އަމާޒަކަށްވާންވީ ދުނިޔޭގެ އެންމެ ރައްކާތެރި މަންޒިލަށް ރާއްޖެ ހެދުމަށް: ވަޒީރު އިޙްސާން

ސޭފްޓީ އެންޑް ސެކިޔުރިޓީ ދާއިރާގެ އެންމެންގެ އަޒުމަކަށްވާންވީ ދުނިޔޭގެ އެންމެ ރައްކާތެރި ޤައުމަށް ދިވެހިރާއްޖެ ހެދުން ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ މޯލްޑިވްސް އެސޯސިއޭޝަން އޮފް، ފަޔަރ، ސޭފްޓީ އެންޑް ސެކިޔުރިޓީ އިންޑަސްޓްރީ، މަފްސީން އިންތިޒާމްކޮށްގެން ދެ ދުވަހުގެ މުއްދަތަށް ކުރިއަށްގެންދާ ސޭފްޓީ އެންޑް ސެކިޔުރިޓީ ކޮންފަރެންސް ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅޔދައްކަވަމުންނެވެ.

ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ ދުނިޔޭގެ އެންމެ މަޤުބޫލު މަންޒިލްގެ ގޮތުގައި ރާއްޖެވެފައިވާއިރު ރާއްޖެ އަންނަ މެހެމާނުންގެ ރައްކާތެރިކަން އެންމެ ފުރިހަމައަށް ކަށަވަރުވެފައި އޮތުމަކީވެސް މުހިންމު ކަމެއް ކަމަށެވެ. އެ ރައްކާތެރިކަން ކަށަވަރުކުރެވޭނީ ސަރުކާރުގެ މުއައްސަސާތަކާއި ފަތުރުވެރިކަމާއި ސެކިޔުރިޓީ ދާއިރާގެ އަމިއްލަ ފަރާތްތައް ގުޅިގެން ކުރާ މަސައްކަތުން ކަމަށް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ފަތުރުވެރިކަމުގެ ދާއިރާގައި އާންމުކޮށް ފެންނަ ކުށްތަކުގެ އިތުރުން އަލިފާނާއި ކަނޑުމަތީގެ ހާދިސާތަކާއި ގުދުރަތީ ކާރިސާތަކާއި ސައިބަރ އެޓޭކްތަކާއި އޮންލައިންކޮށް ހިންގާ ފްރޯޑް އަމަލުތަކާއި މަސްތުވާތަކެއްޗާ ގުޅުންހުރި މައްސަލަތަކާއި އާންމު ސިއްޙަތާ ގުޅުންހުރި ކަންކަމަކީވެސް ޚާއްސަ ސަމާލުކަމެއް ދޭންޖެހޭ ކަންކަންކަމަށެވެ. އަދި ރާއްޖެފަދަ ކުޑަ ޖަޒީރާ ޤައުމެއްގައި ދުނިޔޭގެ އެކި ކަންކޮޅުތަކުގައި ފެތުރެމުން އަންނަ ކަންކަން ފެތުރިގެންދިއުމުގެ ފުރުސަތު ބޮޑު ކަމަށާއި އެހެންވެ ކަމެއް ވުމުގެ ކުރިން އެކަމެއް ހުއްޓުވުމަށް ތައްޔާރުވެފައި ތިބުމަކީ މުހިންމު ކަމެއް ކަމަށް ވަޒީރު ވިދާޅުވިއެވެ.

ރައްކާތެރި އަދި ވިލުންތެރި މަންޒިލެއްގެ ގޮތުގައި ރާއްޖެ އޮންނަންޖެހޭކަން ފާހަގަކުރައްވައި ވަޒީރު ވިދާޅުވީ އެކަން ހާސިލްކުރެވޭނީ ހަރުދަނާ ސިޔާސަތުތަކާއި ތަމްރީނުތަކާއި އިންވެސްޓްމަންޓާއި ޓެކްނޮލޮޖީއާއި އެކި މުވައްސަސާތައް ގުޅިގެން ކުރާ މަސައްކަތުން ކަމަށެވެ. މިކަމުގައި ފަތުރުވެރިކަމުގެ ދާއިރާގެ ފަރާތްތަކަށް ސަރުކާރުގެ ފުރިހަމަ އެއްބާރުލުން ލިބޭނެކަކުގެ ޔަޤީންކަންވެސް ވަޒީރު ދެއްވިއެވެ.

"ރައްކާތެރި މަންޒިލެއްގައި މަސައްކަތް ކުރާނީ މިއަދު ދިމާވާ ކަންކަމަށް ހައްލު ހޯދަން ނަމަވެސް ވިލުންތެރި މަންޒިލެއްގައި މަސައްކަތް ކުރާނީ މުސްތަޤުބަލަށް ވިސްނައިގެން. އެހެންވީމަ ރައްކާތެރި އަދި ވިލުންތެރި މަންޒިލެއްގައި ހަރުދަނާ ސޭފްޓީ އެންޑް ސެކިއުރިޓީ ސިޔާސަތުތަކެއް ގެންގުޅުމަކީ މުހިންމު ކަމެއް. މިކަމުގައި ސަރުކާރުގެ ފުރިހަމަ އެއްބާރުލުން ލިބޭނެ. ސަރުކާރާއި ދާއިރާގެ އެންމެން ގުޅިގެން މަސައްކަތް ކުރަންވާނީ ހިރާސްތައް ކުޑަކޮށް، ދުރާލައި ތައްޔާރުވެ ތިބުމާއި ފުރާނަ ސަލާމަތްކުރުމާއެކު ރައްޖެއަކީ ރައްކާތެރި މަންޒިލެއްކަމުގެ އިހުސާސް ފަތުރުވެރިންނަށް ކޮށްދިނުމަށް،" ވަޒީރު ޢަލީ އިޙްސާން ވިދާޅުވިއެވެ.

މޯލްޑިވްސް އެސޯސިއޭޝަން އޮފް ފަޔަރ، ސޭފްޓީ އެންޑް ސެކިޔުރިޓީ އިންޑަސްޓްރީ، މަފްސީން އިންތިޒާމްކޮށްގެން ކުރިއަށްގެންދާ ސޭފްޓީ އެންޑް ސެކިޔުރިޓީ ކޮންފަރެންސަކީ ދައުލަތުގެ އެކި މުއައްސަސާތަކާއި ފަތުރުވެރިކަމުގެ ދާއިރާގެ އެކި ކުންފުނިތަކާއި ސެކިޔުރިޓީ ދާއިރާގެ އެކި ފަރާތްތައް ގުޅިގެން މަސައްކަތް ކުރާނެ ގޮތްތައް ދެނެގަނެ، މަޝްވަރާއާއި ޚިޔާލު ބަދަލުކުރުމަށް ކުރިއަށްގެންދާ ކޮންފަރެންސެކެވެ. މިއީ ރާއްޖޭގެ ފަތުރުވެރިކަމުގެ ދާއިރާއަށް ޚާއްސަކޮށްގެން ރާއްޖޭގައި ކުރިއަށްގެންދާ މިފަދަ ފުރަތަމަ ކޮންފަރެންސެވެ.

ދެ ދުވަހުގެ މުއްދަތަށް ކުރިއަށްގެންދާ މި ކޮންފަރެންސްގައި ރާއްޖެއާއި ރާއްޖެއިން ބޭރުގެ ތަޖުރިބާކާރުން ސެޝަންތައް ނަގައިދެއެވެ.