ސޫރިޔާގެ އައު ސަރުކާރުގެ މަންދޫބުންނާއި ލުބްނާނުގައި ޙަރަކާތްތެރިވާ މުޖާހިދުންގެ ޖަމާޢަތް، ޙިޒްބުﷲ ގެ އިސް ވެރިންނާ ދެމެދު އުފެދިފައިވާ ނުތަނަވަސްކަން ޙައްލުކުރުމުގެ ގޮތުން، ތުރުކީވިލާތުގައި ސިއްރު މަޝްވަރާތަކެއް ބާއްވާފައިވާ ކަމަށް އިތުބާރުހުރި މަސްދަރުތަކުން ހާމަކޮށްފިއެވެ.
މަޢުލޫމާތު އެނގޭ ހަ މަސްދަރެއްގެ އިތުރުން ސޫރިޔާގެ ދެ މަސްޢޫލުވެރިއަކާއި، އެމެރިކާގެ އޮފިޝަލަކު އަދި ލުބްނާނުގެ ދިފާޢީ އިސް ފަރާތަކާ ޙަވާލާދީ ރޮއިޓާސް ނޫހުން ރިޕޯޓުކޮށްފައިވާ ގޮތުގައި، މިދިޔަ މަހު ތުރުކީވިލާތުގައި މި ބައްދަލުވުން ބާއްވާފައިވަނީ އެ ޤައުމުގެ ސަލާމަތީ އަދި ޖާސޫސީ އިދާރާތަކުގެ އިސްނެގުމަށެވެ. މިއީ 2024 ވަނަ އަހަރުގެ ފަހުކޮޅު ސޫރިޔާގެ އޭރުގެ ރައީސް ބައްޝާރު އަލްއަސަދުގެ ވެރިކަން ވެއްޓުމާ ގުޅިގެން، ސޫރިޔާގެ އައު ސަރުކާރާއި ޙިޒްބުﷲ އާދެމެދު އުފެދުނު ނުތަނަވަސްކަމަށްފަހު، ދެފަރާތުން ސީދާ ބައްދަލުކޮށް ވާހަކަދެއްކި ފުރަތަމަ ފަހަރެވެ.
ސޫރިޔާގެ ޖާސޫސީ އަދި ޚާރިޖީ ވުޒާރާގެ އޮފިޝަލުން ބައިވެރިވި މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ ސަރަޙައްދީ ސަލާމަތީ މަސްލަހަތުތަކަށެވެ. މިގޮތުން، ޙިޒްބުﷲ އާދެކޮޅަށް އެއްވެސް ޢަދާވާތްތެރިކަމެއް ނެތް ކަމަށާއި، އެ ޖަމާޢަތުން ހަތިޔާރު ބެހެއްޓުމަށް މަޖުބޫރުކުރުވުމުގެ ނަމުގައި ސޫރިޔާގެ ސިފައިން ލުބްނާނުގެ ސަރަޙައްދަށް ނުވަންނާނެ ކަމުގެ ޔަޤީންކަން ސޫރިޔާގެ ވަފުދުން ވަނީ ދީފައެވެ. އޭގެ ބަދަލުގައި، ސޫރިޔާގެ މަގުން ޤަވާޢިދާ ޚިލާފަށް ހަތިޔާރު އެތެރެކުރުން ހުއްޓުވުމަށާއި، ސޫރިޔާގެ ދެކުނުގައި ޙިޒްބުﷲ ގެ ހަރަކާތްތައް ނިމުމަކަށް ގެނައުމަށް ސޫރިޔާއިން ވަނީ އެދިފައެވެ.
މި މަޝްވަރާތައް އޮމާންކަމާއެކު ކުރިއަށްދިޔަ ނަމަވެސް، އަދި މިހާތަނަށް ރަސްމީ އެއްބަސްވުމަކާ ހަމައަށް ދެވިފައެއް ނުވެއެވެ. އަދި މި ބައްދަލުވުން އިންތިޒާމުކުރުމުގައި ތުރުކީވިލާތުން އިސް ދަޢުރެއް އަދާކުރި ނަމަވެސް، ޙިޒްބުﷲ އަށް އެންމެ ބޮޑަށް ވާގިވެރިވާ އީރާނުން މި ވާހަކަތަކުގައި ސީދާ ބައިވެރިވެފައެއް ނުވެއެވެ.
ލުބްނާނުގެ މަސްދަރުތަކުން ބުނާ ގޮތުގައި، ސޫރިޔާގެ ރައީސް އަޙްމަދު އަލް-ޝަރްޢާ މިވަގުތު އީރާނާއެކު ސީދާ ގުޅުން ބަދަހިކުރަން ބޭނުންނުވުމަކީ އީރާނުގެ ސަރުކާރުން ކަންބޮޑުވާ ކަމެކެވެ.
ނަމަވެސް، މި މަޢުލޫމާތު ހާމަވުމާ ގުޅިގެން ތުރުކީވިލާތާއި ސޫރިޔާގެ ސަރުކާރުން ވަނީ މިފަދަ ބައްދަލުވުމެއް ބޭއްވިކަން ދޮގުކޮށްފައެވެ. ތުރުކީވިލާތުން ނެރުނު ބަޔާނެއްގައި ބުނެފައިވަނީ މިއީ އެއްވެސް ޙަޤީޤަތެއް އަދި އަސާސެއް ނެތް ވާހަކަތަކެއް ކަމަށެވެ. އަދި ސޫރިޔާ ސަރުކާރުގެ ރަސްމީ މީޑިއާއިންވެސް ވަނީ މި ބައްދަލުވުމާ ގުޅޭ ވާހަކަތައް ދޮގުކޮށްފައެވެ.
މީގެއިތުރުން، މި މައްސަލައާ ގުޅޭގޮތުން އެމެރިކާގެ ޚާރިޖީ ވުޒާރާއިންނާއި ޙިޒްބުﷲ ގެ މީޑިއާ އޮފީހުން އެއްވެސް އެއްޗެއް ބުނަން ވަނީ ދެކޮޅު ހަދައިފައެވެ.