މަތިވެރީގެ އައު މިސްކިތާއެކު ޖާގައިގެ ދަތިކަމަށް ދާއިމީ ހައްލެއް

އަރިއަތޮޅު އުތުރުބުރީ މަތިވެރީގައި ތަރައްޤީކުރާ 500 މީހުންގެ ޖާގައިގެ ޒަމާނީ މިސްކިތް ބިނާކުރުމުގެ މަސައްކަތް ބާރު ދުވެލީގައި ކުރިއަށްދާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ. މިސްކިތުގެ މަސައްކަތް ނިމުމާއިއެކު މަތިވެރީގައި ބޮޑު ޖަމާއަތުގައި ނަމާދު ކުރުމަށް ދިމާވެފައިވާ ޖާގައިގެ މައްސަލައަށް ދާއިމީ ހައްލު ލިިގެންދާނެއެވެ.

މި މަޝްރޫޢަކީ އިސްލާމީ ކަންތައްތަކާ އައުޤާފާއި ބެހޭ ވުޒާރާއިން ކޭއެންޑްއެފް ހޯލްޑިންގއާ ހަވާލުކޮށްގެން ކުރިއަށްގެންދާ މަޝްރޫޢެކެވެ. މިދިޔަ އަހަރުގެ ސެޕްޓެމްބަރުގައި ހަވާލުކުރެވުނު މިމަޝްރޫޢުގެ މަސައްކަތް އެކިއެކި ސަބަބުތަކާ ހުރެ މަޑުޖެހުނު ނަމަވެސް، މިހާރު މިސްކިތުގެ މަސައްކަތް ބާރަށް ކުރިއަށް ދާކަމަށެވެ. ސަރުކާރުގެ އަމާޒަކީ އަންނަ އަހަރުގެ ތެރޭގައި މިސްކިތުގެ މަސައްކަތް މުޅިން ފުރިހަމަކޮށް، ރައްޔިތުންނަށް ބޭނުންކުރެވޭ ގޮތް ހެދުމެވެ.

މިސްކިތަކީ ތިމާވެއްޓާ ރައްޓެހިގޮތަށް، އަވިން ހަކަތަ އުފައްދާ ނިޒާމު މެދުވެރިކޮށް ކަރަންޓު ދެވޭގޮތަށް ތަރައްޤީކުރާ މިސްކިތެކެވެ. ޒަމާނީ ފެންވަރަށް ތަރައްގީކުރާ މި މިސްކިތަކީ އޭސީކޮށް، އަންހެނުންނަށް ނަމާދުކުރެވޭނެ ޚާއްޞަ ބަޔަކާއި، ލައިބްރަރީއަކާއި ކުލާސްރޫމެއްވެސް ހިމެނޭ ގޮތަށް ބިނާކުރާ މިސްކިތެކެވެ. ސަރުކާރުން މިސްކިތްތަކުގައި ކްލާސްރޫމާއި ލައިބްރަރީ ހިމަނަނީ ޤުރުއާން ކްލާސްތައް ހިންގުމަށާއި ދީނީ އިލްމު ފެތުރުމުގެ އިތުރުން އިޖުތިމާޢީ ތަފާތު ހަރަކާތްތަކަށް މަގުފަހިކުރުމުގެ މަޤްޞަދުގައެވެ.

މި މަޝްރޫޢާ ގުޅޭގޮތުން ޕީއެސްއެމް ނިއުސްއަށް ދެއްވި އިންޓަވިއުއެއްގައި މަތިވެރި ކައުންސިލްގެ ރައީސް އިސްމާއީލް އާތިފް ވިދާޅުވީ، މިއީ އެރަށުގެ ރައްޔިތުންނަށް ނުހަނު މުހިންމު މަޝްރޫއެއް ކަމަށެވެ. އަދި މިސްކިތް ނިމުމުން ރަށުގައި މިހާރު ދިމާވެފައިވާ މިސްކިތު ޖާގައިގެ ދަތިކަމަށް ދާއިމީ ހައްލެއް ލިބިގެންދާނެ ކަމަށް އާތިފް ފާހަގަކުރެއްވިއެވެ.

