އިސްލާމީ އަޚުވަންތަކަން ޤާއިމުކުރުމުގެ މަޤްޞަދުގައި މި އަހަރުގެ އަޟްހާ ޢީދު ދުވަހާއި ގުޅުވައިގެން، ހޮސްޕިޓަލްތަކުގައި ތިބި ބަލި މީހުންނަށް ޢީދު ހަދިޔާ ބެއްސެވުމުގެ ޙަރަކާތެއް އިސްލާމިކް މިނިސްޓްރީން ކުރިއަށް ގެންދަވައިފިއެވެ.
އަޟްހާ ޢީދާއި ގުޅިގެން ރާއްޖޭގެ އެކި ކަންކޮޅުތަކުގައި ދަނީ ތަފާތު އެކި ޙަރަކާތްތަކެއް ހިންގަމުންނެވެ. އިސްލާމިކް މިނިސްޓްރީން އިސްނަންގަވައިގެން ކުރިއަށް ގެންދެވި މި ޙަރަކާތުގައި ފުލުހުންނާއި އެމްއެންޑީއެފް އަދި ބައެއް އަމިއްލަ ޖަމްޢިއްޔާތައް ބައިވެރިވެފައިވެއެވެ. މި ޙަރަކާތުގައި އައިޖީއެމްއެޗް، އޭޑީކޭ، ވިލިނގިލި އަދި ހުޅުމާލެ ހޮސްޕިޓަލްގައި ތިބި ބަލި މީހުންނަށް ވަނީ ޢީދު ހަދިޔާ ބަހާފައެވެ.
އިސްލާމިކް މިނިސްޓްރީގެ އިސް އިމާމު ޝައިޚް ހައިޝަމް މުޙައްމަދު ވިދާޅުވީ މި ޙަރަކާތުގައި ހަތަރު ސަތޭކައެއްހާ މީހުންނަށް ހަދިޔާ ބަހާފައިވާކަމަށެވެ. މީގެ އިތުރުން މާދަމާއާއި އަންގާރަ ދުވަހު ރަސްފަންނުގައި ކުޑަކުދިންނަށް ޚާއްޞަ ޢީދު ޙަރަކާތެއް ބޭއްވުމަށް ހަމަޖެހިފައިވާކަމަށްވެސް އިސްލާމިކް މިނިސްޓްރީން މަޢުލޫމާތުދެއްވައެވެ.