ކާރިސާތަކުން ލިބޭ ގެއްލުންތައް ކުޑަކުރުމަށް ސަރަހައްދީ ޤައުމުތަކުން ގުޅިގެން މަސައްކަތް ކުރުމަށް ޑިފެންސް މިނިސްޓަރ އާދަމް ޝަރީފް ޢުމަރު ގޮވާލައްވައިފިއެވެ.
އިންޑިއާގެ ވެރިރަށް ނިއުދިއްލީގައި ކުރިއަށްދާ 7 ވަނަ އޭޝިޔަން މިނިސްޓީރިއަލް ކޮންފަރެންސް އޮން ޑިޒާސްޓަރ ރިސްކް ރިޑަކްޝަންގައި ތަޤްރީރުކުރައްވަމުން މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ވިދާޅުވީ ކާރިސާތަކުން ލިބޭ ގެއްލުންތައް ކުޑަކުރުމަށް ޤައުމުތަކުން އަވަސް ފިޔަވަޅުތައް އެޅުމަށާއި މިކަމަށް އިޖާބަދިނުމަށް އުފެއްދުންތެރި ބިނާކުރުވަނިވި ގޮތްތައް ބޭނުންކުރަންޖެހޭކަމަށެވެ. މިނިސްޓަރ ގެ ވާހަކަފުޅުގައި ކާރިސާތަކުން ލިބޭގެއްލުންތައް ކުޑަކުރުމުގެ ގޮތުން ސަރަޚައްދީ ޤައުމުތަކުން ކޮށްފައިވާ ކާމިޔާބު މަސައްކަތްތައް އެހެން ޤައުމުތަކާއި ޚިއްސާކުރެވޭނެ ސަރަޚައްދީ ނިޒާމެއް ޤާއިމުވެފައި އޮތުމުގެ މުޙިއްމުކަމުގެ މައްޗަށްވެސް އަލިއަޅުއްވާލެއްވިއެވެ.
img:http://s3.psmnews.mv/images/660x400/14782681646070.jpg|ޑިފެންސް މިނިސްޓަރ ކޮންފަރެންސްގައި ތަޤްރީރުކުރައްވަނީ / ފޮޓޯ: ޑިފެންސް މިނިސްޓްރީ
މިނިސްޓަރގެ ވާހަކަފުޅުގައި ސާރކުގެ ޤައުމުތަކުގެ ވެރިންނަށް މިނިޒާމް ބަލައިގަތުމަށްވެސް ގޮވާލެއްވިއެވެ. އިންޑިއާގެ ބޮޑުވަޒީރު ނަރެންދުރާ މޯދީ ޝަރަފުވެރިކޮށްދެއްވި މިކޮންފަރެންސްގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އޮނަރަބަލް އާދަމް ޝަރީފް އުމަރުގެ އިތުރުން ނޭޝަނަލް ޑިޒާސްޓަރ މެނޭޖްމަންޓް ސެންޓަރ ހިންގެވުމާއި ހަވާލުވަޑައިގެން ހުންނެވި ޑިފެންސް މިނިސްޓަރގެ ނާއިބު ފާތިމަތު ތަސްނީމްވެސް ބައިވެރިވެ ވަޑައިގަންނަވައެވެ.
ޑިފެންސް މިނިސްޓަރގެ ނައިބު ފާތިމަތު ތަސްނީމް ވަނީ މިއަދުގެ ކޮންފަރެންސްގެ މިނިސްޓީރިއަލް ސްޓޭޓްމަންޓް ސެޝަން ޗެއަރ ކުރައްވާފައެވެ.
7 ވަނަ އޭޝިޔަން މިނިސްޓީރިއަލް ކޮންފަރެންސް އޮން ޑިޒާސްޓަރ ރިސްކް ރިޑަކްޝަން ކޮންފަރެންސަކީ އެކިއެކި ޤައުމުތަކުން ކާރިސާތަކުން ލިބޭ ގެއްލުންތައް ކުޑަކުރުމަށް އެކަށައަޅާފައިވާ ލަނޑުދަނޑިތައް ޙާޞިލް ކުރެވެމުންދާ މިންވަރު ދެނެގަތުމާއި ލަނޑުދަނޑިތައް ޙާޞިލް ކުރުމަށް ނިންމާފައިވާ ނިޒާމްތަކާ ގުޅޭ ގޮތުން މަޝްވަރާ ކުރެއްވުމަށް ބާއްވަވާ ކޮންފަރެންސްއެކެވެ. މި ކޮންފަރެންސް މިމަހުގެ 5 ވަނަ ދުވަހާއި ހަމައަށް ކުރިއަށް ދާނެއެވެ.