ރައީސް އެދިވަޑައިގަތީ ފުރުޞަތުތަކާއެކު އައްޑޫގައި އިންވެސްޓްކުރުމަށް ތައްޔާރުވުމަށް

އަންނަ އަހަރުގެ ޖެނުއަރީން ފެށިގެން 3 އަހަރު ދުވަހުގެ މުއްދަތައް އައްޑު އަތޮޅު ޓެކްސް ފްރީ ޒޯނަކަށް ހެދުމަށް ނިންމާފައިވާކަން ފާހަގަކުރައްވާ އައްޑޫސިޓީގައި އިންވެސްޓްކުރުމަށް ތައްޔާރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢީއްޒު އެދިވަޑައިގެންފިއެވެ.

ޕީއެންސީގެ ދަ ގްރޭޓަރ އައްޑޫ އިވެންޓުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އައްޑޫ އަތޮޅަކީ ކުދި އަދި މެދުފަންތީގެ ވިޔަފާރިތަކުގެ ހަބަކަށް ހެދުމަށް ނިންމާފައިވާކަން ފާހަގަކުރައްވާފައެވެ. އެގޮތުން އެކަމަށްޓަކައި މިއަހަރުގެ ތެރޭގައި އެކަމާ ގުޅޭ ޤާނޫނީ އަދި އިދާރީ މަސައްކަތްތައް ނިންމާނެކަމަށެވެ.

ރައީސް ވިދާޅުވީ ކުދި އަދި މެދުފަންތީގެ ވިޔަފާރިތަކަށް ކުރިއަރައިގެން ދިޔުމުގެ ވަރަށް ފުރިހަމަ ފުރުޞަތެއް އަންނަ އަހަރުގެ ޖެނުއަރީން ފެށިގެން 3 އަހަރަށް ލިބިގެންދާނެކަމަށެވެ. އެއާއެކު ރައީސް ވަނީ ހުރިހާ ފާރާތްތަކުންވެސް އައްޑޫގައި އިންވެސްޓްކުރުމަށް ތައްޔާރުވުމަށް ގޮވާލައްވާފައެވެ.

"އެއީ އައިޓި ދާއިރާއިން ކަމުގައިވިޔަސް، އެކިކަހަލަ އިޤްތިޞަދީ އެކި މަސައްކަތްތައްވިޔަސް، ސަރވިސް އިންޑަސްޓްރީގެ މަސައްކަތްތައްވިޔަސް، ކުދި އަދި މެދުފަންތީގެ ދާއިރާގައި އިންވެސްޓްކުރާ ފަރާތްތަކަށް ސަރުކާރުން ހުރިހާ ލުއިތަކެއް ދިނުމަށް، ބިމު ކުއްޔާއި ޓެކްސް، މިފަދަ ހުރިހާކަމަކުން 3 އަހަރު ދުވަހަށް ބްރޭކެއް ދިނުމުގެ ނިޒާމް." ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސް ވަނީ ކުދި ފަންތި އަދި މެދު ފަންތީގެ ވިޔަފާރިތައް އިތުރުކޮށް ކުރިއަރުވައި، ތަރައްޤީކުރުމަށް މަގުފަހިކުރުމުގެ ގޮތުން، ރާއްޖޭގެ ކަނޑައެޅޭ ވަކި ސަރަހައްދުތަކެއް، ކަނޑައެޅޭ ވަކި މުއްދަތަކަށް، ގިނަ ލުއިތަކާއެކު ކުދި ފަންތި އަދި މެދު ފަންތީގެ އިންވެސްޓްމަންޓްތަކަށް ހުޅުވައިލަން ނިންމާފައިވާކަން ފާހަގަކުރައްވާފައެވެ. މިގޮތުން، ބިމު ކުއްޔާއި، އިންކަމް ޓެކްސް ފަދަ ސީދާ ވިޔަފާރިތަކުން ދައުލަތަށް ދައްކާ ކުއްޔާއި ޓެކްސް ނުދައްކާގޮތަށް ހަމަޖެއްސުމާއި، އެހެނިހެން އިންސެންޓިވްތައް ދިނުން ހިމެނެއެވެ.

