މެޗުތަކަށް ޓީމުތަކަށް ނެގޭ ސްކޮޑު ބޮޑު ކޮށްދޭން ނުވަތަ ލިސްޓުގައި ޖެހޭ ކުޅުންތެރިންގެ އަދަދު އިތުރުކޮށްދިނުމަށް އެދި އާސެނަލްގެ ކޯޗު މިކެލް އާޓެޓާ، ޕްރިމިއަރ ލީގުގެ ކިބައިން އާދޭސްކުރަން ފަށައިފިއެވެ.
ޕްރިމިއަރ ލީގުގެ މެޗުތަކަށް މިހާރު ކޮންމެ ޓީމަކަށް ވެސް ޖެހެނީ ޖުމްލަ 20 ކުޅުންތެރިންނެވެ. އެއީ ފުރަތަމަ 11 ގެ އިތުރުން ބަދަލު ކުޅުންތެރިންގެ ގޮތުގައި ނުވަ ކުޅުންތެރިންނެވެ. އޭގެ ތެރެއިން މެޗުގައި ބަދަލު ކުރެވެނީ ފަސް ކުޅުންތެރިންނެވެ. އާޓެޓާ އެދެމުންދަނީ ލިސްޓުގައި ޖެހޭ ކުޅުންތެރިންގެ އަދަދު 20 އިން 23 އަށް ބޮޑުކޮށްދިނުމަށެވެ.
މިހާރު އިން ގޮތުން އައުޓްފީލްޑް ޕްލެޔަރުންގެ ގޮތުގައި ޖެހެނީ 18 ކުޅުންތެރިންނެވެ. ކީޕަރުންގެ ގޮތުގައި 2 ކުޅުންތެރިންނެވެ. އާޓެޓާ ބޭނުންވަނީ 20 އައުޓްފީލްޑް ޕްލެޔަރުންނާއި ތިން ގޯލް ކީޕަރުން މެޗު ސްކޮޑުގައި ޖަހާށެވެ.
އާޓެޓާ ބުނާ ގޮތުގައި މިހާރު ޖެހޭ ކުޅުންތެރިންގެ އަދަދު މަދުވުމުގެ ސަބަބުން، ކުޅުންތެރިންގެ އަސްލު އަގު ދެމެހެއްޓުމަށް ދަތިތަކެއް ކުރިމަތިވާއިރު އެކަމުގެ ސަބަބުން ކުޅުންތެރިންގެ ނަފްސާނީ ދުޅަހެޔޮކަމަށް ވެސް ބޮޑެތި އަސަރުތަކެއް ކުރެއެވެ.
ޕްރިމިއަރ ލީގުގައި ޗެލްސީ އަތުން އާސެނަލް މޮޅުވި މެޗަށްފަހު ވާހަކަދައްކަމުން އާޓެޓާ އިތުރަށް ބުނީ، ޗެމްޕިއަންސް ލީގެކޭ އެއްފަދައިން ޕްރިމިއަރ ލީގުގައި ވެސް މެޗު ސްކޮޑުގައި 23 ކުޅުންތެރިން ޖެހޭގޮތް ހަދައިދޭން އެދި ލީގުގެ އިސް ފަރާތްތަކުގެ ކިބައިން "އާދޭސް" ކުރާ ކަމަށެވެ.
އެއްވެސް ކުޅުންތެރިއަކު މެޗު ސްކޮޑުން ބާކީވާން ބޭނުންނުވާއިރު، މިހާރު ލީގުގެ އުސޫލު އޮތް ގޮތުން ދެ ތިން ކުޅުންތެރިއަކަށް މެޗުތަކުގައި ޓީމާއެކު ތިބުމުގެ ފުރުސަތު ވެސް ނުލިބޭ ކަމަށާއި އެހެން އެކަން ވުމުގެ ސަބަބުން ކުޅުންތެރިންނަށް ބޮޑެތި އަސަރުތަކެއް ކުރާކަމަށް އާޓެޓާ ބުންޏެވެ.
މެޗު ސްކޮޑު ބޮޑުކޮށްދޭން އެދި އާޓެޓާ އާދޭސްކުރާއިރު ލީގު ތާވަލުގައި މިވަގުތު އާސެނަލް އޮތީ އެއްވަނައިގައި، ކުޅުނު 29 މެޗުން 64 ޕޮއިންޓާއެކުއެވެ. ދެވަނައިގައި އެންމެ ބޮޑު ވާދަވެރިއެއްގެ ގޮތުގައި މެންޗަސްޓަރ ސިޓީ އޮތީ 8 މެޗުން 59 ޕޮއިންޓާއެކުއެވެ.