ފަތުރުވެރިން އިތުރުކުރުމަށް ޚާއްސަ ކެމްޕޭންތަކެއް!

ދުނިޔޭގެ ވައިގެ ދަތުރުފަތުރަށް ދިމާވެފައިވާ ގޮންޖެހުންތަކާ ގުޅިގެން، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެމެހެއްޓުމަށްޓަކާ، ބައެއް މާކެޓްތަކަށް އަމާޒުކޮށް ޚާއްސަ މަސައްކަތްތަކެއް ކުރަމުންދާކަމަށް ވިޒިޓް މޯލްޑިވްސް ކޯޕަރޭޝަން، ވީ.އެމް.ސީން ވިދާޅުވެއްޖެއެވެ.

މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން، ދުނިޔޭގެ ވައިގެ ދަތުރުފަތުރަށް ދިމާވެފައިވާ ބުރޫއެރުންތަކާ ގުޅިގެން ވީ.އެމް.ސީއިން ކަމާގުޅޭ ވުޒާރާތަކާއި ސިނާޢަތުގެ ބައިވެރިންނާ ގުޅިގެން ހަރުދަނާ ފިޔަވަޅުތަކެއް ވަނީ އަޅަން ފަށާފައެވެ.

ދަތުރުތައް މެދުކެނޑުމުގެ ސަބަބުން ފަތުރުވެރިންނަށާއި މި ދާއިރާގައި މަސައްކަތްކުރާ ފަރާތްތަކަށް ކުރިމަތިވަމުންދާ ދަތިތަކަށް ހައްލެއް ހޯދައިދިނުމަށްޓަކައި، ވިޒިޓް މޯލްޑިވްސްއިން އިސްކަންދެނީ ފަތުރުވެރިންގެ ރައްކާތެރިކަން ކަށަވަރުކުރުމަށާއި ރާއްޖޭގެ ފަތުރުވެރިކަމަށް ކުރާ ނޭދެވޭ އަސަރު ކުޑަކުރުމަށް އެކޯޕަރޭޝަނުން ވިދާޅުވިއެވެ.

ވީއެމްސީން ނެރުނު ބަޔާނެއްގައި ވިދާޅުވީ، މިހާތަނަށް ކުރެވުނު މަސައްކަތްތަކުގެ ތެރެއިން، ވިޒިޓް މޯލްޑިވްސްގެ އެހީތެރިކަމާއެކު ޖަރުމަނުވިލާތާއި ފަރަންސޭސިވިލާތް ހިމެނޭހެން ޖުމްލަ 8 ރިޕެޓްރިއޭޝަން ފްލައިޓް ބާއްވާފައިވާކަމަށެވެ. މިއީ ފަތުރުވެރިން ނިސްބަތްވާ ޤައުމަށް އަނބުރާ ފޮނުވުމަށް ބޭއްވި ފްލައިޓްތަކެކެވެ. މީގެ އިތުރުން، ވެލާނާ އިންޓަރނޭޝަނަލް އެއަރޕޯޓުގައި އެމް.އޭ.ސީ.އެލްއާއި ފަތުރުވެރިކަމާބެހޭ ވުޒާރާގެ އެހީތެރިކަމާއެކު ޚާއްޞަ 'ހެލްޕް ޑެސްކް' އެއް ވަނީ ޤާއިމުކުރެވިފައެވެ. މި ޑެސްކު މެދުވެރިކޮށް ދަތުރުވެރިންނަށް ބޭނުންވާ އިރުޝާދާއި އެހީތެރިކަން ދަނީ ފޯރުކޮށްދެމުންނެވެ.

މި ހާލަތުން އަރައިގަތުމަށްޓަކައި، ވިޒިޓް މޯލްޑިވްސްއިން އެކި އެއަރލައިންތަކާއެކު މަޝްވަރާކޮށް އިތުރު ފްލައިޓްތައް ބޭއްވޭނެ އިންތިޒާމުތައް ހަމަޖައްސަމުންދާކަމަށް އެކޯޕަރޭޝަނުން ވަނީ ހާމަކުރައްވާފައެވެ.

އެގޮތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެމެހެއްޓުމަށްޓަކައި، ދަތުރުފަތުރަށް މާބޮޑު ބުރޫއެއް އަރާފައިނުވާ އިންޑިއާ، ޗައިނާ އަދި ރަޝިއާ ފަދަ މާކެޓުތަކަށް އަމާޒުކޮށްގެން ޚާއްޞަ ކެމްޕޭންތަކެއް ހިންގުމަށް ސިނާޢަތުގެ ބައިވެރިންނާއެކު ވަނީ މަސައްކަތް ފަށާފައެވެ. މިގޮތުން ޓުއަރ އޮޕަރޭޓަރުންނާއި އެޖެންޓުންނާ ގުޅިގެން ކުރިއަށްގެންދާ މި ހަރަކާތްތަކަކީ ފަތުރުވެރިކަމުގެ ދާއިރާއަށް ލިބޭ ގެއްލުން ކުޑަކުރުމަށް އެޅޭ މުހިންމު ފިޔަވަޅެކެވެ.

ވިޒިޓް މޯލްޑިވްސް ކޯޕަރޭޝަނުން ވިދާޅުވީ، މުސްތަޤުބަލަށް ރޭވުމުގެ ގޮތުން ރާއްޖޭގެ ފަތުރުވެރިކަމަށް ޚާއްޞަ "ކްރައިސިސް ރެސްޕޮންސް ސްޓްރެޓެޖީ" އެއް އެކުލަވާލަމުގެ މަސައްކަތްވެސް ކުރަމުންދާކަމާށެވެ. މި މަސައްކަތުގެ ދަށުން، ސިނާޢަތުގެ ބައިވެރިންނާ ބައްދަލުކޮށް، މަޢުލޫމާތު ހިއްސާކުރުމާއި ކުރިމަތިވެފައިވާ ގޮންޖެހުންތަކުން އަރައިގަތުމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރުމަށް ވަނީ ނިންމާފައެވެ. ވިޒިޓް މޯލްޑިވްސްގެ އަމާޒަކީ، ހުރިހާ ބައިވެރިންގެ އެއްބާރުލުމާއެކު މި ދަތި ވަގުތުގައިވެސް ރާއްޖޭގެ ފަތުރުވެރިކަން ކުރިއަށްގެންދިއުންކަމަށް އެކޯޕަރޭޝަނުން ވިދާޅުވެއެވެ.