ކުޅުނު ދެމެޗުން ވެސް ބަލިވެ ވަރުގަދަ އޭދަފުށީގެ ދަތުރަށް ނިމުމެއް

އެފްއޭއެމް ޒޯން ފުޓްސަލް ޗެމްޕިއަންޝިޕުގައި ނޯތު ޒޯން 2ގައި ބ. އޭދަފުށިން ކުޅުނު ދެމެޗުން ވެސް ބަލިވެ އެޓީމަށް މުބާރާތް ނިމިއްޖެއެވެ.

ޒޯން ފުޓްސަލް ޗެމްޕިއަންޝިޕުގެ ޖާގައެއް އޭދަފުށިން ހޯދީ އެޓޯލް ފުޓްސަލް ޗެމްޕިއަންޝިޕުގައި ބ. އަތޮޅުގެ ޗެމްޕިއަންކަން ހޯދައިގެންނެވެ.

އަތޮޅު ޗެމްޕިއަނުންގެ ގޮތުގައި ޒޯން ބުރުން ޖާގަ ހޯދި އޭދަފުއްޓަށް ޒޯން ބުރުގައި ފުރަތަމަ މެޗުގައި ނުކުންނަން ޖެހުނީ ރ. ދުވާފަރާ ދެކޮޅަށެވެ. އެމެޗުން އޭދަފުށި ބަލިވީ 1-2 އިންނެވެ.

މުބާރާތުގައި ކުޅުނު ދެވަނަ މެޗުގައި އޭދަފުށި ނުކުތީ ނ. މަގޫދޫއާ ދެކޮޅަށެވެ. މި މެޗުން ވެސް އޭދަފުށި ބަލިވީ 1-2 ގެ ނަތީޖާއަކުންނެވެ.

ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑުނެގީވެސް މަގޫދޫއިންނެވެ. މެޗު ފަށައިގެން ހަތަރުވަނަ މިނެޓުގައި މިލަނޑު އެޓީމަށް ކާމިޔާބުކޮށްދިނީ މުޙައްމަދު އިހުޝާނެވެ.

އެއް ލަނޑުގެ ލީޑެއްގައި އޮވެ މަގޫދޫއިން ފުރަތަމަ ހާފު ނިންމާލިއިރު ދެވަނަ ހާފު ފަށައިގެން ދެމިނެޓުގެ ތެރޭގައި އޭދަފުށިން ލަނޑެއްޖަހައި ނަތީޖާ ހަމަހަމަ ކުރިއެވެ. މިލަނޑު އެޓީމަށް ކާމިޔާބުކޮށްދިނީ އަޙްމަދު ބައްސާމް މުޙައްމަދު ނައީމެވެ.

މެޗުން މަގޫދޫ މޮޅުކޮށްދިން ލަނޑު އަދި އެފްއޭއެމް ޒޯން ޗެމްޕިއަންޝިޕުގެ ނޯތު ޒޯން2 ސެމީގެ ޖާގައެއް މަގޫދޫއަށް ހޯދައިދިން ލަނޑު، ދެވަނަ ހާފުގެ އިތުރުވަގުތުގެ ތެރޭގައި ކާމިޔާބުކޮށްދިނީ މުޙައްމަދު އައްޒާމެވެ.

މި މޮޅާއެކު ލިބުނު ތިން ޕޮއިންޓާއެކު މަގޫދޫއަށް މި ޒޯނުގެ ސެމީގެ ޖާގައެއް ކަށަވަރުވިއިރު އޭދަފުށްޓަށް ވަނީ މުބާރާތުގައި ކުރިއަށް ދިއުމުގެ ފުރުސަތު އެއްކޮށް ބަންދުވެފައެވެ. އޭދަފުށި، މަގޫދޫ އަދި ދުވާފަރު ހިމެނޭ މި ގުރޫޕުގައި ބާކީ ދެން އޮންނާނީ ގުރޫޕުގެ އެއްވަނަ ކަނޑައަޅާ މެޗެވެ. އެމެޗުގައި ބައްދަލުކުރާނީ ދުވާފަރާއި މަގޫދޫއެވެ.

ނޯތު ޒޯން2 ގައި ދެ ގުރޫޕު ހިމެނޭއިރު ގްރޫޕް އޭގައި ހިމެނެނީ ނ. މަނަދޫ، ރ. އިނގުރައިދޫ، ބ. ތުޅާދޫ އަދި ޅ. ހިންނަވަރެވެ.

މި ޒޯނުގެ ސެމީ ފައިނަލް މެޗުތައް ކުޅޭނީ އަންނަ މަހުގެ ތިންވަނަ ދުވަހުއެވެ.