ވާމްއަޕް ވެސް ކުރުވާފައި ކުޅެން ފުރުސަތު ނުދިނުމުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ގައުމީ ޓީމުން މުހިންމު މެޗުތަކެއް ކުރިއަށް އޮއްވައި ގައުމީ ޓީމުން ވަކިވެއްޖެއެވެ.
ނޭޝަންސް ލީގުގައި މިރޭ ޑެންމާކާ ދެކޮޅަށް ކުޅޭ މެޗުގެ ކުރިން ރޮނާލްޑޯ ޓީމާ ވަކިވުމަށްފަހު ބުނީ 18 އަހަރު ތެރޭގައި ފުރަތަމަ ފަހަރަށް ގައުމީ ޒިންމާއާ ދުރަށް ޖެހިލި ސަބަބު ފަހުން ބުނާނެ ކަމަށެވެ. މީޑިޔާތަކުން ތުހުމަތު ކުރާ ގޮތުގައި ރޮނާލްޑޯ ހިތްހަމަ ނުޖެހުނީ ނޭޝަންސް ލީގުގައި ބުދަ ދުވަހުގެ ރޭ ނޯވޭ އަތުން ޕޯޗުގަލް މޮޅުވި މެޗުގައި އޭނާ އަށް ކުޅެން ފުރުސަތު ނުދިނުމުންނެވެ.
އުމުރުން 41 އަހަރުގެ ރޮނާލްޑޯ ޕޯޗުގަލް ޓީމުގައި ހިމެނި ފާއިތުވެދިޔަ 18 އަހަރު ތެރޭގައި ނުކުޅެ އިންނަން ޖެހުނު މިއީ ފުރަތަމަ ފަހަރެވެ. ގައުމީ ޓީމަށް 234 މެޗު ކުޅެދީ އެންމެ އެންމެ ގިނަ ގޯލު ޖަހައިދީފައިވާ ފޯވަޑް ބުނީ ޓީމާ ވަކިވީ ޕޯޗުގަލްގެ ފުޓުބޯޅެ ފެޑަރޭޝަނުގެ ރައީސްއާ ވެސް މަޝްވަރާ ކޮށްފައި ކަމަށާއި"ޕޯޗުގަލް ރައްޔިތުންނަށް ރަނގަޅު ވަގުތެއްގައި އޭނާ ވަކިވި ސަބަބު ބުނެދޭނެ ކަމަށެވެ. ދުނިޔޭގެ މީޑިއާތަކުން ދެކެނީ މިއީ އާދައިގެ މައްސަލައަކަށް ނުވާނެ ކަމަށެވެ.
ނޯވޭ މެޗުގެ ފުރަތަމަ 11 އިން ރޮނާލްޑޯ އަށް ޖާގަ ދީފައިނުވާއިރު ކޯޗު ޖޯޖް ޖެސޫސް އޭނާ ގާތުގައި ބުނީ މެޗުގެ ފަހު 30 މިނިޓްގައި ކުޅެން ފުރުސަތުދޭނެ ކަމަށެވެ.
"އަހަރެން ނިންމައިގެން ހުރީ އޭނާ ކުޅެން އަރުވަން. އެކަމަކު އެ ފުރުސަތު ނުލިބުނީ. އެއީ ގޮންކާލޯ ރާމޯސް ދިޔައީ ވަރަށް ރަނގަޅަށް ކުޅެމުން. އޭނާ ލަނޑު ޖަހާފައި އިތުރު ލަނޑެއް ވެސް ޖެހި. ރެފްރީ މި ލަނޑު ގަބޫލު ނުކުރިޔަސް އޭނާ މޮޅަށް ކުޅެނިކޮށް ބަދަލު ކުރުން ރަނގަޅު ކަމަށް އަހަރެންނަށް ނުފެނުނީ. މިހެންވެ ރޮނާލްޑޯ އަށް ކުޅެން ފުރުސަތު ދެވޭނެ ގޮތެއް މެޗުގެ އޮއިވަރު ދިޔަ ގޮތުން ނުލިބުނު. ކޮންމެ ކުޅުންތެރިއަކު ވެސް ވާމްއަޕް ކުރުވާފައި ކުޅެން ފުރުސަތު ނުލިބުނީމާ ދެރަވާނެ،" ކޯޗު ބުންޏެވެ.
