މެދުއިރުމަތީގައި މިހާރު ހިނގަމުންދާ ކުރިމަތިލުންތަކުގެ ސަބަބުން، އީރާނާއި ލުބްނާން އަދި ސޫރިޔާގައި 200،000އަށް ވުރެ ގިނަ މީހުންނަށް ގެދޮރު ދޫކުރަން މަޖުބޫރުވެ، އެ ސަރަޙައްދުގައި އިންސާނީ ބޮޑު ކާރިޘާއެއް ކުރިމަތިވެފައިވާކަމަށް އދގެ ކަމާބެހޭ އިދާރާއިން ބުނެފިއެވެ.
އދގެ ރެފިއުޖީންނާ ބެހޭ އިދާރާ، ޔޫއެންއެޗްސީއާރު އިން ބުނީ، ލުބްނާނާއި ސޫރިޔާގައި އެކަނިވެސް މި ހަނގުރާމައިގެ ސަބަބުން މިހާރު ގެދޮރު ގެއްލިފައިވާ ކަމަށެވެ.
ފެބްރުއަރީ 28ވަނަ ދުވަހު އެމެރިކާއާ ގުޅިގެން ޔަހޫދީންގެ ނިރުބަވެރި ދަޢުލަތުން އީރާނަށް ޙަމަލާދޭން ފެށުމާއެކު، މުޅި މެދުއިރުމައްޗަށް މިހާރު ވަނީ ހަމަނުޖެހުންތައް ފެތުރިފައެވެ.
ޔަހޫދީން ދިން ޙަމަލާތަކުގައި އީރާނުގެ ރޫހީ އެންމެ މަތީ ވެރިޔާ އާޔަތުﷲ ޢަލީ އަލްޚާމަނާއި ޝަހީދުކޮށްލުމާއެކު، ލުބްނާންގައި ޙަރަކާތްތެރިވާ މުޖާޙިދުންގެ ޖަމާޢަތް، ޙިޒްބުﷲއިން ވަނީ ޔަހޫދީންނަށް ޢަމާޒުކޮށް ވަރުގަދަ ޙަމަލާތަކެއް ދޭން ފަށައިފައެވެ.
އެ ޙަމަލާތައް ހުއްޓުވުމަށް، ޙިޒްބުﷲ އާ ދެކޮޅަށް ވެސް ޔަހޫދީން މިހާރު ޢުދުވާނު ފަށާފައިވާއިރު، ލުބްނާންގެ އެކި ސަރަޙައްދުތައް ހުސްކުރުމަށް ޢާންމުންނަށް ޔަހޫދީން ދަނީ އަންގަމުންނެވެ.
ޔަހޫދީންގެ ޙަމަލާތަކުގެ ބިރަށް ގެދޮރު ދޫކުރި ލުބްނާންގައި 100،000އަށް ވުރެ ގިނަ މީހުން މިހާރު 470އަށް ވުރެ ގިނަ ވަގުތީ ހިޔާތަކުގައި ތިބިކަމަށް އެ ޖަމްޢިއްޔާއިން ބުންޏެވެ.
އެ ހިޔާތައް މިހާރު ވެސް ފުރެމުން އަންނައިރު، ހިޔާވަހިކަމަށް އެދި ކޮންމެ ދުވަހަކު އެތައް ސަތޭކަ މީހުން އެދެމުންދާކަމަށް ބުނެފައިވެއެވެ.
ލުބްނާންގައި ވަގުތީ ހިޔާތަކުގައި ތިބި އެތަކެއް ހާސް މީހުންނަށް ބޭނުންވާ ކާބޯތަކެއްޗާއި ބޭހުގެ ދަތިކަން ކުރިމަތިވެފައިވާއިރު، ބަލިމަޑުކަމެއް ފެތުރުމުގެ ބިރު ބޮޑުކަމުގެ އިންޒާރު ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ވަނީ ދީފައެވެ.
އެމެރިކާ އާއި ޔަހޫދީން ގުޅިގެން އީރާނަށް އަދިވެސް ޙަމަލާތައް ދެމުންދާއިރު، 100،000އަށް ވުރެ ގިނަ މީހުންގެ ގެދޮރު ގެއްލިފައިވާކަމަށް އެ ޖަމްޢިއްޔާއިން ބުންޏެވެ.