ޤަވާއިދާ ޚިލާފަށް ރާއްޖެއަންނަ ބިދޭސީންގެ ޢަދަދު މަދުކޮށް، ރާއްޖެއަންނަ ބިދޭސީން އިތުރަށް މޮނިޓަރކުރުމުގެ މަސައްކަތް އިތުރަށް ހަރުދަނާކުރުމަށް މަސައްކަތްތަކެއްކުރަމުންދާކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
ރާއްޖެއަށް މަސައްކަތް ކުރަން އަންނަ ބިދޭސީންގެ ބޮޑު އިންސައްތައެއް ޙިއްޞާ ކުރަނީ ބަންގްލަދޭޝްގެ ރައްޔިތުންނެވެ. މީގެ ތެރެއިން ޤަވާއިދާ ޚިލާފަށް އުޅޭކަމަށް ފާހަގަކުރެވިފައިވަނީވެސް ބަންގްލަދޭޝް ރައްޔިތުންކަމަށް އިމިގްރޭޝަންގެ ތަފާސް ހިސާބުތަކުންދައްކައެވެ. އެހެން ކަމުން އެޤައުމުގެ ފަރާތަކާ ހަވާލުކޮށްގެން ބަންގްލަދޭޝްއިން ރާއްޖެއަންނަ މީހުންގެ މައުލޫމާތު ހޯދައި، އެމީހުން އަންނަނީ ޤާނޫނާ ޤަވާދާ އެއްގޮތަށް ހޯދަންޖެހޭ ހުއްދަތައް ހޯދައިގެން ކަން ކަށަވަރު ކުރުމަށް އެއިދާރާއިން ދަނީ މަސައްކަތްތަކެއް ކުރަމުންނެވެ.
އިމިގްރޭޝަންގެ އިންފޮމޭޝަން އޮފިސަރ ހަސަން ޚަލީލް ވިދާޅުވީ ބަންގްލަދޭޝްއިން ޤަވާއިދާ ޚިލާފަށް ރާއްޖެއަންނަ ބިދޭސީންގެ ޢަދަދު މަދުކޮށް، އެޤައުމުން ރާއްޖެއަންނަ ބިދޭސީން އިތުރަށް މޮނިޓަރކުރުމަށް ކަނޑައަޅައި، އެކަން ބަންގްލަދޭޝްގެ އޭޖެންސީއަކާ ޙަވާލުކުރުމުގެ މަސައްކަތްކުރަމުންދާކަމަށެވެ. އެގޮތުން މިކަމަށް ހުޅުވާލި ފުރުސަތުގައި ޕްރޮޕޯސަލް ހުށަހެޅި ފަރާތްތަކުގެ ބިޑް އިވެލުއޭޓްކުރުމުގެ މަސައްކަތްކުރަމުންދާކަމަށް އިމިގްރޭޝަނުން މަޢުލޫމާތުދެއެވެ.
ޚަލީލް ވިދާޅުވީ މިއާއެކު ދެން ކުރިއަށްއޮތްތާގައި ރާއްޖެއަށް ބިދޭސީން ގެނެވޭނީ، މިމަސައްކަތް ހަވާލުކުރެވޭ ބަންގްލަދޭޝްގެ އެޖެންސީން ކަނޑައަޅާ، 10 އެޖެންސީ މެދުވެރިކޮށްކަމަށެވެ. މިއީ އެޤައުމުގައި އެއްވެސް މައްސަލައެއް އެއް ނެތް އަދި ބަލައިގަނެވޭ ފެންވަރުގެ 10 އެޖެންސީއަށް ވާންޖެހޭކަމަށްވެސް ޚަލީލް ވިދާޅުވިއެވެ.
މީގެ އިތުރުން، ރާއްޖެ އެތެރެވާ ބިދޭސީންގެ ޕްރީ ޑިޕާޗަރ ހެލްތު ސްކްރީނިންގ އާއި ޕްރީ ޑިޕާޗަރ ސެކިއުރިޓީ ސްކްރީންކުރުމަކީ މިމަސައްކަތް ހަވާލުކުރެވޭ ފަރާތުގެ ޒިންމާއެއްކަމަށްވެސް ޚަލީލް ވިދާޅުވިއެވެ. އެގޮތުން ރާއްޖެ އަންނަ ބިދޭސީންނަކީ ރާއްޖެ އެތެރެވުމުގެ ކުރިން ނުރައްކާތެރި ބަލިތަކުގެ ގޮތުގައި ކަނޑައަޅާފައިވާ ބަލިތަކަށް ސްކރީންކުރެވި އަދި އެމީހަކީ ރާއްޖެއަށް އެއްވެސް ކަހަލަ ނުރައްކަލެއް ކުރިމަތިކުރުވާނެ ފަދަ މީހެއްކަންވެސް ބެލިގެންދާނެކަމަށް ޚަލީލް ވިދާޅުވިއެވެ.
ރާއްޖެއަންނަ ބިދޭސީން މިހާރު ހެލްތު ސްކްރީން ކުރެވެނީ، އެކަމަށްޓަކައި ދެވޭ 15 ދުވަހުގެ މުހުލަތުގެ ތެރޭގައި ހެލްތް ސްކްރީންކޮށް ނިންމަންޖެހޭގޮތަށެވެ. މިމުއްދަތުގެތެރޭގައިވެސް ގައިންގަޔަށް އަރާ ނުރައްކާތެރި ބަލިތައް ހުންނަކަން ފާހަގަކުރެވިފައިވެއެވެ. އިމިގްރޭޝަންގެ ތަފާސް ހިސާބުތަކަށް ބަލާއިރު ވޭތުވެދިޔަ 2 އަހަރުގެތެރޭގައި 105 ފަރާތެއް ފާހަގަކުރެވިފައިވާއިރު މިއަހަރުގެ ޖުލައި މަހުގެ ނިޔަލަށް 500 އަށްވުރެން ގިނަ ފަރާތެއް މިފަދަ ސިއްޙީ މައްސަލަތައް ހުރިކަން ފާހަގަކުރެވިފައިވާކަމަަށް އިމިގްރޭޝަނުން ވިދާޅުވެއެވެ.
ޚަލީލް ވިދާޅުވީ ހެލްތް ސްކްރީނިންގ ހަދަން ނިންމީ ތަފާސް ހިސާބުތަކަށް ބަލާއިރު ރާއްޖެއަންނަ ބިދޭސީންގެ ތެރޭގައި ސިއްޙީ މައްސަލަތައް ހުރިކަން ކޭސްތައް އިތުރުވަމުންދިއުމާއިގުޅިގެންކަމަށެވެ.
އިމިގްރޭޝަނުން ޤަބޫލުކުރައްވާގޮތުގައި މިފިޔަވަޅުތަކާއެކު ރާއްޖޭގައި ޤަވާއިދާ ޚިލާފަށް މަސައްކަތް ކުރާ ބިދޭސީންގެ ޢަދަދު މަދުވެގެންދާނެއެވެ. 2014ވަނަ އަހަރުގެ ބޯހިމެނުގެ ތަފާސް ހިސާބުތަކުން ދައްކާ ގޮތުގައި ރާއްޖޭގައި 636037 ބިދޭސީން ދިރިއުޅޭކަމަށް ރަޖިސްޓްރީކޮށްފައިވެއެވެ.