ބަނގްލަދޭޝް ހަ ވިކެޓުން ބަލިކޮށް އޭޝިއަން ގޭމްސް ކްރިކެޓް މުބާރާތުގެ ފައިނަލަށް ޕާކިސްތާން ދަތުރު ކޮށްފި އެވެ.
ޖަޕާނުގައި މިހާރު ކުރިއަށްދާ ގޭމްސްގެ ފައިނަލުގެ ފުރަތަމަ ފުރުސަތު ޕާކިސްތާން ކަށަވަރު ކުރީ އެންމެ 11 އޯވަރު އޯވަރު ތެރޭގައި މެޗު ނިންމާލައިގެންނެވެ.
މި މެޗުގައި ފުރަތަމަ ކުޅެން ނުކުތީ ބަނގަލްދޭޝް އެވެ. 13 އޯވަރުގެ ތެރޭގައި ބަނގްލަދޭޝްގެ ހަތް ކުޅުންތެރިން ނުބައިވެގެން ހެދުނީ 111 ލަނޑެވެ. އެންމެ ރަނގަޅަށް ކުޅުނީ 42 ލަނޑު ހެދި ތައުހީދު ހިރިޑޯއީ އެވެ. އޭނާގެ އިތުރުން ސާއިފް ހަސްން 17 ލަނޑު އަދި މުސާޑެކެ ހުސައިން 11 ލަނޑު ހެދި އެވެ.
ޖަވާބުގައި ކުޅެން ނުކުމެ ޕާކިސްތާން މެޗު ކާމިޔާބު ކުރީ 11.3 އޯވަރުންނެވެ. އެންމެ ރަނގަޅަށް ކުޅުނީ ނުބައިނުވެ 30 ލަނޑު ހެދި އަބްދުއް ސަމަދާއި 27 ލަނޑު ހެދި ހަސަން ނަވާޒެވެ.
މި މެޗުގައި ޕާކިސްތާނުން އެންމެ ރަނގަޅަށް އުކާފައިވަނީ ސުފިޔާން މޯގިމް އެވެ. އޭނާ ވަނީ ތިން ވިކެޓް ނަގައިފަ އެވެ. އަދި އަޝްރަފް މިންހާސް ވެސް ދެ ވިކެޓް ނެގި އެވެ. ބަނގްލަދޭޝްގެ ހަތަރު ކުޅުންތެރިއަކު ވަނީ ވިކެޓް ނަގާފަ އެވެ. އެއީ މަހެދީ ހަސަން އާއި ނަސޫމް އަހުމަދާއި މުސްތަފިޒުއް ރަހުމާން އާއި ރިޝާދު ހޮސައިން އެވެ. މިއިން ކޮންމެ ކުޅުންތެރިއަކު މަދުވެގެން ދެއޯވަރު އުކާފައިވެ އެވެ.
މި މުބާރާތުގެ ފައިނަލުގައި ޕާކިސްތާނާ ދެކޮޅަށް ނުކުންނާނީ އިންޑިއާ އާއި ސްރީލަންކާ ކުރެ ޓީމެކެވެ.
ޖަޕާނަށް ވިއްސާރަވެ ބޯކޮށް ވާރެ ވެހުމުގެ ސަބަބުން އޭޝިއަން ގޭމްސް ކްރިކެޓް މުބާރާތުގެ ސެމީ ފައިނަލަށް ހޮވީ މުބާރާތުގެ އެންމެ ގަދަ ހަތަރު ޓީމެވެ. އެއީ މި މުބާރާތުގެ ގަވާއިދު ބުނާ ގޮތުން މެޗެއް ނުކުޅެ ހުއްޓާލަން ޖެހޭ ފަދަ ހާލަތެއް މެދުވެރިވެއްޖެނަމަ މުބާރާތުގެ ކުރިއަށް އޮންނަ ބުރަށް ދާނީ އޭސީސީގެ ރޭންކިންގެ ކުރީގައިވާ ގައުމު ކަމަށްވާތީ އެވެ. މި ގޮތުގެ މަތީން ސެމީ ފައިނަލަށް އިންޑިއާ އާއި ޕާކިސްތާން އަދި ބަންގްލަދޭޝް އާއި ސްރީލަންކާ ހޮވިއިރު މިއީ ދުނިޔޭގެ ކްރިކެޓްގައި ވެސް އެންމެ ގަދަ ގައުމުތަކުގެ ތެރޭގައި ހިމެނޭ ހަތަރު ގައުމެވެ.