ލީގު ގެއްލިގެން މިދަނީ ކުޅުމުގެ ތެރެއިން ލަނޑު ނުޖެހޭތީ: ސްލޮޓް

އިނގިރޭސި ޕްރިމިއަރ ލީގު ވެސް އަދި ސީޒަނުގެ އެހެން ޓްރޮފީތައް ވެސް ލިވަޕޫލަށް ގެއްލިގެން މިދަނީ، ކުޅުމުގެ ތެރެއިން ލަނޑުޖެހުމުގައި ކާމިޔާބީއެއް ނުލިބޭތީކަމަށް އެ ޓީމުގެ ކޯޗު އާނޭ ސްލޮޓް ބުނެފިއެވެ.

އިނގިރޭސި ލީގުގައި ލިވަޕޫލުން އެންމެފަހުން ކުޅުނު މެޗުައި ވުލްވްސް އަތުން ލިވަޕޫލް ވަނީ 1-2 އިން ބަލިވެފައެވެ. އޭގެ ކުރީ މެޗުގައި ވެސްޓް ހަމް ޔުނައިޓެޑާ ދެކޮޅަށް ކުޅެ ލިވަޕޫލް 2-5 އިން މޮޅުވިއިރު އެ މެޗުގައި ލިވަޕޫލުން ވަނީ ކޯނަރުން ތަނަވަސްވި ފުރުސަތުތަކުން ތިން ލަނޑު ކާމިޔާބުކޮށްފައެވެ.

އެ މެޗަށްފަހު ވެސް ސްލޮޓް ވަނީ ސެޓް ޕީސް، ނުވަތަ ހިލޭ ޖެހުންތަކުން ލިވަޕޫލުން ސީޒަނުގައި ގިނަ ލަނޑުތަކެއް ޖަހަމުންދާކަން ފާހަގަކޮށްފައެވެ. އެ ޓީމުން އެންމެފަހުން ޕްރިމިއަރ ލީގުގައި ޖެހި ނުވަ ލަނޑުގެ ތެރެއިން ހަތް ލަނޑަކީ ސެޓް ޕީސްތަކުން ތަވަސްކުރި ފުރުސަތުތަކުން ކާމިޔާބުކުރި ލަނޑުތަކެކެވެ.

އެހެންނަމަވެސް ވުލްވްސް އަތުން ބަލިވި މެޗަށްފަހު ވާހަކަދައްކަމުން ސްލޮޓް ބުނީ، މި ފަހަކަށް އައިސް ލިވަޕޫލުން ހޯދާ މޮޅުތަކަކީ ހިލޭ ޖެހުންތަކުން ތަނަވަސްވާ ފުރުސަތުތަކުން ލަނޑުޖެހޭތީ ހޯދޭ މޮޅުތަކެއް ކަމަށާއި، މިފަހުން ކުޅުނު ފަސް ހަ މެޗުގައި ލިވަޕޫލަށް ކުރިމަތިި އެންމެ ބޮޑު ގޮންޖެހުމަކީ ކުޅުމުގެ ތެރެއިން ލަނޑު ނުޖެހުން ކަމަށެވެ.

ޙާއްސަ ގޮތެއްގައި ލިވަޕޫލުން މުޅި މެޗުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅުނު ނަމަވެސް، ގިނަ ފުރުސަތުތަކެއް ތަނަވަސްކޮށް، އެ ފުރުސަތުތަކުގެ ބޭނުން ލިވަޕޫލަށް ނުހިފޭކަމުގެ ކަންބޮޑުވުން ސްލޮޓް ފާހަގަކުރިއެވެ.

މީގެއިތުރުން، މެޗުގެ އިތުރުވަގުތުގެ ތެރޭގައި އިދިކޮޅު ޓީމުތަކުން ޖަހާ ލަނޑުތައް ނުހުއްޓުވުން ވެސް ލިވަޕޫލަށް މިފަހުން ލިބޭ ނާކާމިޔާބީގެ ފަހަތުގައިވާ އެންމެ ބޮޑު ސަބަބުކަމަށް ސްލޮޓް ފާހަގަކުރިއެވެ.

ވުލްވްސް އިން ލިވަޕޫލް ބަލިކުރީ 1-1 ގެ ނަތީޖާއަކުން މެޗު ނިމެން ދަނިކޮށް، އިތުރުވަގުތުގެ ތެރޭގައި އަންދްރޭ ކާމިޔާބުކުރި ލަނޑުންނެވެ. މިއީ މި ސީޒަނުގައި އިތުރުވަގުތުގެ ތެރޭގައި އިދިކޮޅު ޓީމުން ލަނޑުޖަހައިގެން ލިވަޕޫލް ބަލިވި ފަސްވަނަ ފަހަރެވެ.

މި މެޗުން ވީ ބައްޔާއެކު ލިވަޕޫލަށް ވަނީ އަންނަ ސީޒަނުގެ ޗެމްޕިއަންސް ލީގުގެ ޖާގައެއް ހޯދަން ކުރެވޭ އުއްމީދަށް ހުރަސް އެޅިފައެވެ. ވުލްވްސް އަތުން ލިވަޕޫލް ބަލިވެފައިވާއިރު، ވުލްވްސް އަކީ ލީގު ތާވަލުގެ ފުލުގައި، ރެލިގޭޝަން ޒޯނުގައި އޮތް ޓީމެކެވެ. ކުޅުނު 30 މެޗުގެ ތެރެއިން ވުލްވްސް މޮޅުވެފައި ވަނީ އެންމެ ތިން މެޗުންނެވެ.