ޚިދުމަތުގެ ނާރެހަށް ހަދަންޖެހޭ: ވަޒީރު ޤީލާ

ޞިއްޙީ ޚިދުމަތްތެރިން ވާޖިބު އަދާކުރުމުގައި އަބަދުވެސް ފަރުވާތެރިވެ، ޚިދުމަތުގެ ނާރެހަކީ އޯގާތެރިކަން ކަމުގައި ހެދުމަށް ޞިއްޙަތާއި އާއިލާއާއި އިޖުތިމާޢީ އެހީއާބެހޭ ވަޒީރު ޤީލާ އަލީ އިލްތިމާސްކުރައްވައިފިއެވެ.

ވަޒީރު މިކަމަށް އިލްތިމާސްކުރެއްވީ، ވިލާ ކޮލެޖުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ޞިއްޙަތާއި އާއިލާއާއި އިޖުތިމާޢީ އެހީއާބެހޭ ވަޒީރު ޤީލާ ޢަލީ ވިދާޅުވީ، މި ރަސްމިއްޔާތަކީ ހަމައެކަނި ތަޢުލީމާއި ތަމްރީނު ފުރިހަމަކުރުމުގެ ކާމިޔާބު ފާހަގަކުރުން ނޫން ކަމަށާއި، މިއީ ޞިއްޙީ ޚިދުމަތަށް ތައްޔާރުވެފައިވާ މިންވަރާއި، ފަންނުވެރިކަމާއި، އަދުލުވެރި ޒިންމާދާރު ޚިދުމަތަކަށް އަދި މެދުކެނޑުމެއްނެތި ތަޢުލީމު ހާސިލުކުރުމަށް ދަރިވަރުންގެ ހުރި ޝައުޤުވެރިކަން ރަމްޒުކޮށްދޭ ރަސްމިއްޔާތެއް ކަމަށެވެ.

ދަރިވަރުން ހާސިލުކުރި ހުނަރުތަކުގެ ސަބަބުން މުޅި މުޖުތަމަޢުގެ ދުޅަހެޔޮކަމަށް ހެޔޮ އަސަރުތަކެއް ކުރާނެ ކަމަށްވެސް ވަޒީރު ފާހަގަކުރެއްވިއެވެ. ނަރުހުންގެ އަގުހުރި ދައުރަށް އަލިއަޅުއްވާލައްވަމުން ވަޒީރު ވިދާޅުވީ، ކޮންމެ ޞިއްޙީ ނިޒާމެއްގެ މައިބަދައަކީ ނަރުހުން ކަމަށާއި، ނަރުހުންގެ ޚިދުމަތަށް ނިކުންނަވާ ބޭފުޅުން ވަދެވަޑައިގަންނަވަނީ މިއަދު ދުނިޔޭގެ އެންމެ އިތުބާރު ކުރެވޭ ފަންނު ކަމަށެވެ.

ވާޖިބު އަދާކުރުމުގައި އަބަދުވެސް ފަރުވާތެރިވެ، ޚިދުމަތުގެ ނާރެހަކީ އޯގާތެރިކަން ކަމުގައި ހެދުމަށް ވަޒީރު އިލްތިމާސްކުރެއްވިއެވެ.

"ފުރާނަ ނުރައްކަލަށް ހުށަހެޅޭއިރު، އޯގާތެރިކަމާއި އަޅާލުމުން ބަލިމީހުންނަށާއި، އެބައިމީހުންގެ އާއިލާއަށް ހިތްހަމަޖެހުން ގެނެސްދެއްވާ ބޭފުޅުންނަކީ ނަރުހުން. އިންސާނިއްޔަތުކަމާއި ސައިންސުގެ އަލީގައި ބަލިމީހާއަށް އުންމިދު ގެނެސްދޭ އެހީތެރިޔަކީވެސް އެއީ،" ވަޒީރު ޤީލާ ވިދާޅުވިއެވެ.

ފާމަސީ ދާއިރާއިން ދަސްވެނިވި ދަރިވަރުންނާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، އެ ދަރިވަރުންނަކީ ހަމައެކަނި ބޭސް ދޫކުރުމަށްވުރެ ފުޅާ ދާއިރާއެއްގައި ދިރާސާކުރުމާއި ބޭސް އުފެއްދުމުގެ ފަންނީ ތަމްރީނު ލިބިފައިވާ ބައެއް ކަމަށެވެ. އަދި ޞިއްޙީ ދާއިރާގެ އެކި ރޮނގުތަކުން މީހުން ބިނާކުރުމުގައި ވިލާ ކޮލެޖުން ކުރަމުންދާ އަގުހުރި މަސައްކަތްތަކަށް ވަޒީރު ވަނީ ޝުކުރު އަދާކުރައްވާފައެވެ.