ރާއްޖޭގެ ފަތުރުވެރިކަމުގެ ދާއިރާ އިތުރަށް ޕްރޮމޯޓް ކުރުމަށް އަމާޒުކޮށްގެން ނެރޭ "އޮފިޝަލް މޯލްޑިވްސް އެކޮމޮޑޭޝަން ގައިޑް" ރަސްމީކޮށް ލޯންޗްކޮށްފިއެވެ.
"އޮފިޝަލް މޯލްޑިވްސް އެކޮމޮޑޭޝަން ގައިޑް" ރަސްމީކޮށް ލޯންޗްކޮށްދެއްވާ، މިފޮތުގެ ފުރަތަމަ ޢަދަދު ނެރެދެއްވީ، އެމް.އެމް.ޕީ.އާރ.ސީގެ އެކްޓިންގ މެނޭޖިންގ ޑިރެކްޓަރ ހާރިސް މުހައްމަދުއެވެ.
"މޯލްޑިވްސް އެކޮމޮޑޭޝަން ގައިޑް" ރަސްމީކޮށް ލޯންޗްކޮށް، މިފޮތުގެ ފުރަތަމަ ޢަދަދު ނެރެފައިވަނީ އިނގިރޭސިވިލާތުގެ ލަންޑަނުގައި މިހާރު ކުރިއަށްދާ ޑަބްލިޔު.ޓީ.އެމް ފެއަރގައެވެ. ރާއްޖޭގެ ފަތުރުވެރިކަމުގެ ދާއިރާ އިތުރަށް ޕްރޮމޯޓްކުރުމުގެ މަޤުޞަދުގައި ނެރޭ މިފޮތަކީ ފީލް އިންވެސްޓްމަންޓް ޕްރައިވެޓް ލިމިޑެޓްގެ ފަރާތުން އަހަރަކު އެއްފަހަރު ނެރުމަށް ހަމަޖެހިފައިވާ ފޮތެކެވެ. މިފޮތާއި ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތު ދެއްވަމުން ފީލް އިންވެސްޓްމަންޓް ޕްރައިވެޓް ލިމިޑެޓްގެ ޑައިރެކްޓަރ އައިޝަތު އަލްމާސް ވިދާޅުވީ މިއީ އެކުންފުނިން މިފަދަގޮތަކަށް ތައްޔާރުކުރި ފުރަތަމަ ފޮތް ކަމަށެވެ. އެގޮތުން މިފޮތުގައި ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ރިސޯޓްތަކާއި، ގެސްޓް ހައުސްތަކާއި، ސަފާރީތަކާއި ގުޅޭ ގިނަ މަޢުލޫމާތުތަކެއް މިފޮތުން ލިބެން ހުންނާނެ ކަމަށެވެ.
"މޯލްޑިވްސް އެކަމަޑޭޝަން ގައިޑް"ގެ މޯބައިލް އެޕްލިކޭޝަން މިއަހަރުގެ ޑިސެމްބަރުމަހު ލޯންޗްކުރުމަށް ހަމަޖެހިފައިވާ ކަމަށް އަލްމާސް ވިދާޅުވިއެވެ. ހަމައެހެންމެ "ފީލް ޑެސްޓިނޭޝަން"ގެ ނަމުގައި އިންޓަރނޭޝަނަލް އެކްސްޕޯއެއް އަންނަ އަހަރު ބޭއްވުމަށް މިހާރު ތައްޔާރުވަމުން އަންނަ ކަމަށެވެ.
"މޯލްޑިވްސް އެކަމަޑޭޝަން ގައިޑް"ގެ ފުރަތަމަ ޢަދަދު މިހާރު ލޯންޗްކޮށްފައިވާއިރު، މި މަސައްކަތް ކުރުމަށް ގާތްގަނޑަކަށް 4 މަސްދުވަސް ހޭދަވިކަމަށް ފީލް އިންވެސްޓްމަންޓުން މަޢުލޫމާތުދެއެވެ. މިފޮތް ރާއްޖޭގެ ފަރާތުން ބައިވެރިވާ ހުރިހާ ފެއަރއެއްގައިވެސް ބޭނުންކުރުމަށް ވަނީ ހަމަޖެހިފައެވެ.