"ހަޤީޤަތުގައިވެސް މިހާރު ބޭނުންކުރާ ދެންހުރި މިސްކިތްތަކުގައި ޖާގައެއް ނެތް. ބޭރުގައި ކޮންމެ ދުވަހަކުވެސް މިތިބެނީ، ހުކުރަށް އަދި އެއްކޮށް ފުރިގެން ދާނީ. ދެން ޒަމާނީ މިސްކިތެއް އެބަ ބޭނުންވޭ. ވަރަށް ކުރީގައި. މީގެ 50 ވަރަކަށް އަހަރު ކުރީގެ މިސްކިތެއް، އަދި އެއަށްވުރެސް ކުރިން އަޅާފައިހުރި މިސްކިތެއް ބޭނުންކުރަމުން މިއަންނަނީ. އެހެންވީމާ، ވަރަށް ބަލާލަން ރީތި، ހިތްގައިމު މަންޒަރަކަށް ވާނެ މިސްކިތް ނިމޭއިރުގައި." މަތިވެރި ކައުންސިލްގެ ރައީސް އިސްމާއީލް އާތިފް

މިހާރު އަންދާޒާ ކުރެވިފައިވަނީ އަންނަ އަހަރުގެ ޖުލައި މަހުގެ ނިޔަލަށް މިސްކިތުގެ މަސައްކަތް އެއްކޮށް ނިންމާލުމަށެވެ. އަދި މިހާރު މަސައްކަތް ކުރިއަށްދާ ސްޕީޑާމެދު ހިތްހަމަޖެހޭކަން ފާހަގަކުރައްވައި، އޭނާ ވަނީ ސަރުކާރުން މިކަމަށް ދެއްވާ އަހައްމިޔަތުކަން ފާހަގަ ކުރައްވާފައެވެ.

"މިހާރު އަންދާޒާކޮށްފައި މިއޮންނަނީ އަންނަ އަހަރު ޖުލައި ހިސާބަށް ނިންމާލަން. ދެން މިހާރު މިދާ ސްޕީޑަށް ބަލާއިރު ހަމަ ހިތްހަމަޖެހޭ. އެހެންވީމާ އެ ތާރީޚަށް ނިންމާލެވޭނެކަމަށް މިބަލަނީ. ދެން އަސްލު ޒަމާނީ މިސްކިތެއް އިންތިހާއަށް ބޭނުންވެފައިވާ ދުވަސްވަރެއްގައި ރައީސް މުޢިއްޒު މިކަން ކޮށްދެއްވާފައި މިއޮތީ އަޅުގަނޑުމެން ރައްޔިތުންނަށް ހެޔޮ އެދިގެން"
މަތިވެރި ކައުންސިލްގެ ރައީސް އިސްމާއީލް އާތިފް

އާބާދީގައި 1،100 އެއްހާ މީހުން ދިރިއުޅޭ މަތިވެރީގައި 500 މީހުންގެ ޖާގައިގެ މިސްކިތެއް އިމާރާތްކުރުމަކީ، އެރަށުގެ ދީނީ އަދި އިޖުތިމާޢީ މާހައުލަށް ބޮޑު ދިރުމެއް ލިބި، އެއް ޖަމާޢަތެއްގައި ނަމާދުކުރުމުގެ ފުރުޞަތު އިތުރަށް ފުޅާވެގެންދާނެ ކަމެކެވެ.

ސަރުކާރުން އަންނަނީ ރާއްޖޭގެ އެކި ސަރަޙައްދުތަކުގައި ގިނަ މިސްކިތްތަކެއް ބިނާކުރުމުގެ މަޝްރޫޢުތައް މިހާރުވެސް ހިންގަމުންނެވެ. މީގެ ތެރޭގައި އަލަށް މަޝްރޫޢުތައް ފެށުމާއި ހުއްޓިފައި ހުރި މަޝްރޫޢުތައް ވެސް ހިމެނެއެވެ.