މާސްޓަރސް ކެޓަގަރީން ޓީސީ އެއްވަނައަށް

މޯލްޑިވްސް ސޮކަރ މޭޓްސްއިން އިންތިޒާމުކޮށްގެން ކުރިއަށްގެންދާ ރަމަޟާން 7ވީ7 ލީގު 2026 ގެ މާސްޓަރސް ކެޓަގަރީން ދެވަނަބުރުގެ ޖާގައެއް ޓީސީ ސްޕޯޓްސް ކުލަބުން ކަށަވަރުކޮއްފިއެވެ.

ހެންވޭރު ދަނޑުގައި ކުރިއަށްދާ މި މުބާރާތުގައި ދެ ޑިވިޝަނެއް ހިމެނެއެވެ. އެގޮތުން 40 އަހަރުން މަތީގެ ވެޓެރަންސް ކެޓެގަރީގައި 10 ޓީމެއް އަދި 50 އަހަރުން މަތީގެ މާސްޓަރސް ކެޓެގަރީގައި 8 ޓީމެއް ވަނީ ބައިވެރިވެފައެވެ.

މުބާރާތުގެ އަށްވަނަ ދުވަހުގެ އެންމެ ފުރަތަމަ ކުޅުނީ ވެޓެރެންސް ކެޓޭގަރީގެ މެޗެކެވެ. ހުރާ ބެލިސިމޯ ސްޕޯޓްސް ކުލަބާއި އެލްޓީ ސްޕޯޓްސް ކުލަބާ ވާދަކުރި މެޗު ނިމުނީ 0-0 އެއްވަރުވެގެންނެވެ.

މި ނަތީޖާ އެކު މުބާރާތުގައި މި ކެޓެގެރީގެ ގުރޫޕް ބީގަ އެއްވަނައިގަ އޮތް މުއިވެޔޮ ފްރެންޑްސް ކުލަބު 9 ޕޮއިންޓާ އެކު ވަނީ ދެވަނަ ބުރު ޔަގީންކޮއްފައެވެ. ހުރާ ބެލިސިމޯ އޮތީ 4 ޕޮއިންޓާއެކު ދެވަނައިގައެވެ. ތިންވަނައިގަ އޮތް އެލްޓީ ވެސް ވަނީ މިއަދަދަށް ޕޮއިންޓް ހޯދާފައެވެ. ވަކަންޑަ ހަތަރުވަނައިގަ އޮތީ 3 ޕޮއިންޓާ އެކުއެވެ. ޕޮއިންޓެއް ނުލިބި އޮތީ މާފަންނު ސެންޓްރަލް ޔުނައިޓެޑެވެ.

މި ކެޓަގަރީން ދެވަނަ ބުރަށް ދެވޭނީ ކޮންމެ ގުރޫޕަކުން އެންމެ ގިނަ ޕޮއިންޓް ހޯދާ ހަތަރު ޓީމެވެ.

މި ކެޓަގަރީގެ ގުރޫޕްއޭ ގައި ލެގޫންސް ސްޕޯޓްސް ކުލަބުން ވަނީ އެއްވަނައިގަ 10 ޕޮއިންޓް ހޯދައިގެން މުބާރާތުގެ ދެވަނަބުރު ޔަގީން ކޮއްފައެވެ. މި ގުރޫޕުން ދެން މުބާރާތުގެ ދެވަނަބުރު ޔަގީން ކުރީ ޓީސީ ސްޕޯޓްސް ކުލަބެވެ. އެޓީމު ދެވަނައިގަ އޮތީ 6 ޕޮއިންޓާއެކުވެ. ތިންވަނައިގަ އޮތް ހިންނަވަރު ހިރިޔާ އަށް ލިބެނީ ހަތަރު ޕޮއިންޓެވެ.

މި ގުރޫޕުން ދެވަނަ ބުރުގެ ޖާގައަށް އެންމެ ވާންކުރާ ދެޓީމަކީ ގުޅި އެފްސީ އާއި ސްޓެލްކޯ އެވެ. މިދެޓީމަށް ވެސް ލިބިފަވަނީ އެންމެ ޕޮއިންޓެކެވެ.

މުބާރާތުގެ އަށްވަނަ ދުވަހު ދެން ކުޅެވުނީ މާސްޓަރސް ކެޓަގަރީގެ ދެމެޗެވެ. ފުރަތަމަ މެޗުގައި ޔުނައިޓެޑް ހެންވޭރިއަންސްގެ މައްޗަށް ޓީސީ ސްޕޯޓްސް ކުލަބުން ވަނީ 2-0 ލަނޑުން ކުރި ހޯދާފައެވެ. ޓީސީ އަށް ލަނޑުތައް ޖަހައިދިނީ އިސްމާއިލް މުހައްމަދާއި، މުހައްމަދު ޒިޔާދުއެވެ.
މި ކެޓަގަރީގެ މުއިވެޔޮ އާއި ލެގޫންސް ވާދަކުރި މެޗު ނިމުނީ 1-1 ލަނޑުން އެއްވަރުވެގެންނެވެ. މުއިވެޔޮ ޓީމަށް ލަނޑުޖަހައިދިނީ މުހައްމަދު ޝާހުއެވެ. ލެގޫންސްގެ ލަނޑު ކާމިޔާބުކޮއްދިނީ އުމަރު އަމީންއެވެ.

މުބާރާތުގެ މި ކެޓަގަރީގެ އޮތް ދެގުރޫޕުގެ އަށް ޓީމަށް ވެސް މުބާރާތުގެ ދެވަނަ ބުރުގެ ފުރަސްތު ލިބެގެންދާނެއެވެ.

އެގޮތުން މި ކެޓަގަރީގެ ގުރޫޕް އޭގެ އެއްވަނައިގަ ހުޅުމާލެ ވެޓެރެންސް އޮތީ 6 ޕޮއިންޓް ހޯދައިގެންނެވެ. މި ގުރޫޕުން ސްޓެލްކޯ އާއި ހިރިޔާ ވަނީ 3 ޕޮއިންޓް ޯދާފައެވެ. ޕޮއިންޓެއް ނުލިބި މި ގުރޫޕުގައި އޮތީ ވިކްޓަރީ ސްޕޯޓްސް ކުލަބެވެ.

ގުރޫޕް ބީގައި ޓީސީ އެއްވަނައިގަ އޮތީ 6 ޕޮއިންޓާއެކުއެވެ. ދެވަނަގަ މުއިވެޔޮ އޮތީ ހަތަރު ޕޮއިންޓާއެކުވެ. ތިންވަނައިގަ އޮތް ލެގޫންސްއަށް ލިބެނީ އެންމެ ޕޮއިންޓެކެވެ. މި ގުރޫޕުން ޕޮއިންޓެއް ނުލިބެނީ ޔުނައިޓޭޑް ހެންވޭރިއަންސްއެވެ.

މުބާރާތުގެ ގުރޫޕް ސްޓޭޖުގެ ފަހު މެޗުތައް ކުޅެނީ ބުދަދުވަހެއެވެ.