ލަންކާ ފުޓުބޯޅަ ޓީމުގެ ކޯޗު މުތައިރީގެ ކޮންޓްރެކްޓް އައުކޮށްފި

ލަންކާގެ ޤައުމީ ފުޓުބޯޅަ ޓީމުގެ ހެޑް ކޯޗު، ކުވައިތުގެ އަބްދުﷲ އަލްމުތައިރީ އާއެކު ހަދާފައިވާ އެއްބަސްވުން އައުކޮށްފިއެވެ.

މުތައިރީ އެންމެފުރަތަމަ ލަންކާގެ ޤައުމީ ޓީމާ ހަވާލުވީ 2024 ވަނަ އަހަރުގެ އޮގަސްޓް މަހުގެ 20 ވަނަ ދުވަހުއެވެ. އެ ފަހަރު އޭނާ ހެދި އެއްބަސްވުމުގެ މުއްދަތު ހަމަވީ މިދިޔަ ޖެނުއަރީ މަހުގެ 22 ވަނަ ދުވަހުއެވެ.

މިއާއެކު ލަންކާ ޤައުމީ ޓީމުގައި ރަސްމީ ކޯޗެއް ނެތި މަހެއްހައި ދުވަސް ހޭދަވެގެން ދިޔައިރު ލަންކާގެ ފުޓުބޯޅަ އެސޯސިއޭޝަނުން، މުތައިރީއާއެކު އެއްބަސްވުމުގެ މުއްދަތު އައުކުރިކަން ހާމަކުރީ ހުސްވި ފެބްރުއަރީ މަހުގެ 27 ވަނަ ދުވަހުއެވެ.

ފުޓުބޯޅަ ފެޑެރޭޝަން އޮފް ސްރީލަންކާ (އެފްއެފްއެސްއެލް) ގެ ރައީސް ޖަސްވާރު އުމަރު ވަނީ، މުތައިރީއާއެކު އެއްބަސްވުން އައުކުރިކަން ކަށަވަރުކޮށްދެއްވާފައެވެ.

އަދި ލަންކާގެ ފުޓުބޯޅަ ކުރިއަރުވަން މަސައްކަތްކުރަމުންދާ މި ހައްސާސް ދަނޑިވަޅުގައި، މުތައިރީ ވެގެންދާނީ ބޮޑު ބާރަކަށް ކަމަށް ދެކޭކަމަށް ވެސް ޖަސްވާރު ވިދާޅުވިއެވެ.

ލަންކާގެ މީޑިއާތަކުން ރިޕޯޓުކުރާ ގޮތުގައި މުތައިރީގެ އިރުޝާދުގެ ދަށުން ލަންކާގެ ގައުމީ ޓީމަށް ވަނީ ބޮޑެތި ކުރިއެރުންތަކެއް އައިސްފައެވެ. ހާއްސަގޮތެއްގައި ފުޓުބޯޅައިގެ ޓެކްނިކަލް އިލްމާއި ހުނަރު ކުޅުންތެރިންގެ ގައިގައި އަށަގެންފައިވާކަމަށް އެ ޤައުމުގެ މީޑިއާތަކުން ރިޕޯޓުކުރެއެވެ.

ފާހަގަކޮށްލަން ޖެހޭ ގޮތުގައި ޖައިސްވާލްގެ އިރުޝާދުގެ ދަށުން ކުޅެމުން އައި މުއްދަތުގައި ފީފާ ރޭންކިންގައި ވެސް ލަންކާ ކުރިއަރާފައިވެއެވެ.

ލަންކާއަށް ކުރިއަށް އޮތީ އޭއެފްސީ އޭޝިއަން ކަޕް ކޮލިފައިންގައި ޗައިނީޒް ޓައިޕެއި އާ ދެކޮޅަށް ކުޅެން އޮތް މެޗެވެ. އެ މެޗު އޮންނާނީ މި މަހުގެ 30 ވަނަ ދުވަހުއެވެ.

މި މެޗަށް ލަންކާ ޓީމުން ފަރިތަކުރުންތައް ފަށާނީ މި މަހުގެ ތިންވަނަ ހަފްތާގައެވެ.

މިވަގުތު އަމިއްލަ ގައުމުގައި ހުރި މުތައިރީ އެނބުރި ލަންކާއަށް ދިއުމަށް ހަމަޖެހިފައި ވަނީ ރަމަޟާން މަސް ނިމުމުންނެވެ.

މުތައިރީ ވަނީ މީގެކުރިން ނޭޕާލަށް ވެސް ކޯޗުކަން ކޮށްދީފައެވެ. ނޭޕާލް އިން ރާއްޖޭގައި އޮތް ސާފް ޗެމްޕިއަންޝިޕުގައި ވާދަކުރީ މުތައިރީގެ އިރުޝާދުގެ ދަށުންނެވެ. އެ ފަހަރުގެ މުބާރާތުގައި ނޭޕާލުން ވަނީ ފައިނަލުގައި އިންޑިއާ އާ ދެކޮޅަށް ކުޅެފައެވެ.