މިދިޔަ އަހަރު ފަހު ކުއާޓާގައި ސިނާޢަތްތަކުން ވަޒީފާއަށް ނެގި މިންވަރު އިތުރު

މިދިޔަ އަހަރު ފަހު ކުއާޓާގައި އިޤްތިޞާދުގައި ހިއްސާކުރާ މައިގަނޑު ސިނާޢަތްތަކުން ވަޒީފާތަކަށް މީހުން ނެގި މިންވަރު އިތުރުވެފައިވާ ކަމަށް މަރުކަޒީ ބޭންކް، އެމްއެމްއޭއިން ވިދާޅުވެއްޖެއެވެ. އެމްއެމްއޭއިން މިކަން ހާމަކޮށްފައިވަނީ އެއިދާރާގެ ކުއާޓަލީ ބިޒްނަސް ސާވޭ ރިޕޯޓުގައެވެ.

މަރުކަޒީ ބޭންކު އެމްއެމްއޭގެެ ކުއާޓަލީ ބިޒްނަސް ސާވޭ ރިޕޯޓުގައި ރާއްޖޭގައި އިޤްތިޞާދުގައި ހިއްސާކުރާ މައިގަނޑު 4 ސިނާޢަތުގައި ހަރަކާތްތެރިވާ 113 ވިޔަފާރިއަކުން މައުލޫމާތު ހޯދާފައިވެއެވެ. މި ވިޔަފާރިތައް ހޮވާފައިވަނީ އެދާއިރާއެއްގައި އެންމެ ގިނައިން އާމްދަނީ ލިބޭކަމަށް މީރާއަށް ރިޕޯޓްކޮށްފައިވާ ކުންފުނިތަކުން ކަމަށް، އެމްއެމްއޭއިން ވިދާޅުވިއެވެ.

މިސާވޭއިން ދެއްކިގޮތުން ރާއްޖޭގެ ފަތުރުވެރިކަމުގެ ސިނާޢަތާއި، އިމާރާތްކުރުމުގެ ސިނާޢަތާއި، ހޯލް ސޭލް އަދި ރީޓެއިލް ވިޔަފާރިއާއި ދަތުރުފަތުރާއި މުވާސަލާތީ ޚިދުމަތުގެ ދާއިރާތަކުން ވަޒީފާއަށް މީހުން ނަގާ މިންވަރު ފަހު ކުއާޓަގައި ވަނީ އިތުރުވެފައެވެ. ސާވޭއިން ދައްކާގޮތުން އެއްވެސް ދާއިރާއެއްގައި ވަޒީފާތައް މަދުކޮށްފައި ނުވެއެވެ. މިކަން ވަޒަން ކުރަނީ ސާވޭގައި ވިޔަފާރިތަކުން އެ ތަނެއްގައި ވަޒީފާ އަދާކުރާ މުވައްޒަފުންގެ އަދަދު އިތުރުވެފައިވާކަމަށް ނުވަތަ ނުވާ ކަމަށް ދޭ ޖަވާބަށް ބިނާކޮށެވެ.

އެންމެ ބޮޑު ކުރިއެރުމެއް ފަހު ކުއާޓާގައި ހޯދާފައިވަނީ ފަތުރުވެރިކަމުގެ ސިނާޢަތުންނެވެ. ފަތުރުވެރިކަމުގެ ޕީކް ސީޒަނާއެކު މި ސިނާޢަތުގެ ތެރެއިން ވަޒީފާއަށް މީހުން ނަގާ މިންވަރު އިތުރުވެފައިވާ ކަމަށް މަރުކަޒީ ބޭންކުން ވިދާޅުވިއެވެ. އެގޮތުން އެމްޕްލޮއިމެންޓް އިންޑެކްސް ވަނީ 56 ޕޮއިންޓުން 57 ޕޮއިންޓަށް އިތުރުވެފައި ކަމަށް އެމްއެމްއޭއިން ވިދާޅުވެއެވެ. ޕީކް ސީޒަނާއެކު ސިނާޢަތުން ލިބޭ އާމްދަނީވެސް ވަނީ އިތުރުވެފައެވެ. އަދި މުވައްޒަފުންގެ މުސާރައަށް ކުރާ ޚަރަދުވެސް ފަހު ކުއާޓާގައި އިތުރުވެފައިވެއެވެ. ފަތުރުވެރިކަމުގެ ސިނާޢަތަކީ ރާއްޖޭގައި އެންމެ ގިނަ ބަޔަކު ވަޒީފާ އަދާކުރާ ސިނާޢަތް ކަމަށްވާއިރު، މިސިނާޢަތުން މި ގޮތުގައި މިއަހަރުގެ ފުރަތަމަ ކުއާޓާގައިވެސް ހިފަހައްޓާނެ ކަމަށް މަރުކަޒީ ބޭންކުން ލަފާކުރެއެވެ.

