ހުޅުމާލޭގައި ތަރައްޤީކުރާ ޔޫތް ޕާކްގައި ހިމެނޭ ވޮލީ ކޯޓާއި ފުޓްސަލް ދަނޑު މި މަސްތެރޭގައި ހުޅުވުމަށް މަސައްކަތް ކުރަމުންދާކަމަށް ހައުސިންގ ޑިވެލޮޕްމަންޓް ކޯޕޮރޭޝަން އެޗް.ޑީ.ސީން އިން ބުނެފިއެވެ.
ސަރުކާރުން ހުޅުމާލެ ތަރައްޤީ ކުރައްވަމުން ދަނީ ޒުވާނުންނަށް އަމާޒު ކުރައްވައިގެން ޒުވާނުންނަށް އެކަށޭނެ ފުރުޞަތުތަކަކާއެކުގައެވެ. މިގޮތުން ޒުވާނުންނަށް ޒަމާނީ ސްމާޓް ސިޓީއެއްގެ ގޮތުގައި ހުޅުމާލެ ތަރައްޤީ ކުރެވިގެންދާނީ ޒުވަނުންނަށް ބޭނުންވާނެ ރެކްރިއޭޝަނަލް ވަޞީލަތްތަކާއި އެކުގައެވެ. ޔޫތް ސިޓީ ތަރައްޤީ ކުރެއްވުމުގެ ފުރަތަމަ ފިޔަވަހީގެ ދަށުން އެކުއަޓިކް ސެންޓަރ، ޔޫތް ޕާކް، ވޯޓަރ ޕާކް، މިއުޒިކް އެންޑް އާޓް އިންސްޓިޓިއުޓް، ފުޓްބޯޅަ ސްޓޭޑިއަމް އަދި ސްޕޯޓްސް އެރީނާއެއް ތަރައްޤީ ކުރެއްވުމަށް ވަނީ ހަމަޖެހިފައެވެ. img:http://s1.psmnews.mv/images/660x400/14784268580273.jpg|ހުޅުމާލޭގައި ތަރައްޤީ ކުރައްވާ ޔޫތު ޕާކުގެ މަސައްކަތް - ފޮޓޯ: ޕީއެސްއެމް
ޕީ.އެސް.އެމްއަށް ދެއްވި އިންޓަރވިއުއެއްގައި ހައުސިންގ ޑިވެލޮޕްމަންޓް ކޯޕޮރޭޝަން އެޗް.ޑީ.ސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވީ ހުޅުމާލޭގެ ޔޫތް ޕާކް ތަރައްޤީ ކުރެވިގެންދާނީ އެތަނުގައި ތަފާތު އެކި ވަޞީލަތްތަކާއި އެކުގައި ކަމަށެވެ. މިގޮތުން ތަރައްޤީކުރަމުންދާ ވޮލީ ކޯޓާއި ފުޓްސަލް ދަނޑުގެ މަސައްކަތް ނިމިފައިވާ ކަމަށާއި، މިމަސްތެރޭގައި އެތަން ހުޅުވުމަށް މަސައްކަތް ކުރަމުންދާކަމަށް ސައިމަން ވިދާޅުވިއެވެ.
މީގެ އިތުރަށް ޔޫތް ޕާކްގެ ބޮޑުބައެއްގެ ގޮތުގައި ސްކޭޓްކުރުމަށް ޚާއްސަ އޭރިއާއެއް ކަނޑައެޅިގެންދާނެ ކަމަށް ސައިމަން ވިދާޅުވިއެވެ. ސައިމަން ވިދާޅުވީ ސްކޭޓް ޕާކެއްގެ ގޮތުގައި އެތަން ތަރައްޤީ ކުރެވިގެންދާނީ އިންޓަރނޭޝަނަލް އެތްލީޓުންނަށް ބޭނުންކުރެވޭ ފެންވަރުގެ ތަނެއްގެ ގޮތުގައި ކަމަށާއި، އެހެންކަމުން އެތަނުގެ ޑިޒައިނިންގ، ބައިނަލްއަޤްވާމީ މިންގަޑަށް ފެތޭގޮތަށް ޑިޒައިންކޮށްގެން ގެންނަންޖެހޭ ބަދަލުތައް ގެނައުމުގެ މަސައްކަތް ކުރަމުންދާ ކަމަށް ސައިމަން ވިދާޅުވިއެވެ. img:http://s4.psmnews.mv/images/660x400/14784268884978.jpg|ހުޅުމާލޭގައި ތަރައްޤީ ކުރައްވާ ޔޫތު ޕާކުގެ މަސައްކަތް - ފޮޓޯ: ޕީއެސްއެމް
ހުޅުމާލޭގައި ޒުވާނުންނަށް ބޭނުންކުރެވޭނެ ސަރަޙައްދުތައް ތަރައްޤީކުރުމުގެ މަސައްކަތުގެ ތެރެއިން އެޗް.ޑީ.ސީގެ ބަޖެޓުން ޚަރަދުކޮށްގެން ހުޅުމާލޭގެ އެކި ނެއިބަރހުޑްތަކުގެ ދެ އިމާރާތުގެ ދޭތެރޭގައި ހިމެނޭ ހުސްޖާގަތައް ތަރައްޤީކުރުމަށް އެޗް.ޑީ.ސީއިން ވަނީ ނިންމާފައެވެ. ސައިމަން ވިދާޅުވީ އެފަދަ ތަންތަނުގައި ޕާކިންގ އޭރިއާއާއި، ޕާކުތަކުގެ ގޮތުގައި އާއި ސްޕޯޓްސް ފެސިލިޓީތަކެއްގެ ގޮތުގައި ތަރައްޤީ ކުރުމަށް ނިންމާފައިވާ ކަމަށެވެ. އަދި، މިގޮތުން ޗައިނާ ފްލެޓްތައް ހުރި ސަރަޙައްދުގައި ހިމެނޭ މިފަދަ ހުސް ޖާގަތަކުގައި ކުޅިވަރުގެ އެކި ފެސިލިޓީޓައް ޤާއިމުކޮށް މި މަސްތެރޭގައި ބޭނުންކުރެވޭނެ އިންތިޒާމުތައް ހަމަޖައްސަމުންދާ ކަމަށެވެ. img:http://s3.psmnews.mv/images/660x400/14784269187437.jpg|ހުޅުމާލޭގައި ތަރައްޤީ ކުރައްވާ ޔޫތު ޕާކުގެ މަސައްކަތް - ފޮޓޯ: ޕީއެސްއެމް
މީގެ އިތުރުންވެސް ހުޅުމާލޭގައި ސްޕޯޓްސް އެންޑް ރެކްރިއޭޝަނަލް ޒޯންގެ ގޮތުގައިވެސް އެކި ސަރަޙައްދުތައް ދަނީ ތަރައްޤީ ކުރަމުންނެވެ. މިގޮތުން ސްޕޯޓްސް އެންޑް ރެކްރިއޭޝަނަލް ޒޯންގެ ގޮތުގައި، ރޯހައުސް ކުރިމަތީގައިވާ ޒޯންގައި ޖޮގިން ޓްރެކެއް ތަރައްޤީކޮށް މިއަހަރު ނިމުމުގެ ކުރިން ބޭނުންކުރުމަށް ހުޅުވާލުމަށް މަސައްކަތް ކުރަމުންދާކަމަށް އެޗް.ޑީ.ސީ އިން މަޢުލޫމާތުދެއެވެ.