ގޯލްޑަން ފުޓްސަލް ޗެލެންޖުގެ ޒޯން ބުރުގެ މެޗުތައް ނިމުމަކާ ހަމައަށް އަންނަމުންދާއިރު، ޒޯން 5 އިން ގަދަ 16 ގެ ޖާގަތައް ހޯދި ޓީމުތައް ކަށަވަރުވެއްޖެއެވެ.
މި ޖާގަތައް ކަށަވަރުވެފައިވަނީ ހުކުރު ދުވަހުގެރޭ މި ޒޯނުގައި ދ. ކުޑަހުވަދޫއާއި ފ. މަގޫދޫ ބައްދަލުކުރި މެޗު އެއްވަރުވުމުންނެވެ.
ވާދަވެރި ކުޅުމެއް ފެނިގެންދިޔަ މި މެޗު އެއްވަރުވީ 1-1 ގެ ނަތީޖާއަކުންނެވެ.
މެޗުގައި މަގޫދޫގެ ލަނޑު ޖަހައިދިނީ ފަހުމާން އަބްދުލް ޙަމީދެވެ. ކުޑަހުވަދޫގެ ލަނޑު ޖަހައިދިނީ އަބްދުﷲ ސަރުމަދުއެވެ.
މި މެޗުގެ މޮޅު ކުޅުންތެރިއަކަށް ހޮވުނީ މަގޫދޫގެ މޫސާ މާހިލް މިގުދާދެވެ.
މި މެޗަށް މި ދެ ޓީމު ނުކުތްއިރު، މި ޒޯނުގައި ހިމެނޭ ތިން ޓީމަށްވެސް ގަދަ 16 ގެ އުއްމީދު އޮތެވެ. އެއީ ދެވަނައިގެ ގޮތުގައި އޮތް މ. ދިއްގަރަށް ތިން ޕޮއިންޓު ލިބިފައިވީ ނަމަވެސް ގެއްލުން އެއް ގޯލު އޮތުމުންނެވެ. އެއްވަނައިގެ ގޮތުގައި ގަދަ 16 ޔަގީންކުރި ކުޑަހުވަދޫއަށް ހަތަރު ޕޮއިންޓު ލިބިފައިވާއިރު ފައިދާ ދެ ގޯލު އެބައޮތެވެ. މުބާރާތުން ވަކިވާން ޖެހުނު މަގޫދޫއަށް ލިބިފައިވަނީ އެއް ޕޮއިންޓެވެ. އެއ ޓީމަށްވެސް ގެއްލުން އެއް ގޯލު އެބައޮތެވެ.
މެޗުން މޮޅުވި ނަމަ މަގޫދޫއަށް ގަދަ 16 ގެ ޖާގައެއް ލިބުނީހެވެ.