ހެރީ ކޭން ނުލާ ވެސް ބަޔާންއަށް ބޮޑު މޮޅެއް

އަނިޔާގެ ސަބަބުން ކުޅުމާ ދުރުގައި ހުރި ބަޔާން މިއުނިކުގެ ތަރި ހެރީ ކޭން ނުލާވެސް ޖަރުމަނު ބުންޑަސްލީގާގައި އެ ޓީމުން ބޮޑު މޮޅެއް ހޯދައިފިއެވެ.

ހުކުރު ދުވަހުގެރޭ ބަޔާން މިއުނިކުން ވަނީ އަމިއްލަ ދަނޑުގައި، 75،000 ސަޕޯޓަރުންގެ ކުރިމަތީގައި ކުޅެ ބޮރޫޝިއާ މޮންޗެންގްލަޑްބަކް އަތުން 1-4 ގެ ނަތީޖާއަކުން މޮޅުވެފައެވެ.

ކުޑަކަޅުވާއަށް ލިބުނު އަނިޔާއަކާ ގުޅިގެން ކޭން މި މެޗުގައި ނުކުޅޭއިރު، އޭނާއަށް ލިބިފައިވާ އަނިޔާ ސީރިއަސް ނޫންކަމަށް އެ ޓީމުގެ ކޯޗު ވިންސެންޓް ކޮމްޕެނީ ވަނީ ބުނެފައެވެ. ފާހަގަކޮށްލަން ޖެހޭ ކަމަކީ މިއީ ކޭން ބަޔާން އަށް ބަދަލުވިފަހުން އޭނާއަށް ނުކުޅެވުނު ފުރަތަމަ މެޗެވެ.

ކޭން ނުލާ މެޗުގައި ބަޔާން މިއުނިކުން މޮޅު ކުޅުމެއް ދައްކާފައިވާއިރު މެޗުގައި ބަޔާން އިން ފުރަތަމަ ލަނޑުޖަހައި ލީޑުނެގީ ފުރަތަމަ ހާފުގެ 33 ވަނަ މިނެޓުގައެވެ. ގޮރެޓްޒްކާ ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ ލުއިސް ޑިއާޒެވެ.

މި ހާފު ނިމުމުގެ ކުރިން ބަޔާނުން އިތުރު ލަނޑެއް ޖަހައި ލީޑު ފުޅާކުރިއެވެ. ޑިއާޒްގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ލައިމާއެވެ.

ދެވަނަ ހާފު ފަށައިގެން މާ ގިނައިރުތަކެއް ނުވެ ބަޔާނުން މެޗުގައި ތިންވަނަ ލަނޑު ޖެހިއެވެ. ލިބުނު ޕެނަލްޓީއެއްގައި، 57 ވަނަ މިނެޓުގައި ޖެހި ލަނޑަކީ ޖަމާލް މުސިއާލާ ކާމިޔާބުކޮށްދިން ލަނޑެކެވެ.

މެޗުގައި ބަޔާންއިން ޖެހި ފަހު ލަނޑު، 79 ވަނަ މިނެޓުގައި ކާމިޔާބުކޮށްދިނީ ނިކޮލަސް ޖެކްސަންއެވެ.

މެޗުގައި މޮންޗެންގްލަޑްބަކުން ޖެހި ހަމައެކަނި ލަނޑު، 89 ވަނަ މިނެޓުގައި ކާމިޔާބުކޮށްދިނީ ވެއިލް މޯޔާއެވެ.

މި މޮޅާއެކު ބަޔާނުން ވަނީ ލީގުގައި ކުޅުނު 25 މެޗުން ޖުމްލަ 66 ޕޮއިންޓު ހޯދާފައެވެ. އެއްވަނައިގައި ބަޔާން އޮތްއިރު އެއް މެޗު މަދުން ކުޅެ، 52 ޕޮއިންޓާއެކު ތާވަލުގެ ދެވަނައިގައި އޮތީ ވާދަވެރި ބޮރޫޝިއާ ޑޯޓްމަންޑެވެ. މި މެޗުން ބަލިވި މޮންޗެންގްލަޑްބަކް އޮތީ 25 މެޗުން 25 ޕޮއިންޓާއެކު 12 ވަނައިގައެވެ.