ޖޫން މަހު ފަށާ ވޯލްޑް ކަޕް ފުޓްބޯޅަ މުބާރާތުގެ ސެކިއުރިޓީ ބަލަހައްޓަން މެކްސިކޯއިން އެއް ލައްކަ ސެކިއުރިޓީން ހަމަޖައްސައިފި އެވެ.
އެމެރިކާ އާއި މެކްސިކޯ އަދި ކެނެޑާގައި ބާއްވާ މުބާރާތަށް މެކްސިކޯއިން ނެރޭނީ 20000 މިލިޓަރީ އޮފިސަރުންނާއި 55000 ފުލުހުންނާއި އަމިއްލަ ސެކިއުރިޓީ ކުންފުނިތަކުގެ މީހުންނެވެ. މީގެ އިތުރުން 2500 މިލިޓަރީ އަދި އަމިއްލަ އުޅަނދުތަކާއި 24 މަތިންދާ ބޯޓާއި އެންޓި ޑްރޯން ސިސްޓަމްގެ އިތުރުން ކުއްތާ ވެސް ތަމްރީނު ކުރާނެ އެވެ.
މެކްސިކޯއިން މިފަދައިން ކަންކުރާނެކަން އިއުލާނު ކުރީ އެ ގައުމުގެ ޑްރަގު ބޮޑުންތަކެއް މެދުގައި ހިނގި ހަމަނުޖެހުންތަކާއެކު އޭގެ އިސް މީހަކު މަރާލުމާ ގުޅިގެން ދާދި ފަހުން ހިނގި ހަމަނުޖެހުންތަކުގެ ސަބަބުންނެވެ.
މެކްސިކޯއިން ބުނީ ޑްރަގް ކާޓަލްތަކުގެ ވިޔަފާރި އާއި އޭގެ ނޭދެވޭ އަސަރު ދުނިޔޭގެ އެންމެ ބޮޑު ފުޓްބޯޅަ މުބާރާތަށް ނުކުރާނެ ކަމަށެވެ. އަދި އެކަން ވިޔަ ނުދިނުމަށް އެ ގައުމަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
ދުނިޔޭގެ ފުޓްބޯޅަ ޖަމިއްޔާ ފީފާއިން ވެސް ވަނީ މެކްސިކޯގެ ޑްރަގް ބޮޑުންނާއި ނުރައްކާތެރި ގްރޫޕްތަކުގެ ނޭދެވޭ އަމަލުތަކުގެ އަސަރު މުބާރާތަށް ނުކުރާނެ ގޮތަކަށް މެކްސިކޯއިން އަމަލު ކުރާނެ ކަމަށް އުއްމީދު ކުރާ ކަމަށެވެ.
މެކްސިކޯގެ އިތުރުން އެމެރިކާގެ ސަލާމަތީ ކަންކަމާ މެދު ވެސް ވަނީ ސުވާލު އުފެދިފަ އެވެ. އެއީ އިރާނާ ދެކޮޅަށް އިޒްރޭލާއި އެމެރިކާ އިސްވެ ފަށާފައިވާ ހަނގުރާމައިގެ ސަބަބުންނެވެ. މިއާއެކު މުބާރާތަށް އިރާނުން ނުދާނެ ކަމުގެ އިޝާރާތެއް ވެސް ވަނީ ދީފަ އެވެ. މީގެ އިތުރުން މުބާރާތުގެ އެންމެ ފަހުގެ ކޮލިފައިން މެޗުތައް ކުޅެން އިރާގުގެ ގައުމީ ޓީމަށް ދަތުރު ނުކުރެވިދާނެ ކަމަށް އެ ގައުމުން ވެސް ވަނީ ފީފާ އަށް އަންގައިފަ އެވެ.