ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ މުޖާހިދުންގެ ތެރެއިން، ޣައްޒާގައި އަމަން ބެލެހެއްޓުމުގައި ހަރަކާތްތެރިވާ 10،000 އެއްހާ ފުލުހުން، ޣައްޒާ ހިންގުމާ ޙަވާލުވާ ވަގުތީ ނިޒާމުގައި ޝާމިލުކުރަން ބޭނުންވާކަން ހާމަވެއްޖެއެވެ.
ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގަމުން ދިޔަ ޤަތުލުޢާންމު މިދިޔަ އަހަރުގެ އޮކްޓޫބަރު މަހުގެ 10ވަނަ ދުވަހު މެދުކަނޑައިލިއިރު، ޣައްޒާގެ ދެބައި ކުޅަ އެއްބައި ސަރަޙައްދުތައް ބަލަހައްޓަނީ ޙަމާސުންނެވެ.
އެމެރިކާގެ ރައީސް ޑޮނަލްޑް ޓްރަމްޕް މެދުވެރިވެގެން އެކުލަވައިލި އެއްބަސްވުމުގެ ދަށުން، ޣައްޒާގެ ގިނަ ސަރަޙައްދުތަކުން ޔަހޫދީންގެ ނިރުބަވެރި ސިފައިން ފޭބުމާއެކު، ޙަމާސް ޖަމާޢަތުގެ މުޖާހިދުން ހަތިޔާރު ބަހައްޓަންޖެހެއެވެ.
ޙަމާސުން ރަހީނު ކޮށްފައި ތިބި އަސީރުންގެ ތެރެއިން ދިރިތިބި މީހުން މިނިވަންކޮށް، މަރުވި އަސީރުންގެ ތެރެއިން އެންމެ ފަހު މީހާގެ ހަށިގަނޑު ފެނުމާ އެކު، ޙަމާސާއި ޔަހޫދީންނާ ދެމެދު ވެފައިވާ އެއްބަސްވުމުގެ ކުރިއަށް އޮތް މަރުހަލާގެ މަސައްކަތް ވަނީ ފެށިފައެވެ.
އެ މަރުޙަލާގެ ދަށުން، ޣައްޒާގެ އިދާރީ ހިންގުމާ ޙަވާލުވާން ހިމަނާފައިވަނީ، އެމެރިކާގެ ބެލުމުގެ ދަށުން އެކުލަވާލައި ޚާއްޞަ ޤައުމީ ކޮމިޓީއަކުންނެވެ. އެ ކޮމިޓީ އެކުލަވައިލަން އެމެރިކާއިން އިސްވެ ހުށަހަޅާފައިވަނީ، ޣައްޒާގައި ވެރިކަންކުރުމުގައި ޙަމާސްގެ އެއްވެސް ބައިވެރިވުމެއް ނޯންނަ ގޮތަށެވެ.
ނަމަވެސް، ޙަމާސްގެ ދަށުން މަސައްކަތް ކުރާ މުވައްޒަފުންނަށް ފޮނުވި ސިޓީއަކާ ޙަވާލާދީ ރޮއިޓަރސް ނޫހުން ބުނީ، ޣައްޒާ ހިންގުމާ ޙަވާލުވާ ކޮމިޓީއަށް އެއްބާރުލުން ދިނުމަށް މުވައްޒަފުންގެ ކިބައިން ޙަމާސުން އެދިފައިވާ ކަމަށެވެ.
ސަލާމަތީ ބާރުތަކާއި އިދާރީ ހިންގުމުގައި 40،000 އެއްހާ މުވައްޒަފުން ތިބިއިރު، އެ މީހުން އައު އިދާރީ އޮނިގަނޑުގެ ތެރޭގައި ޝާމިލުކުރަން މަސައްކަތްކުރަމުންދާކަމަށް ޙަމާސުން ބުނެފައިވާކަމަށް އެ ނޫހުން ބުންޏެވެ.
އޭގެތެރޭގައި ޣައްޒާގެ އެކި ސަރަޙައްދުތަކުގައި އަމަން ބެލެހެއްޓުމުގައި ހަރަކާތްތެރިވާ 10،000 އެއްހާ ޙަމާސްގެ ފުލުހުން ވެސް ހިމެނޭކަމަށް ބުނެފައިވެއެވެ.
ޙަމާސްގެ ތަރުޖަމާނު ޙާޒިމް ޤާސިމް ވިދާޅުވީ، 15 މެމްބަރުންގެ މައްޗަށް އެކުލެވޭ ޤައުމީ ކޮމިޓީއާ، ޣައްޒާގެ އިދާރީ ހިންގުން ވަގުތުން ޙަވާލުކުރަން އެ ޖަމާޢަތުން ތައްޔާރު ކަމަށެވެ.
ނަމަވެސް، ޣައްޒާގެ އިދާރީ އައު އޮނިގަނޑުގައި ޤާބިލު އަދި ތަޖުރިބާކާރުން ހިމަނަން ދެކޮޅު ހަދައި، އިންސާނީ ވަޞީލަތްތައް ބޭކާރުނުކުރާނެކަމަށް ޢުއްމީދު ކުރައްވާ ކަމަށެވެ.