ފަތުރުވެރިކަމުގެ ސިނާޢަތުގެ އިތުރުން ދެން ކުރިއެރުމެއް ހާސިލްކޮށްފައިވަނީ ހޯލް ސޭލް އަދި ރީޓެއިލް ވިޔަފާރީގެ ދާއިރާއިންނެވެ. މިދާއިރާގައި އާންމު ވިޔަފާރި ފަހު ކުއާޓާގައި ދަށްވިނަމަވެސް، ވަޒީފާ އަދާކުރާ މީހުން ނަގާ މިންވަރު އިތުރުވެފައިވެއެވެ. އެގޮތުން އެމްޕްލޮއިމެންޓް އިންޑެކްސް މިދާއިރާގައި ވަނީ 46 ޕޮއިންޓުން 69 ޕޮއިންޓަށް އިތުރުވެފައެވެ. މިދާއިރާގައިވެސް މުވައްޒަފުންނަށް ކުރާ ޚަރަދު އިތުރުވެފައިވާ ކަމަށް ބިޒްނަސް ސާވޭ ރިޕޯޓުން ދައްކައެވެ. އެމްއެމްއޭއިން ވަނީ މިއަހަރުގެ ފުރަތަމަ ކުއާޓާގައި ވިޔާފަރިއަށް ހެޔޮ ބަދަލެއް އަންނާނެ ކަމަށް ލަފާކޮށްފައެވެ.

ރާއްޖޭގެ މިވަގުތު އިޤްތިޞާދުގައި ދެވަނައަށް އެންމެ ބޮޑު ހިއްސާއެއް އަދާކުރާ އިމާރާތްކުރުމުގެ ސިނާޢަތުގެ އެމްޕްލޮއިމެންޓް އިންޑެކްސް 29 ޕޮއިންޓުން 36 ޕޮއިންޓަށް ވަނީ އިތުރުވެފައެވެ. މި ދާއިރާގައި މުވައްޒަފުންނަށް ކުރާ ޚަރަދު ތަންކޮޅެއް ދަށްވި ނަމަވެސް ޖުމްލަ ގޮތެއްގައި ރަނގަޅު މިނެއްގައި ހިފެހެއްޓިފައިވާ ކަމަށް މަރުކަޒީ ބޭންކުން ވިދާޅުވެއެވެ. މިދާއިރާގައި ވަޒީފާއަށް މީހުން ނަގާ މިންވަރު އިތުރުވެފައިވަނީ އިމާރާތްކުރުމުގެ މަޝްރޫޢުތައް ކުއާޓާތެރޭގައި އިތުރުވުމާއި ގުޅިގެންނެވެ. މިއަހަރު ފުރަތަމަ ކުއާޓާގައިވެސް އިމާރާތްކުރުމުގެ ސިނާޢަތް މި ދުވެލީގައި ހިފަހައްޓާނެ ކަމަށް ވަނީ ލަފާކޮށްފައެވެ.

އެމްއެމްއޭގެ ކުއާޓަލީ ބިޒްނަސް ސާވޭ ރިޕޯޓުގައި ވަޒީފާތަކަށް މީހުން ނަގާ މިންވަރަށް ބޮޑު ބަދަލެއް ނާންނަ ކަމަށް ރިޕޯޓްކޮށްފައިވަނީ ދަތުރުފަތުރާއި މުވަސާލާތީ ޚިދުމަތްތަކުގެ ދާއިރާގައެވެ. މިދާއިރާއިން މީހުން ނަގާ މިންވަރަށް ބަދަލެއް ނައިސް، އެމްޕްލޮއިމެންޓް އިންޑެކްސް ހުރީ މި ކުއާޓާގައި 14 ޕޮއިންޓުގައެވެ. އެހެން ކަމުން އިތުރުވި ވަޒީފާތަކުގެ އަދަދު މަދު ނަމަވެސް ވިޔަފާރިތަކުން ވަޒީފާތައް މަދުކޮށްފައި ނުވާކަމަށް މިކަމުން ދައްކުވައިދެއެވެ. އެމްއެމްއޭއިން ފާހަކޮށްފައިވާ ގޮތުގައި މިދާއިރާގައި ވަޒީފާއަށް މީހުން ނެގި މިންވަރު ހިފެހެއްޓުނު ނަމަވެސް މުވައްޒަފަކަށް ކުރާ ޚަރަދުގެ މިންވަރު ފަހު ކުއާޓާގައި އިތުރެވެ. މަރުކަޒީ ބޭންކުން ވަނީ މިއަހަރުން ފެށިގެން ހެޔޮ ބަދަލެއް ފެނިގެންދާނެ ކަމަށް ލަފާކޮށްފައެވެ.

އެމްއެމްއޭގެ ކުއާޓަލީ ބިޒްނަސް ސާވޭ ރިޕޯޓުން ދައްކާގޮތުން، ޖުމްލަގޮތެއްގައި ހުރިހާ ސިނާޢަތަކުންވެސް ވިޔަފާރީގެ ކުރިއެރުން ވަނީ ހޯދާފައެވެ. އަދި އަހަރު ފެށިގެން މިހިނގާ ކުއާޓާގައި ރަނގަޅު ނަތީޖާއެއް އެކި ސިނާޢަތްތަކުގައި ހަރަކާތްތެރިވާ ވިޔަފާރިތަކުން ހޯދާނެ ކަމަށް ވަނީ ލަފާކޮށްފައެވެ.