މިކަމާ ގުޅިގެން ކޯޗާއި ރޮނާލްޑޯއާ ދެމެދު މައްސަލަ ޖެހުނުތޯ އެހުމުން ޖެސޫސް ބުނީ މިއީ އެއްވެސް މައްސަލައެއް އޮންނަންވީ ކަމެއް ނޫން ކަމަށެވެ.
"މިހާރު ހީވެގެން މިއުޅެނީ އޭނާ އާއި އަހަރެންނާ ދެމެދު މައްސަލަ ޖެހުނީއޭ. އެކަމަކު އޭނާ އާއި އަހަރެންނާ އެއްވެސް މައްސަލައެއް ނެތް. އޭނާ ހުރީ އަހަރެން ބޭނުންވާ ގޮތަކަށް ކުޅެން ތައްޔާރަށް،" ކޯޗު ބުންޏެވެ.
ނަމަވެސް ކޯޗު ފަހުން ވާހަކަ ދެއްކީ މުޅިން ތަފާތު ރާގެއްގަ އެވެ. އޭނާ ބުނީ ޓީމުގައި ގޮތް ނިންމާނީ ކޯޗު ކަމަށާއި ކުޅުންތެރިން ކޯޗުގެ ނިންމުމަށް އިހްތިރާމް ކުރަން ޖެހޭނެ ކަމަށެވެ.
"އަހަރެން ގޮތް ނިންމާނީ. އެކަމުގައި ކުޅުންތެރިން މައްސަލަ ޖައްސާނެ ތަނެއް ނޯންނާނެ. އަހަރެން ރޮނާލްޑޯއާއެކު މީގެ ކުރިން ސައޫދީ ލީގުގައި ވެސް މަސައްކަތް ކުރިން. ސައޫދީގައި އޭނާ ދަނީ ކޮންމެ ތިން ދުވަހަކުން މެޗު ކުޅެމުން. ދެން އޭނާގެ އުމުރަށް ބަލާއިރު އޭނާ އަކީ މެޗު ކުޅޭ ދުވަހު ނޫން އަނެއް ދުވަހު މިހާރު އެހާ ގިނައިން ޕްރެކްޓިސް ކުރާ ކުޅުންތެރިއެއް ނޫން. ގައުމީ ޓީމުގައި އޭނާ ހުރީ ކުޅެން ތައްޔާރަށް. އެކަމަކު ގޮތް ނިންމާނީ އަހަރެން. އަހަރެން އޭނާ ގާތުގައި ވެސް ބުނިން ޑެންމާކު މެޗުގައި (މިރޭ) އޭނާ ލައްވައި ނުކުޅުވާނެ ވާހަކަ. އެއްވެސް ކުޅުންތެރިއަކަށް އަހަރެންގެ ވިސްނުން ބަދަލެއް ނުކުރެވޭނެ،" ކޯޗު ބުންޏެވެ.
އުމުރުން 41 އަހަރުގެ ރޮނާލްޑޯ ޕޯޗުގަލް ޓީމުގައި ހިމެނި ފާއިތުވެދިޔަ 18 އަހަރު ތެރޭގައި ނުކުޅެ އިންނަން ޖެހުނު މިއީ ފުރަތަމަ ފަހަރެވެ. ގައުމީ ޓީމަށް 234 މެޗު ކުޅެދީ އެންމެ އެންމެ ގިނަ ގޯލު ޖަހާދީފައިވާ ފޯވަޑް ބުނީ ޓީމާ ވަކިވީ ޕޯޗުގަލްގެ ފުޓުބޯޅެ ފެޑަރޭޝަނުގެ ރައީސްއާ ވެސް މަޝްވަރާ ކޮށްފައި ކަމަށެވެ. ދުނިޔެގެ މީޑިއާތަކުން ދެކެނީ މިއީ އާދައިގެ މައްސަލައަކަށް ނުވާނެ ކަމަށެވެ.