މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ އަންހެން އިވެންޓުގެ ފައިނަލުގެ ޖާގައެއް އެރީނާ ސަބަލެންކާ އާއި އެލޭނާ ރައިބަކީނާ ހޯދައިފި އެވެ.
ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ ގޮތުގައި މިވަގުތު ހުރި ބެލަރޫސްގެ ސަބަލެންކާ ފައިނަލުގެ ޖާގައެއް ހޯދާފައިވަނީ ޔުކްރޭންގެ އެލީނާ ސްވިޓޮލީނާ އާއި ދެކޮޅަށް ކުޅުނު މެޗު ހައެއް ދޭއް އަދި ހައެއް ތިނެއްގެ ނަތީޖާއަކުން މެޗު ކާމިޔާބުކޮށްގެންނެވެ.
މިއީ އޮސްޓްރޭލިއަން އޯޕަން ޓެނިސް މުބާރާތުގެ ސެމީ ފައިނަލް މެޗެއް ނަމަވެސް މި މެޗުގެ ތެރޭގައި ދުނިޔޭގެ ޖިއޯ ޕޮލިޓިކްސް ވަނީ ވަރަށް ބޮޑަށް ފެތުރިގެން ގޮސްފަ އެވެ. އެގޮތުން ރަޝިޔާ އާއި ޔުކްރޭން އާއި ދެމެދު ހިނގަދުމުންދާ ހަނގުރާމައިގެ ސަބަބުން ރަޝިޔާ އާއި ބެލަރޫސްގެ ކުޅުންތެރިން ގްރޭންޑް ސްލޭމް މުބާރާތް ތަކުގައި ވާދަކުރުން ވަނީ މަނާކޮށްފަ އެވެ. ބެލަރޫސް އިން ވަނީ މި ހަނގުރާމައިގެ ތެރޭގައި ރަޝިޔާގެ އަސްކަރިއްޔާއަށް އެ ގައުމުގެ ބޭސްތައް ބޭނުން ކުރުމުގެ ހުއްދަ ދީފަ އެވެ.
އުމުރުން 27 އަހަރުގެ ސަބަލެންކާ މި މެޗު ކާމިޔާބުކޮށް މުބާރާތުގެ ފައިނަލުގެ ޖާގައެއް ހޯދާފައިވާއިރު މިއީ އޮސްޓްރޭލިއަން އޯޕަން ޓެނިސް މުބާރާތުގެ ފައިނަލުން އޭނާ ޖެހިޖެހިގެން ފުރުސަތު ހޯދި ހަތަރުވަނަ ފަހަރެވެ.
ފައިނަލުގައި ސަބަލެންކާ އާއި ދެކޮޅަށް ނިކުންނަ އެލޭނާ ރައިބަކީނާ މި މުބާރާތުގެ ފައިނަލުގެ ޖާގައެއް ހޯދާފައިވަނީ އެމެރިކާގެ ޖެސިކާ ޕެގޫލާ އާއި ދެކޮޅަށް ކުޅުނު މެޗު ހައެއް ތިނެއް އަދި ހަތެއް ހައެއްގެ ނަތީޖާ އަކުން މެޗު ކާމިޔާބުކޮށްގެންނެވެ.
ރަޝިޔާ އަށް އުފަން އުޒްބެކިސްތާނުގެ ރައިބަކީނާ މި މުބާރާތުގެ ފައިނަލުގެ ޖާގައެއް ހޯދާފައިވާއިރު އޭނާ މަސައްކަތް ކުރަމުންދަނީ ދެވަނަ ފަހަރަށް ބޮޑު މުބާރާތެއް ކާމިޔާބު ކުރުމަށެވެ. މީގެ ކުރިން ރައިބަކީނާ ވަނީ 2022 ވަނަ އަހަރުގެ ވިމްބަލްޑަން ޓެނިސް މުބާރާތް ކާމިޔާބުކޮށްފަ އެވެ.
މި މުބާރާތުގެ ފައިނަލް މެޗު އޮންނާނީ އަންނަ ހޮނިހިރު ދުވަހު އެވެ.