އަންނަ އާދިއްތަ ދުވަހުން ފެށިގެން ރާއްޖެއިން ބޭރަށްދާ ދިވެހިންނަށް ޑޮލަރު ވިއްކުމަށް ހަމަޖެހިފައި ވަނީ އެސް.ޓީ.އޯ ޓްރޭޑް ސެންޓަރުގައި ހުންނަ ބޭންކުގެ ބާޒާރު ބްރާންޗުން ކަމަށް ބޭންކް އޮފް މޯލްޑިވްސްއިން ބުނެފިއެވެ.
ބޭންކުން މިގޮތަށް ހަމަޖައްސާފައިވަނީ، މިހާރު ޑޮލަރު ވިއްކަމުންދާ ސީޓްރެކްސް ބިލްޑިންގގައި ހުންނަ ކުރީގެ ބީއެމްއެލްގެ ބާޒާރު ބްރާންޗް މަރާމާތުކުރުމަށްޓަކައި މާދަމާއިން ފެށިގެން ބަންދުކުރުމަށް ނިންމާފައިވާތީއެވެ. އެހެންނަމަވެސް އެއިމާރާތުގެ ތިރީގައި ބަހައްޓާފައިހުރި ސެލްފްސަރވިސް އޭ.ޓީ.އޭމްތަކުން ޚިދުމަތް ލިބޭނެކަމަށް ބޭންކުން ބުނެއެވެ.
ބާޒާރު ބްރާންޗުން ޑޮލަރު ވިއްކުމަށް ހަމަޖެހިފައިވަނީ ބަންދު ނޫން ކޮންމެ ދުވަހެއްގެ މެންދުރުފަހު 3:00 އިން ފެށިގެން ހަވީރު 6:00 އަށެވެ. އެގޮތުން ޑޮލަރު ގަންނަން އަންނަ ފަރާތްތަކަށް ބެންކް ރޭޓުން ޓިކެޓަކަށް 500 ޑޮލަރު ބޭންކް އޮފް މޯލްޑިވްސްއިން ދޫކުރާނެއެވެ. އަދި ކޮންމެ މީހަކަށްވެސް އެންމެ ގިނަވެގެން ޑޮލަރު ދޫކުރުމަށް ހަމަޖެހިފައިވަނީ 5 ޓިކެޓަށް ކަމަށްވެސް ބެންކް އޮފް މޯލްޑިވްސްއިން މަޢުލޫމާތުދެއެވެ.