ޗެލްސީ ބަލިކޮށް އާސެނަލްއިން ކޯނަރުން ލަނޑުޖެހުމުގެ ރެކޯޑެއް

އިނގިރޭސި ޕްރިމިއަރ ލީގު ތާވަލްގެ އެންމެ ކުރީގައި އޮތް އާސެނަލް އިން، ވާދަވެރި ޗެލްސީއާ ދެކޮޅަށް ކުޅެ މުހިންމު މޮޅެއް ހޯދައިފިއެވެ.

އާސެނަލްގެ އެމިރޭޓްސް ސްޓޭޑިއަމުގައި 60,296 ސަޕޯޓަރުންގެ ކުރިމަތީގައި ކުޅުނު މި މެޗުން އާސެނަލް މޮޅުވީ 1-2 ގެ ނަތީޖާއަކުންނެވެ.

ފާހަގަކޮށްލަން ޖެހޭ ގޮތުގައި މި މެޗުގައި ފެނިގެންދިޔަ ތިން ލަނޑަކީ ވެސް ކޯނަރުން ތަނަވަސްކުރި ފުރުސަތުތަކެއްގައި ކާމިޔާބުކުރި ލަނޑުތަކެކެވެ.

މެޗުގައި ފުރަތަމަ ލަނޑުޖަހައި ލީޑުނެގީ މެޗުން މޮޅުވި އާސެނަލް އިންނެވެ.

މެޗުގެ 21 ވަނަ މިނެޓުގައި ބުކާޔޯ ސަކާ ނަގައިދިން ކޯނަރުން ލިބުނު ބޯޅަ، އޭރިއާ ތެރޭގައި ހުރެފައި ޑިފެންޑަރު ގެބްރިއެލް ބޮލުން ޖައްސާލުމުން ތަނަވަސްވި ފުރުސަތެއްގައި ބޯޅަ ގޯލުގެ ތެރެއަށް ފޮނުވާލައިގެން މި ލަނޑު އާސެނަލް އަށް ކާމިޔާބުކޮށްދިނީ ވިލިއަމް ސަލީބާއެވެ.

ޗެލްސީން މެޗުގައި ލަނޑުޖަހައި ނަތީޖާ ހަމަހަމަކުރީ ފުރަތަމަ ހާފުގެ 45 މިނެޓުގެ ކުޅުން ހަމަވެ ދެއްކި އިތުރުވަގުތުގެ ދެވަނަ މިނެޓުގައެވެ.

މިއީ ރީސް ޖޭމްސް ނަގައިދިން ކޯނަރެއް ދިފާއުކުރަން އުޅުމުގެ ތެރޭގައި ޕިއެރޯ ހިންކެޕީ ބޮލުގައި ޖެހިފައި ގޮސް އާސެނަލްގެ ގޯލުގެ ތެރެއަށް ބޯޅަ ވަދެގެން ޗެލްސީއަށް ކާމިޔާބުކުރެވުނު ލަނޑެކެވެ.

މެޗުގައި ދެވަނަ ފަހަރަށް ވެސް އާސެނަލް އިން ލީޑު ނެގީ ކޯނަރަކުން ތަނަވަސްވި ފުރުސަތެއްގައެވެ.

މިއީ ދެވަނަ ހާފު ފަށައިގެން، މެޗުގެ 66 ވަނަ މިނެޓުގައި ޑެކްލަން ރައިސް ނަގައިދިން ކޯނަރުން ބޮލުން ބޯޅަ ގޯލުގެ ތެރެއަށް ފޮނުވާލައިގެން ޔޫރިއަން ޓިމްބާ ކާމިޔާބުކޮށްދިން ލަނޑެކެވެ.

އާސެނަލްއިން ލީގު ޓައިޓަލް އަށް ކުރަމުން އަންނަ ދަތުރުގައި ކޯނަރުތަކާއި ހިލޭޖެހުންތައް ވެފައި ވަނީ މުހިންމު ހިއްސާދާރަކަށެވެ. އެގޮތުން އެ ޓީމުން މި ސީޒަނުގައި މިހާތަނަށް 16 ލަނޑު، ސެޓް ޕީސްތަކުން ކާމިޔާބުކޮށްފައިވެއެވެ.

އަދި މިއީ މި ސީޒަނުގައި އެ ޓީމުގެ މެޗު ވިނިންގް ލަނޑުތައް ކޯނަރުން ކާމިޔާބުކުރި ނުވަވަނަ ފަހަރުކަން ވެސް ފާހަގަކޮށްލަން ޖެހެއެވެ. މިއީ އެއް ސީޒަނެއްގައި އެއް ޓީމަކުން މެޗު ވިނިން ލަނޑުތައް ކޯނަރުން އެންމެ ގިނައިން ކާމިޔާބުކުރި އަދަދެވެ.

މީގެއިތުރުން 0-1 ގެ ލީޑެއް ނެގުމުގައި މި ސީޒަނުގައި މިހާތަނަށް އާސެނަލްއިން ނުވަ ފަހަރަށް ކޯނަރުން ލަނޑު ޖަހާފައިވާއިރު މިއީ ވެސް ރެކޯޑެކެވެ.

ޗެލްސީ އަތުން ހޯދި މި މޮޅާއެކު އާސެނަލް، ލީގު ތާވަލުގެ އެއްވަނައިގައި އޮތީ 29 މެޗުން 64 ޕޮއިންޓު ހޯދައިގެންނެވެ. މެޗުން ބަލިވި ޗެލްސީ އަށް، 28 މެޗުން 45 ޕޮއިންޓާއެކު ލިބެނީ ތާވަލުގެ ހަވަނައެވެ.