މިގޮތުން، އެންމެ ފުރަތަމަ ހުޅުވައިލާ ސަރަޙައްދެއްގެ ގޮތުގައި އައްޑޫ ސިޓީއާއި، އައްޑޫ ހުޅުދޫ އަދި އައްޑޫ މީދޫ ހިމެނޭހެން، އައްޑުއަތޮޅަކީ 1 ޖަނަވަރީ 2027ން ފެށިގެން ތިން އަހަރު ދުވަހަށް ކުދި ފަންތި އަދި މެދު ފަންތީގެ ވިޔަފާރިތަކަށް އިންވެސްޓް ކުރުމަށް ގިނަ ލުއިތަކެއް ލިބިގެންދާނޭ ސަރަހައްދެއްގެ ގޮތުގައި ކަނޑައަޅަން ނިންމައިފައިވާކަން ރައީސް އިޢުލާންކުރައްވާފައިވެއެވެ.

މީގެ ސަބަބުން، ކުދި ފަންތި އަދި މެދު ފަންތީގެ ސިނާޢަތް ބޮޑަށް ފުޅާވެ ކުރިއަރައި، އެތައް ވަޒީފާއެއް އުފެދި، އައްޑުއަތޮޅަށް، އަދި މުޅި ދިވެހިރާއްޖެއަށް، އިޤްތިޞާދީ ގޮތުން ގިނަގުނަ ފައިދާތައް ކުރާނެކަމަށްވެސް ރައީސް ވަނީ ވިދާޅުވެފައެވެ. ރައީސް ވަނީ އައްޑުއަތޮޅަކީ ރާއްޖޭގެ އައި.ޓީ.ހަބްގެ ގޮތުގައި ހެދުމަށް، އެކަމަށް ޝައުޤުވެރިކަން ހުރި އެންމެހައި ފަރާތްތަކަށް ދަޢުވަތުދެއްވާފައެވެ.

ވިޔަފާރިވެރިންނަށް ހުރި ދަތިތައް ހައްލުކުރުމަށް ސަރުކާރުން ކުރަމުންދާ މަސައްކަތްތަކަށް ބަލާއިރު ސަރުކާރުގެ ކުންފުނިތަކުން ކުދި ވިޔަފާރިތަކަށް ދައްކަންޖެހޭ ފައިސާގެ ތެރެއިން 1 ބިލިޔަން ޑޮލަރު މިހާރު ދައްކާފައިވެއެވެ. މީގެ އިތުރުން، އެއަރޕޯޓުން މުދާ ކްލިއަރ ކުރާ ވަގުތު 124 ގަޑިއިރަށް އިތުރުކޮށް، ޑެމަރޭޖް ފީ ނުނަގާ ބަނދަރުގައި މުދާ ބެހެއްޓޭ މުއްދަތު 10 ދުވަހަށް ވަނީ އިތުރުކޮށްފައެވެ. އަދި ޑެމަރޭޖް ފީ އާއި ފްރައިޓް ޗާޖް ދިވެހި ރުފިޔާއިން ދެއްކޭ ގޮތަށް މިހާރު ވަނީ ބަދަލުކޮށްފައެވެ.

މީގެ އިތުރުން، ކެފޭތަކުން ނަގާ ފީތަށްވެސް 50 އިންސައްތަ ދަށް ކުރެވިފައިވާއިރު، 20 ކޯޓައަށްވުރެ ގިނަ ބިދޭސީ ކޯޓާ ގެންގުޅޭ ވިޔަފާރިތަކަށް މިއަހަރުގެ މާރިޗުމަހުން ފެށިގެން އެ ކޯޓާވެސް ނުނެގުމަށް ނިންމާފައިވެއެވެ. ހަމަމިއާއެކު، ޕޭޕަލް، އަލީބާބާ އަދި ސްވައިޕްގެ ތެރެއިންވެސް މާލީ ބާރުވެރިކަމެއް ލިބޭނެ ފުރުސަތުތައް ފަހިކޮށްދީފައިވާއިރު، އެސްއެމްއީ ޑިޖިޓަލް މެދުވެރިކޮށް ކުޑަ އިންޓްރެސްޓް ރޭޓެއްގައި ލިބޭނެ އިންތިޒާމުވެސް ހަމަޖައްސާފައިވެއެވެ.