ޖަރުމަނުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރަކީ މާކް އަންދްރޭ ޓާސްޓެގަން ކަމަށް ގައުމީ ކޯޗު ޔާގެން ކްލޮޕް ނިންމައިފި އެވެ.
ގައުމީ ޓީމަށް އަލަށް ހަވާލުވި ތަޖުރިބާކާރު ކޯޗު މި ގޮތަށް ނިންމީ އަނިޔާގެ ސަބަބުން ޓާސްޓެގަން އަށް ބޮޑު ދެ މުބާރާތް ގެއްލި އަލުން ގައުމީ ޓީމުގެ އަންގި ނުލިބދާނެ ކަމަށް ބެލެވިފައިވަނިކޮށެވެ.
ނަމަވެސް ބޮރޫޝިޔާ ޑޯޓްމުންޑާއި ލިވަޕޫލްގެ ކުރީގެ ކޯޗު ބުނީ އުމުރުން މިހާރު 34 އަހަރުގެ ޓާސްޓެގަން އަކީ ދުނިޔޭގެ ފެންވަރުގެ ކީޕަރެއް ކަމަށާއި އޭނާ ވަށައިގެން ޒުވާން ކުޅުންތެރިން ބޭތިއްބިދާނެ ކަމަށެވެ.
"މި ވަގުތު އެއްވަނަ ކީޕަރަކީ ޓާސްޓެގަން. މި ޓީމަށް ބޭނުންވޭ މައިބަދަތަކަކާއި ހަމަޖެހުން. އޭގެ ފަހުން މިފަދަ ކުޅުންތެރިން ވަށައިގެން ޒުވާން ކުޅުންތެރިން ބޭތިއްބިދާނެ. ދުނިޔޭގެ އެންމެ މޮޅު ކީޕަރުގެ ގޮތުގައި މެނުއަލް ނޯޔާ އެތައް އަހަރަކު ހުރެފި. ހަމަމިއާއެކު އެންމެނަށް ވެސް އެނގޭ ޓާސްޓެގަން އަކީ ދުނިޔޭގެ ފެންވަރުގެ ކީޕަރެއްކަން. ދެން ނަސީބު ދެރަ ވަގުތެއްގައި އޭނާ އަށް އަނިޔާވީ. މިވަގުތު އޭނާ އެހުރީ ފިޓްކޮށް އަދި އޭނާގެ ކުރީގެ ފޯމުގައި. އޭނާ މި ޓީމަށް ތަޖުރިބާ ގެނެސްދޭނެ. އޭނާ މި ޓީމަށް ރޫހު ގެނެސްދޭނެ. ހުރިހާ ކަމެއް ވެސް ބިނާވާނީ ކުޅުންތެރިޔާ ދައްކާ ކުޅުމަށް،" ކްލޮޕް ބުންޏެވެ.
ޓާސްޓެގަން އަށް އަނިޔާވުމުން ކުރީގެ ކޯޗު ހޫލިއަން ނާގެލްސްމަންގެ ކޯޗުކަމުގައި ގައުމީ ކީޕަރުކަން ކުރީ އޮލިވަރ ބައުމަން އެވެ. ނަމަވެސް އޭނާގެ ބަދަލުގައި މިދިޔަ ޖުލައި މަހު ނިމުނު ވޯލްޑް ކަޕަށް ނާގެލްސްމަން ގެންދިޔައީ ރިޓަޔާ ކޮށްގެން ހުރި 41 އަހަރުގެ ކީޕަރު ނޯޔާ އެވެ. އޭނާ ވަނީ އަނެއްކާ ވެސް ގައުމީ ޓީމުން ރިޓަޔާ ކޮށްފަ އެވެ. ޓާސްޓެގަން އަށް އެއްވަނަ ކީޕަރުކަން ދިންއިރު ކްލޮޕް ވަނީ ސްކޮޑުން ބައުމަން އަށް ޖާގަ ނުދީފަ އެވެ.
ޓާސްޓެގަން މިހާރު ކުޅެމުންދަނީ ލޯނު އެއްބަސްވުމެއްގެ ދަށުން ނެދަލޭންޑްސްގެ އަޔެލްސް އަށެވެ. އެއީ އޭނާގެ އަސްލު ކުލަބު ސްޕޭނުގެ ބާސެލޯނާގައި ހުއްޓާ މީގެ ދެ އަހަރު ކުރިން ދިމާވި އަނިޔާގެ ސަބަބުން ފުރަތަމަ 11އިން ޖާގަ ގެއްލުމުންނެވެ.