ރޮބާޓޯ މަންޗީނީ އިޓަލީގެ ކޯޗު ކަމާއި ދެވަނަ ފަހަރަށް ހަވާލުވިފަހުން ފުރަތަމަ ފަހަރަށް މެޗަކުން މޮޅުވެއްޖެއެވެ.
ނޭޝަންސް ލީގުގެ ގްރޫޕް އެކެއްގައި ރޭ ތުރުކީ އާއި ދެކޮޅަށް ކުޅުނު މެޗުން އިޓަލީ މޮޅުވެފައިވަނީ 4-1 ގެ ނަތީޖާއަކުންނެވެ.
ތުރުކީގައި ކުޅުނު މި މެޗަށް އިޓަލީ ނިކުތްއިރު މިއީ މަންޗީނީ އިޓަލީގެ ކޯޗު ކަމާއި ދެވަނަ ފަހަރަށް ހަވާލުވިފަހުން އެ ޓީމު ކުޅޭ ދެވަނަ މެޗެވެ. ފުރަތަމަ މެޗުގައި އަމިއްލަ ގައުމުގައި ބެލްޖިއަމް އަތުންވަނީ ބަލިވެފައެވެ.
މަންޗީނީ ވަނީ 2018 އިން 2023 ގެ ނިޔަލަށް އިޓަލީގެ ގައުމީ ޓީމަށް ކޯޗު ކޮށްދީ 2020 ވަނަ އަހަރުގެ ޔޫރީ ފުޓްބޯޅަ މުބާރާތުގެ ޗެމްޕިއަންކަން އިޓަލީއަށް ހޯދަދީފައެވެ.
ރަށުން ބޭރުގައި ތުރުކީ އާއި ދެކޮޅަށް ކުޅުނު މި މެޗުގެ 9 ވަނަ މިނިޓުގައި އިޓަލީގެ އަލެސަންދްރޯ ބަސްޓޯނީ ވަނީ ލަނޑެއް ޖަހާ އެޓީމަށް ކުރި ހޯދަދީފައެވެ.
އިޓަލީއިން މި މެޗުގައި ދެވަނަ ލަނޑެއް ޖަހާ ލީޑު ފުޅާކޮށްފައިވަނީ މެޗުގެ 22 ވަނަ މިނިޓުގައި ޑޭވިޑް ފްރަޓޭސީ ކާމިޔާބުކޮށްދިން ލަނޑުންނެވެ. އަދި އޭގެ ފަސް މިނިޓު ފަހުން ޑިފެންޑަރ މައިކަލް ކަޔޯޑޭ ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފައެވެ. މިއީ އިޓަލީގެ ގައުމީ ޓީމަށް ކަޔޯޑޭ ކުޅުނު ފުރަތަމަ މެޗެވެ.
މެޗުގެ ދެވަނަ ހާފަށް ނިކުތްއިރު 3-0 ގެ ނަތީޖާއަކުން އިޓަލީ ކުރީގައި އޮތް ނަމަވެސް ދެވަނަ ހާފުގެ ކުޅުން ފެށުނުތާ 2 ވަނަ މިނިޓުގައި ތުރުކީއިން ވަނީ ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ބަރިސް އަލްޕާ ޔިލްމާޒް އެވެ.
ނަމަވެސް އޭގެ 3 މިނިޓު ފަހުން އިޓަލީގެ ޕިއޯ އެސްޕޮސީތޯ ވަނީ އިތުރު ލަނޑެއް ޖަހާ މެޗުގެ ނަތީޖާ 4-1 އަށް ބަދަލުކޮށްފައެވެ.
މި މެޗުން އިޓަލީ މޮޅުވުމާއިއެކު އެ ޓީމަށް ވަނީ ގްރޫޕްގައި މިހާތަނަށް ކުޅުނު 2 މެޗުން ލިބިފައިވާ 3 ޕޮއިންޓާއެކު ގްރޫޕްގެ ތިންވަނަ މަގާމް ލިބިފައެވެ.