އިންނަމާދުގައި ޓިވެޓް ސެންޓަރެއް، ހުޅުދުއްފާރުގައި އެކޮމަޑޭޝަން ފެސިލިޓީއެއް
-
އިންނަމާދޫ ޓިވެޓް ސެންޓަރު ޚާއްސަ ކޮށްފައިވަނީ ބޯޓް-ބިލްޑިން ދާއިރާއަށް
-
މިތަން ތަރައްޤީކުރަނީ ޕްރީ-ފެބް އުސޫލުން
-
އެކޮމަޑޭޝަން ފެސިލިޓީގައި 2 ކޮޓަރި އަދި 3 ކޮޓަރި އެޕާޓްމަންޓް ހިމެނޭނެ
ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރާއި ހުޅުދުއްފާރުގައި އެކޮމަޑޭޝަން ފެސިލިޓީއެއް ތަރައްޤީކުރުމަށް ދެ ކުންފުންޏަކާ ހަވާލުކޮށްފިއެވެ.
އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރު ތަރައްޤީކުރުމަށް ހަވާލުކޮށްފައިވަނީ ސެންޓަރލައިން ކިޔާ ކުންފުންޏަކާއެވެ. ހުޅުދުއްފާރުގައި އެކޮމަޑޭޝަން ފެސިލިޓީ ތަރައްޤީކުރުމަށް ހަވާލުކޮށްފައިވަނީ އެމްޓީސީސީއާއެވެ. މިމަޝްރޫޢުތައް ހަވާލުކުރުމަށް ބޭއްވި ރަސްމިއްޔާތުގައި މަތީ ތަޢުލީމާ ބެހޭ ވަޒީރު ޑރ. އަލީ ޙައިދަރު އަޙްމަދު ބައިވެރިވެވަޑައިގެންނެވިއެވެ.
ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރާއި ހުޅުދުއްފާރުގައި އެކަޮމަޑޭޝަން ފެސިލިޓީއެއް ތަރައްޤީކުރުމަކީ ރަށްރަށުގައި ތިބެގެން ދަރިވަރުންނަށް މަތީ ތަޢުލީމާއި ތަމްރީން ހޯދޭނެ މަގުފަހިކުރުމުގެ ގޮތުން ކުރިއަށްގެންދާ މަޝްރޫޢުތަކެކެވެ. އިންނަމާދޫ ޓިވެޓް ސެންޓަރު ޚާއްސަ ކޮށްފައިވަނީ ބޯޓް-ބިލްޑިން ދާއިރާއިން މީހުން ތަމްރީންކުރުމަށެވެ. އަދި މިތަން ތައްޔާރުކުރުމަށް ހަމަޖެހިފައިވަނީ ޕްރީ-ފެބް އުސޫލުން އިންސްޓިޓިއުޓަކަށް ބޭނުންވާނެ މުހިއްމު ވަޞީލަތްތައް ޤާއިމްކޮށްގެންނެވެ.
މިމަޝްރޫޫޢުތަކުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މަތީ ތަޢުލީމާ ބެހޭ ވަޒީރު ޑރ. އަލީ ހައިދަރު އަޙްމަދު ވިދާޅުވީ ހުޅުދުއްފާރުގައި ތަރައްޤީކުރާ އެކޮމަޑޭޝަން ފެސިލިޓީގައި ތަފާތު މޮޑެލްތަކުގެ އެކޮމަޑޭޝަން ހިމެނޭކަމަށެވެ. އަދި ދަރިވަރުން އާޢިލާތަކާއެކު ތިބެވޭ ގޮތަށް 2 ކޮޓަރިއާއި 3 ކޮޓަރީގެ އެޕާޓްމަންޓާއި ވަކިން އެކަނި ދިރިއުޅެވޭގޮތަށް ސްޓޫޑިއޯ އެޕާޓްމަންޓްތައް ހިމެނޭނެކަމަށެވެ.
"މިއިން ކޮންމެ އެޕާޓްމަންޓެއްގައިވެސް ވަކިން ކެއްކުމާއި ލޯންޑްރީ ފަދަ މުހިއްމު އަސާސީ ޚިދުމަތްތައް ޤާއިމްކުރެވޭނެ. އިރާދަކުރެއްވިއްޔާ މިދެރަށުގައި ބިނާކުރެވޭ މި ފުރިހަމަ ވަޞީލަތްތަކުގެ އިތުރުން ރ.އަލިފުއްޓާއި ދުވާފަރުގައި މިހާރުވެސް ކުރިއަށްދާ މަޝްރޫޢުތަކާއެކު ރ. އަތޮޅު ވެގެންދާނީ މަތީ ތަޢުލީމާއި ތަމްރީނު ދިނުމުގައި ފާހަގަކޮށްލެވޭ އަތޮޅަކަށް." މަތީ ތަޢުލީމާ ބެހޭ ވަޒީރު ޑރ. އަލީ ހައިދަރު އަޙްމަދު ވިދާޅުވިއެވެ.
ވަޒީރު ހައިދަރު ވިދާޅުވީ މި މަޝްރޫޢުތަކަކީ އެ އަތޮޅުގެ ޒުވާނުންގެ މުސްތަޤްބަލަށްޓަކައި އެޅޭ ވަރުގަދަ ބިންގަލަކަށްވާނެކަމަށެވެ. މިމަޝްރޫޢުތަކުގެ މައިގަނޑު ބޭނުމަކީ މަތީތަޢުލީމާއި ތަމްރީންދޭ މަރުކަޒުތައް އިތުރުކޮށް ރަށުގައި ތިބެގެން ފެންވަރު ރަނގަޅު ތަޢުލީމު ހޯދުމުގެ ފުރުޞަތު ރައްޔިތުންނާ ވީހާވެސް ގާތުން ފޯރުކޮށްދިނުމެވެ. މިމަރުކަޒުތަކުގެ ސަބަބުން އެ ސަރަޙައްދުގެ މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބާރަކަށް ވާނެކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ސަރުކާރުގެ އަމާޒަކީ ރާއްޖޭގެ ކޮންމެ ކުއްޖަކަށްވެސް އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތަޢުލީމުގެ ފުރުޞަތު ހޯދައިދިނުންކަމަށެވެ.
ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރާއި ހުޅުދުއްފާރުގައި އެކޮމަޑޭޝަން ފެސިލިޓީއެއް ތަރައްޤީކުރުމަށް ހަވާލުކޮށްފައިވާއިރު މިހާރުވެސް އެއަތޮޅު އަލިފުށީގައި ޓިވެޓް ސެންޓަރެއް ވަނީ ތަރައްޤީކޮށްފައެވެ. އަދި ދުވާފަރުގައި ދަނާލެއް އެޅުމުގެ މަސައްކަތް ދަނީ ކުރަމުންނެވެ.