އަލިފާނުން ރައްކާތެރިވުމުގެ ހަފުތާ ފަށައިފި

ރަމަޟާން މަހާ ދިމާކޮށް އަލިފާނުގެ ހާދިސާތަކަށް ހޭލުންތެރިކުރުވުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިއަށްގެންދާ އަލިފާނުން ރައްކާތެރިވުމުގެ ހަފުތާ ފަށައިފިއެވެ. މި ހަރަކާތްތައް ކުރިއަށް ގެންދާނީ ޖެނުއަރީ 31 އިން ފެށިގެން ފެބްރުއަރީ މަހުގެ 7ވަނަ ދުވަހުގެ ނިޔަލަށެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސުން ހިންގާ މި ޕްރޮގްރާމަކީ، އަލިފާނުގެ ޙާދިސާތަކަށް އާންމު ރައްޔިތުން ހޭލުންތެރިކުރުމުގެ ގޮތުން ޢާއްމު ރައްޔިތުންނަށް ފޯރުކޮށްދޭން ބޭނުންވާ މެސެޖުތައް އެންމެ ފުރިހަމައަށް ފޯރުކޮށްދިނުމަށް މަގުފަހިކުރުމުގެ ގޮތުން ކޮންމެ އަހަރަކު ކުރިއަށްގެންދާ ޕްރޮގްރާމެކެވެ. މިއަހަރުގެ ޕްރޮގްރާމު ފެށުމަށް އަމީނިއްޔާ ސްކޫލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި، ހަފުތާގެ ހަރަކާތްތައް ފައްޓަވައިދެއްވީ، ދިފާޢީ ވުޒާރާގެ ޑެޕިއުޓީ މިނިސްޓަރ ފާތިމަތު މިޒްނާ އަލީއެވެ.

ހަރަކާތް ފެއްޓެވުމުގެ ގޮތުން ވާހަކަފުޅު ދައްކަވަމުން ޑެޕިއުޓީ މިނިސްޓަރ މިޒްނާ އަލީ ވަނީ، މި ހަރަކާތް މިހާރު ކުރިއަށްގެންދަނީ ރައީސުލްޖުމްހޫރިއްޔާގެ ރައްކާތެރި މުޖްތަމަޢެއް ބިނާކުރުމުގެ ސިޔާސަތާއި އެއްގޮތަަށްކަމަށާއި، މީގެ ކުރިން ހަމައެކަނި މާލެ ސަރަހައްދުގައި މި ޕްރޮގްރާމް ކުރިއަށް ގެންދިޔަ ނަމަވެސް މިހާރު ރާއްޖޭގެ އެކި ކަންކޮޅުތަކުގައި ޕްރޮގްރާމުގެ ހަރަކާތްތައް ކުރިއަށްދާކަމަށެވެ. ޑެޕިއުޓީ މިނިސްޓަރ ވަނީ މުޢައްސަސާތަކުން މަސައްކަތް ކުރިނަމަވެސް އަލިފާނުން ރައްކާތެރިވުމަކީ ފަރުދީ ޒިންމާއެއްކަން ހަނދާކޮށްދީފައެވެ.

"އަލިފާނުގެ ހާދިސާތަކުން ރައްކާތެރިވުމުގެ އެންމެ ވަރުގަދަ އައްޑަނަ އަކީ ފަރުދީ ޒިންމާ. ކޮންމެ ރައްޔިތަކީވެސް ދިރިއުޅޭ މާހައުލުގެ ރައްކާތެރިކަމަށް ފާރަވެރިވާ މީހަކަށްވާންޖެހޭ. މިއަދި ފަށާ ޕްރޮގްރާމުގެ ބޭނުމަކީވެސް މިފަދަ ހާދިސާތައް މަދު ކުރަން ރައްޔިތުން ހޭލުންތެރިކުރަން ހިންގޭ ޕްރޮގްރާމްތަކެއް. " މިޒްނާ ވިދާޅުވިއެވެ.

