ފަލަސްޠީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގި ޤަތުލުޢާންމުގެ ތެރެއިން ޝަހީދު ކޮށްލާފައިވާ 15 މީހެއްގެ ހަށިގަނޑު، އެ މީހުންގެ ޢާއިލާތަކާ ޙަވާލުކޮށްފިއެވެ. ޤަތުލުޢާންމުގެ ތެރެއިން ޔަހޫދީ ސިފައިން ހައްޔަރު ކޮށްގެން ގެންގޮސް، އަނިޔާކޮށް ޝަހީދު ކޮށްލާފައިވާ 15 މީހެއްގެ ހަށިގަނޑު، އެ މީހުންގެ ޢާއިލާތަކާ ޙަވާލު ކޮށްފައި މި ވަނީ، ޣައްޒާގައި ވެރިކަން ކުރާ ޙަމާސާއި ޔަހޫދީންނާ ދެމެދު އަމަލު ކުރަމުންދާ އެއްބަސްވުމުގެ ދަށުންނެވެ.
ޣައްޒާ ޤަތުލުޢާންމު މެދުކަނޑައިލައި، ޙަމާސާއި ޔަހޫދީންނާ ދެމެދު ޙަމަލާ ބަދަލު ކުރުން "ނަމެއްގައި" މެދުކަނޑައިލާފައި ވަނީ ހުސްވި އަހަރުގެ އޮކްޓޫބަރު މަހުގެ 10ވަނަ ދުވަހުއެވެ. އެ އެއްބަސްވުމާ އެކު ދެ ފަރާތުގެ ދެމެދުގައި އަސީރުން ބަދަލުކޮށް، މަރުވެފައިވާ އަސީރުންގެ ހަށިތައް ބަދަލު ކުރަން ފެށިއެވެ. ޔަހޫދީންގެ ބެލުމުގެ ދަށުގައި ޝަހީދު ކޮށްލާފައިވާ އިތުރު 15 މީހެއްގެ ހަށިގަނޑު ދޫކޮށްލާފައި މި ވަނީ، ޙަމާސްގެ ބެލުމުގައި ދަށުގައި ތިއްބައި މަރުވެފައިވާ އަސީރުންގެ ތެރެއިން އެންމެ ފަހު މީހާގެ ހަަށިގަނޑު، ޔަހޫދީންނާ ޙަވާލު ކުރުމާ ގުޅިގެންނެވެ.
މިއާއެކު، ޙަމާސާއި ޔަހޫދީންނާ ދެމެދު އަމަލު ކުރަމުންދާ އެއްބަސްވުމުގެ ކުރިއަށް އޮތް މަރުޙަލާ ފެށުމުގެ ފުރުޞަތު ފަހިވެގެން ގޮސްފައިވާ ކަމުގައި މަސްރަހު ދިރާސާ ކުރާ ފަރާތްތަކުން ޤަބޫލު ކުރެއެވެ. ދެ ފަރާތުގެ ދެމެދުގައި ޙަމަލާ ބަދަލު ކުރުން މެދުކަނޑައިލުމުގެ އެއްބަސްވުމެއް އެކުލަވައިލާފައި ވަނީ އެމެރިކާގެ ރައީސް ޑޮނަލްޑް ޓްރަމްޕްގެ އިސްނެންގެވުމުގެ ދަށުންނެވެ. އެ އެއްބަސްވުމުގެ ދަށުން ހަތިޔާރު ބެހެއްޓުމަށް ޙަމާސަށް މަޖުބޫރު ކުރަމުންދާއިރު، އެ ކަމާ މެދު ދެ ފަރާތުގެ ދެމެދުގައި އަދިވެސް ބޮޑެތި ޚިޔާލު ތަފާތުވުންތަކެއް އެބައޮތެވެ.
އެއްބަސްވުމުގެ ދަށުން ޔަހޫދީންގެ ޖަލުތަކުގައި އަނިޔާކޮށް ޝަހީދު ކޮށްލާފައިވާ ފަލަސްޠީނުގެ 360އެއްހާ ރައްޔިތުންގެ ހަށިތައް އެ މީހުންގެ ޢާއިލާތަކާ ޙަވާލު ކޮށްފައިވާއިރު، އެއީ ކޮން ބަޔެއްގެ ހަށިތަކެއް ކަން ދެނެގަތުމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. ސަބަބަކީ، ޝަހީދު ކޮށްލާފައިވާ މީހުންގެ ހަށިތަކަށް ޔަހޫދީ ސިފައިން ބޮޑެތި ޖިސްމާނީ އަނިޔާތައް ދީފައިވުމެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ، އޮކްޓޫބަރަށް ފަހު ޔަހޫދީން ޙަވާލު ކޮށްފައިވާ ހަށިތަކުގެ ތެރެއިން މިހާތަނަށް ދެނެގަނެވިފައި ވަނީ އެންމެ 99 މީހެއްގެ ހަށިގަނޑު ކަމުގައެވެ.
ޙަމަލާ ބަދަލު ކުރުން މެދުކަނޑައިލުމުގެ އެއްބަސްވުމަށް އަމަލު ކުރަމުން ދިޔަ ނަމަވެސް، ޔަހޫދީ ފައުޖުން އަދިވެސް ދަނީ ޣައްޒާގެ އެކި ކަންކޮޅުތަކަށް ނިރުބަވެރި ޙަމަލާތައް އަމާޒު ކުރަމުންނެވެ. އަދި، ޣައްޒާގެ ބައެއް ސަރަޙައްދުތަކުގައި ޔަހޫދީ ސިފައިންގެ ލަޝްކަރުތައް އަދިވެސް ދަނީ ހަރަކާތްތެރިވަމުންނެވެ. ޣައްޒާގެ ޞިއްޙީ ދާއިރާގެ އޮފިޝަލުން ބުނީ، ޚާން ޔޫނިސަށް ދާދިފަހުން ޔަހޫދީ ސިފައިން ދިން ނިރުބަވެރި ޙަމަލާތަކެއްގައި ދެ މީހަކު ޝަހީދު ކޮށްލާފައިވާ ކަމުގައެވެ. ޣައްޒާގެ ޞިއްޙީ ވުޒާރާއިން ބުނީ، އޮކްޓޫބަރުގައި ޙަމަލާ ބަދަލު ކުރުން މެދުކަނޑައިލުމުގެ އެއްބަސްވުމަށް އަމަލު ކުރަން ފެށި ފަހުން ޔަހޫދީ ފައުޖުން ދީފައިވާ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 490ށް އުފުލިފައިވާ ކަމުގައެވެ.