ނަފްސާނީ އެހީއާ ބެހޭ ހެލްޕްލައިނަށް މިހާތަނަށް 23،000 ކޯލު

ނަފްސާނީ އެހީއަށް ޚާއްސަކޮށް ސަރުކާރުން ތަޢާރަފުކުރި ހެލްޕްލައިނަށް، މިހާތަނަށް 23،000އަށްވުރެ ގިނަ މީހުން ގުޅާ އެހީތެރިކަން ހޯދާފައިވާކަމަށް ސިއްޙަތާ އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ އަލީ ވިދާޅުވެއްޖެއެވެ.

ނަފްސާނީ މައްސަލަތަކާއި ގުޅިގެން އެހީތެރިކަން ފޯރުކޮށްދިނުމަށް ޚާއްސަ ހެލްޕްލައިން "1677" ތަޢާރަފުކުރީ 2024ވަނަ އަހަރުގެ 21 ވަނަ ދުވަހުއެވެ.

ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމްގައި ވާހަކަދައްކަވަމުން ސިއްޙާތާ ބެހޭ ވަޒީރު ޤީލާ އަލީ ވިދާޅުވީ، ހެލްޕްލައިން މެދުވެރިކޮށް، ނަފްސާނީ އެހީތެރިކަމާ ގުޅޭ އެކިއެކި ކަންކަމުގައި މިހާތަނަށް 23،000އަށްވުރެ ގިނަ މީހުން ހެލްޕްލައިންއަށް ގުޅާފައިވާކަމަށެވެ. މި ހެލްޕްލައިންގެ އެހީ ހޯދާ މީހުންގެ މަޢުލޫމާތަކީ، ޒާތީ މަޢުލޫމާތު ހާމަނުވާނެހެން ރައްކާތެރިކަމާއެކު ބެލެހެއްޓޭ މަޢުލޫމާތެވެ.

ނަފްސާނީ ދުޅަހެޔޮކަމާ ގުޅޭ ކަންކަމަކީ ބޮޑު ކަންބޮޑުވުމެއް އޮތް ކަމަކަށްވާއިރު، ނަފްސާނީ ބަލީގެ ފަރުވާގެ ނިޒާމު ތަރައްޤީކުރުމަކީ ސަރުކާރުން މުހިންމު އަހަންމިއްޔަތުކަމެއްދޭ ކަމެއްކަމަށް ވިދާޅުވިއެވެ. އެގޮތުން ޤާއިމުކުރި ހެލްތްލައިންއަކީ މިދާއިރާގެ ކަންބޮޑުވުންތައް އަހާ، ޙައްލު ހޯދުމަށް މަސައްކަތްކުރުމަށް ރައްޔިތުންނާއި ސަރުކާރާ ދެމެދު އެޅުނު ފާލަމެއްކަމަށެވެ.

މީގެ ޒަރިއްޔާއިން ހުށައަޅާ ކަންކަމާއި، އެއްކުރާ މަޢުލޫމާތުގެ ސަބަބުން، ރާއްޖޭގައި ނަފްސާނީ ބަލީގެ ހާލަތު އޮތްގޮތަށާއި، ސިއްޙީ ނިޒާމުގައި ހުރި ގޮންޖެހުންތަކާއި، އަދި މި ނިޒާމަށް އިތުރަށް ގެންނަންޖެހޭ ބަދަލުތައް ވަރަށް ރަނގަޅަށް ހާމަވާކަމަށެވެ.

މިހާތަނަށް މި ދާއިރާއިން ހެދިފަވާ ރަސްމީ ދިރާސާއެއް ނެތް ނަމަވެސް، މި އެއްކުރާ މަޢުލުމާތަކީ ސިޔާސަތުތައް ކަނޑައެޅުމަށް ލިބޭ ބޮޑު އެހީތެރިކަމެއްކަމަށް ވަޒީރު ވިދާޅުވިއެވެ.

"ހެލްޕްލައިންއަށް 23،000އަށްވުރެ ގިނަ ކޯލް ލިބިފަވޭ. މި ހެލްޕްލައިންއަށް އަންނަ ކޯލްތަކާއި، ޑޮކްޓަރުންނާއި ކައުންސިލަރުންގެ ފަރާތުން ލިބޭ މައުލޫމާތުން މި މަންޒަރު ސާފުވޭ. ނަމަވެސް ސަރުކާރުން ކުރިއަށްގެންދާ މިކްސްޑް ސަރވޭގައި މި ދާއިރާއިން އިތުރަށް ދިރާސާތައް ގެންނާނެ." ވަޒީރު ޤީލާ ވިދާޅުވިއެވެ.

ވަޒީރު ވިދާޅުވީ މިކްސްޑް ސަރވޭގައި ލިބޭ މަޢުލޫމާތަށް ރިއާޔަތްކޮށް، އިތުރަށް މި ދާއިރާގެ ޚިދުމަތްތައް އިތުރަށް ކުރިއަރުވަން މަސައްކަތްކުރާނެކަމަށެވެ.

ނަފްސާނީ ބަލީގެ ފަރުވާ ފުޅާކުރުމަށް އެކަމަށް އިންސާނީ ވަސީލަތް ތަރައްޤީކުރުމާއި އަދި މި ޚިދުމަތް އަތޮޅުތަކަށް ފުޅާކުރުމަށްވެސް ޚާއްސަ ސިޔާސަތުތައް އެކުލަވާލާ ދަނީ މަސައްކަތް ކުރަމުންނެވެ.