ކޫއްޑުއާއި ކާޑެއްދުއާ ދެމެދު ވައިގެ ދަތުރުތައް ފަށައިފި

ރާއްޖޭގެ ދެކުނުގެ 4 އަތޮޅު ގުޅުވާލާ ކޫއްޑޫއާއި ކާޑެއްދޫއަށް ދަތުރު ބާއްވައިފިއެވެ.

ހުކުރު ދުވަހު ވަނީ، އައްޑޫ ސިޓީއިން ފުވައްމުލައް ސިޓީއަށް ދަތުރުތައް އިފްތިތާޙުކޮށްފައެވެ.

ކޫއްޑޫއާއި ކާޑެއްދޫއަށް ދަތުރު ފެށުމަށް މިދެރަށުގައި ވަނީ ވަކިވަކިން ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި އައިލެންޑް އޭވިއޭޝަންގެ އިސްވެރިންނާއި، ރަށްރަށުގެ ކައުންސިލްތަކާއި ރިސޯޓުތަކާއި، ގެސްޓްހައުސްތަކުގެ އިތުރުން ރަށުގެ އާންމުން ވަނީ ބައިވެރިވެފައެވެ.

ރާއްޖޭގެ ދެކުނުގެ 4 އަތޮޅު ވައިގެ މަގުން ގުޅުވާލުމާއި ގުޅޭގޮތުން ކޫއްޑޫގައި ހުންނަވާ ޕީއެސްއެމް ނިއުސްއަށް މައުލޫމާތު ދެއްވަމުން އައިލެންޑް އޭވިއޭޝަން ސަރވިސަސްގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ، މިއީ ރައްޔިތުންނަށް ގިނަގުނަ ފައިދާތަކެއް ލިބިގެންދާނެ ދަތުރުތަކަކަށް ވެގެންދާނެ ކަމަށެވެ. އެ ކުންފުނިން މި ޚިދުމަތްތައް ފެށީ، މި އޮޕަރޭޝަނަށް ބޭނުންވާ ހުރިހައި ސެޓަޕްއެއް އައްޑޫގައި ޤާއިމްކޮށްފައި ކަމަށެވެ. އަދި މިކަމަށް ބޭނުންވާ ބޯޓުތަކާއި އިންސާނީ ވަސީލަތްތައްވެސް ޤާއިމްވެފައިވާ ކަމަށްވެސް ވިދާޅުވިއެވެ.

މޯލްޑިވިއަނުން މި ޚިދުމަތް މިހާރު މި ފަށަނީ، ވަރަށް އަގުހެޔޮކޮށް އާންމުންނަށް ވަރަށް ފަސޭހަވާނެ ފަދަ ގޮތަކަށް. އަދި ވިޔަފާރިވެރިންނަށްވެސް ވަރަށް ފަސޭހަވާނެ ފަދަ ގޮތަކަށް އަޅުގަނޑުމެން މިކަން މިފެށީ. ސަރުކާރުގެ ފަރާތުން މި ވަޢުދު އިރާދަކުރެއްވިއްޔާ މި ފުއްދުނީ. އައިލެންޑް އޭވިއޭޝަނުން އަޅުގަނޑު ޔަޤީންކަން ދޭން ބޭނުން މިއަދު އަޅުގަނޑުމެން މި ފެށި ޚިދުމަތް ޑިމާންޑާއި އެއްގޮތަށް އަޅުގަނޑުމެން ޚިދުމަތް ދެމުން ދާނީ." ޢަލީ ސަލީމް ވިދާޅުވިއެވެ.

މި ދަތުރުތަކަކީ ރައްޔިތުންނަށް އެއްގޮތަށްވުރެ ގިނަ ގޮތްގޮތުން ފައިދާތަކެއް ލިބިގެންދާނެ ދަތުރުތަކަކަށް ވެގެންދާނެ ކަމަށް މި 4 އަތޮޅުގެ ރައްޔިތުން ވަނީ ފާހަގަކޮށްފައެވެ. މިއީ، ޞިއްޙީ ބޭނުމަށާއި، ޒަރޫރީ އެހެން ބޭނުންތަކަށް މި 4 އަތޮޅުގެ ރައްޔިތުން ކުރަމުން އައި ދިގު ދަތުރުތައް ވަރަށް ބޮޑަށް ކުރުވެ ފަސޭހަވެގެންދާނެ ކަމެކެވެ.

މޯލްޑިވިއަނުން މި ދަތުރުތައް ކުރަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައެވެ. މިއީ 15 މީހުންގެ ޖާގައިގެ ބޯޓުތަކެކެވެ. މި ދަތުރުތައް ކުރަން ހަމަޖެހިފައިވަނީ، 5 ސެކްޓަރ ނުވަތަ ރޫޓަށް ބަހާލައިގެންނެވެ. އެއީ، އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި، ފުވައްމުލަކުން ކާޑެއްދޫ އަދި ކޫއްޑޫއަށް ދަތުރު ކުރާ ގޮތަށެވެ. ދަތުރުތަކަށް އަގުތައް ކަނޑައަޅާފައިވަނީ، 500ރ އިން ފެށިގެންނެވެ.

މޯލްޑިވިއަންގެ ދެކުނުގެ ދަތުރުތަކާއި އަގުތައް
• ގަން - ފުވައްމުލައް - 500ރ
• ފުވައްމުލައް - ކޫއްޑޫ - 650ރ
• ފުވައްމުލައް - ކާޑެއްދޫ - 650ރ
• ގަން - ކާޑެއްދޫ - 900ރ
• ގަން - ކޫއްޑޫ - 900ރ

މިއީ، ދެކުނުގެ އަތޮޅުތައް ގުޅުވާލުމަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ސަރަޙައްދީ ދަތުރުފަތުރު ހަރުދަނާ ކުރުމަށް ގެންގުޅޭ ސިޔާސަތާއި އެއްގޮތްވާ ގޮތުގެ މަތިން ފެށި މަސައްކަތެކެވެ. މިދަތުރުތަކާއެކު މި ސަރަޙައްދުގެ ވައިގެ އުދުހުންތަކުގެ ހަބަކަށް އައްޑޫ ގަން ވެގެންދާނެ ކަމަށް މޯލްޑިވިއަނުން ވިދާޅުވިއެވެ.