"ގިރާވަރު ފަޅު ހިއްކާ ނިމުމުން ދެން ފަށާނީ އުތުރު ތިލަފަޅު ހިއްކަން"

ގިރާވަރު ފަޅު ހިއްކާ ނިންމުމަށްފަހު ދެން ހިއްކުމުގެ މަސައްކަތް ފަށާނީ އުތުރު ތިލަފަޅުކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. އުތުރު ތިލަފަޅަކީ މީހުން ދިރިއުޅުމަށާއި ސިނާޢީ މަސައްކަތްތަކަށްވެސް ޚާއްސަކޮށްގެން ތަރައްޤީކުރާ ރަށެކެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ގިރާވަރު ފަޅު ހިއްކުމުގެ މަސައްކަތް ނިންމުމަށްފަހު ދެން އެންމެ އަވަހަށް ހިއްކުމުގެ މަސައްކަތް ފަށާނީ އުތުރު ތިލަފަޅުކަމަށެވެ. ރައީސް ވިދާޅުވީ އުތުރު ތިލަފަޅުގައި މީހުން ދިރިއުޅުމަށް ޚާއްސަ ސަރަޙައްދެއް އޮންނާނެކަމަށާއި ސިނާޢީ މަސައްކަތްތަކާއި ހޯޕް އައިލެންޑް އެރަށުގައި ތަރައްޤީ ކުރާނެކަމަށެވެ.

އުތުރު ތިލަފަޅުގައި ކުރިއަށްގެންދިޔުމަށް ނިންމާފައިވާ ބައެއް މަޝްރޫޢުތަކަށް ބަލާއިރު 200 ހެކްޓަރުގެ އެގްރިކަލްޗަރ އިކޮނޮމިކް ޒޯނެއް ތަރައްޤީކުރުމަށް ވަނީ ނިންމާފައެވެ. އެގްރިކަލްޗަރ ޒޯނުގެ ފުރަތަމަ ފިޔަވަހީގައި ގްރީން ހައުސްތަކުގައި މައިގަނޑު ގޮތެއްގައި ހެއްދުމަށް ހަމަޖެހިފައިވަނީ ރާއްޖެއަށް އެތެރެކުރާ ބާވަތްތަކުގެ ތެރެއިން ގްރީން ހައުސްގައި ހެއްދޭ ބާވަތްތަކެވެ. އަދި ދެވަނަ ފިޔަވަހީގައި ތަރައްޤީކުރުމަށް ހަމަޖެހިފައިވަނީ ބިމު އަޑިއަށް ފައިބާ ބާވަތްތަކުގެ ތެރެއިން ފިޔާ، އަލުވި ފަދަ ކޮންމެ ދުވަހެއްގެ ކެއުމުގައި ހިމެނޭ ބާވަތްތަކެވެ. ހަމައެއާއެކު ދެވަނަ ފިޔަވަހީގައި ކުކުޅު އާލާކޮށް ރާއްޖެއަށް ކުކުޅު ބިސް އެތެރެކުރުން އެއްކޮށް ހުއްޓާލެވޭނެ ފެންވަރުގެ ޕޯލްޓްރީ ފާމެއް ތަރައްޤީކުރުމަށްވަނީ ހަމަޖެހިފައެވެ.

އެރަށުގައި ދެން ކުރިއަށްގެންދާ އަނެއް މަޝްރޫޢަކީ ކުށުގެ މާޙައުލަށް ހުށައެޅޭ ކުދިން ރީހެބިލިޓޭޓްކުރުމަށް ހަދާ "ހޯޕް އައިލެންޑް"އެވެ. ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށްދިނުމަށާއި އިޞްލާޙީ އަދި ރީހެބިލިޓޭޝަން ޕްރޮގްރާމްތައް ހިންގުމަށްޓަކައި ޤާއިމުކުރުމަށް ހަމަޖެހިފައިވާ "އުއްމީދު ނުވަތަ ހޯޕް އައިލެންޑް" މަޝްރޫޢަށް އުތުރު ތިލަފަޅުން 15 ހެކްޓަރުގެ ބިން ހިއްކުމަށް ހަމަޖެހިފައިވެއެވެ. އެތަން ތަރައްޤީކުރަނީ 700 މީހުންގެ ޖާގަޔަށް ޚާއްސަކޮށްގެންނެވެ.

ސަރުކާރުން އަންނަނީ މާލެ ސަރަޙައްދާއި އަތޮޅުތެރޭގެ ބިން ހިއްކުމުގެ މަސައްކަތް އަވަސް ކުރުމަށްޓަކައި ބޮޑެތި ޑްރެޖަރުތައް ގެނެސްގެން އެ މަސައްކަތް ކުރަމުންނެވެ. އެގޮތުން މިހާރު ހުޅުމާލެ 3 ވަނަ ފިޔަވަހި ހިއްކާ ނިންމާފައިވާއިރު ރަސްމާލެ ހިއްކުމުގެ މަސައްކަތްވެސް ބާރު ދުވެލީގައި އަންނަނީ ކުރަމުންނެވެ. މީގެ އިތުރުން ގިރާވަރު ފަޅު ހިއްކުމުގެ މަސައްކަތްވެސް ބާރު ދުވެލީގައި އަންނަނީ ކުރަމުންނެވެ. އެ މަސައްކަތުގެ ދަށުން ގިރާވަރުފަޅުން 15 ހެކްޓަރަށްވުރެ ބޮޑު ސަރަޙައްދެއް މިހާރު ވަނީ ހިއްކާ ނިންމާލާފައެވެ.