މިހަރަކާތުގެ ތެރެއިން ބަދިގެ ތެރޭގައި ހިނގާ އަލިފާނުގެ ހާދިސާތަކާއި ކަރަންޓުގެ ޒަރިއްޔާއިން ހިންގާ އަލިފާނުގެ ހަދިސާތަކުގެ މަޢުލޫމާތު ރައްޔިތުންނަށް ފޯރުކޮށްދެވޭނެއެވެ. މީގެ އިތުރުން އަލިފާން ރޯވުމަށް މެދުވެރިވާ ސަބަބުތަކާއި އެކަމުން ރައްކާތެރިވުމަށް މި ހަރަކާތުގެ ތެރެއިން ކިޔައި ދެވޭނެ ކަމަށް އެމްއެންޑީއެފުން ވިދާޅުވެއެވެ.

ކޮންމެ އަހަރަކުވެސް ކުރިއަށް ގެންދާ މި ހަރަކާތުގައި މިފަހަރުވެސް ސްކޫލްތައް ބައިވެރިވާނެއެވެ. މާލެއާއި ރާއްޖޭގެ އެކި ސަރަހައްދުތަކުގައި މި ހަރަކާތް ކުރިއަށް ގެންދިއުމަށް ހަމަޖެހިފައިވާއިރު، މި ހަރަކާތުގައި ސްކޫލުތަކުގެ ގްރޭޑް 7 އާއި ގްރޭޑް 12 ދެމެދު ކިޔަވަމުންދާ ދަރިވަރުންނަށް މައުލޫމާތު ދޭނެއެވެ. މީގެ އިތުރުން ބެލެނިވެރިންނާއި މުވައްޒަފުންނަށް މައުލޫމާތު ދިނުމުގެ އިތުރުން މާލެ ސަރަހައްދުން ރަސްފަންނު އަދި ހުޅުމާލޭގެ ހިޔާ ސަރަހައްދުގައި އާންމު އެއްވެ އުޅޭ ސަރަހައްދުތަކުގައި މައުލޫމާތު ފޯރުކޮށްދޭނެއެވެ.

މާލެ ސަރަހައްދުގައި މި ހަރަކާތް ކުރިއަށްގެންދަނީ، އަމީނިއްޔާ ސްކޫލާއި، މުހިޔިއްދީން ސްކޫލުގައި އާއި، ހުޅުމާލޭގެ ރެހެނދި ސްކޫލު އަދި ސަލާހުއްދީން ސްކޫލުގައެވެ. މީގެ އިތުރުން މާލެ ހިމެނޭހެން 50 ރަށެއްގައި މި ހަފުތާއި ހަރަކާތްތައް ކުރިއަށްގެންދާނެ ކަމަށް އެމްއެންޑީއެފުން ވިދާޅުވިއެވެ.

އެމްއެންއެޑީއެފުން ވަނީ މި ހަރަކާތުގައި ބައިވެރިވާ މީހުންނަށް، ފަޔަ ބްލޭންކެޓް ބޭނުންކޮށްގެން ރައްކާތެރި މާހައުލެއްގައި އަލިފާން ނިއްވަން ފުރުސަތު ދޭނެކަން ފާހަގަކޮށްފައެވެ. މީގެ އިތުރުން މި ހަރަކާތް ކުރިއަށްދާ ވަގުތު ވަޑައިގަންނަވާ ބޭފުޅުން މެދުގައި ގުރުއަތުން ހޮވޭ ފަރާތްތަކަށް ޚާއްސަ އިނާމުތަކެއް ލިބޭނެކަމަށް އެމްއެންޑީއެފްއިން ވިދާޅުވިއެވެ.

2012ވަނަ އަހަރުން ފެށިގެން ކޮންމެ އަހަރެއްގައި ވެސް ދަނީ މި ހަރަކާތް ބާއްވަމުންނެވެ.