ލަނޫސް އަތުން ބޮކަ ޖޫނިއާސް އަށް ފަސޭހަ މޮޅެއް

އާޖެންޓީނާ ލީގުގައި ލަނޫސް އަތުން ބޮކަ ޖޫނިއާސް އިން ފަސޭހަ މޮޅެއް ހޯދައިފިއެވެ.

ލަނޫސްގެ ދަނޑުގައި ކުޅުނު މި މެޗުން ބޮކަ މޮޅުވީ 0-3 ގެ ނަތީޖާއަކުންނެވެ. މެޗުގެ ފުރަތަމަ ހާފުގައި ބޮކަ އިން ވަނީ ދެ ލަނޑު ޖަހާފައެވެ . މެޗު ފަށައިގެން 15 ވަނަ މިނެޓުގެ ތެރޭގައި އެ ޓީމަށް ލީޑު ނަގައިދިން ލަނޑު ކާމިޔާބުކޮށްދިނީ ސަންޓިއާގޯ އަސްކަސިބާއެވެ.

އޭގެ 15 މިނެޓުފަހުން މެޗުގެ 30 ވަނަ މިނެޓުގައި މިގުއެލް މެރެންޓިއެލް ވަނީ ބޮކަ ގެ ދެވަނަ ލަނޑު ޖަހައިދީފައެވެ. އަދި ދެވަނަ ހާފުގައި، މެޗުގެ 64 ވަނަ މިނެޓުގައި މިގުއެލް ވަނީ އެ ޓީމުގެ ތިންވަނަ ލަނޑު ވެސް ޖަހައިދީފައެވެ.

މި މޮޅާއެކު ބޮކަ އިން ވަނީ ލީގު ތާވަލުގެ ހަވަނައަށް ކުރިއަށް ޖެހިލާފައެވެ. އެއީ ކުޅުނު އަށް މެޗުން 12 ޕޮއިންޓާއެކުއެވެ. މެޗުން ބަލިވި ލަނޫސްއަށް ހަތް މެޗުން ނުވަ ޕޮއިންޓާއެކު ލިބެނީ ތާވަލުގެ 10 ވަނައެވެ.