އޮމަދޫގައި އަލަށް ޢިމާރާތްކުރި މަސްޖިދުއްރަހުމާ ހުޅުވައިފި

އދ. އޮމަދޫގައި އަލަށް ޢިމާރާތްކުރި "މަސްޖިދުއްރަޙުމާ"ގެ މަސައްކަތް ނިންމާ، ރަސްމީކޮށް ހުޅުވައިފިއެވެ.

މަސްޖިދުއްރަހުމާ މިސްކިތަކީ، ހެޔޮއެދޭ ފަރާތަކުުން އެ ރަށުގެ ރައްޔިތުންނަށްޓަކައި ބިނާކޮށްދިން މިސްކިތެކެވެ.

މި މިސްކިތް ހުޅުވުމަށް އޮމަދޫގައި ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި އޮމަދޫ ކައުންސިލްގެ އިސްވެރިންނާއި ރަށުގެ ގިނަ އަދަދެއްގެ ރައްޔިތުން ބައިވެރިވިއެވެ.

މި ރަސްމިއްޔާތުގައި، މަސްޖިދުއްރަހުމާ ރަސްމީކޮށް ހުޅުވައިދެއްވީ، އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛް އަބްދުލް އަޒީޒް ޖަމާލް އަބޫބަކުރެވެ.

މިސްކިތް ހުޅުވައިދެއްވުމަށްފަހު، ސްޓޭޓް މިނިސްޓަރު ވަނީ މިސްކިތް ބިނާކޮށްދެއްވި ފަރާތަށް ޝުކުރު އަދާކުރައްވައި، މިސްކިތުގެ ބޭނުން އެންމެ ހެޔޮގޮތުގައި ހިފުމަށް ރަށުގެ ރައްޔިތުންނަށް އިލްތިމާސްކުރެއްވިއެވެ.

ރާއްޖޭގެ އެކިކަންކޮޅުތަކުގައި އިމާރާތްކުރަން ފަށާފައިވާ މިސްކިތްތަކުގެ މަސައްކަތުގެ ދުވެލި އަވަސްކޮށް ވީހާވެސް އަވަހަށް މަޝްރޫޢުތައް ނިންމުމަށް އިސްލާމީ ކަންތައްތަކާބެހޭ ވުޒާރާއިން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން ކުރިއަށް އޮތް ރަމަޟާން މަހުގެ ކުރިން 15 މިސްކިތެއް ހުޅުވުމަށް އަންނަނީ ތައްޔާރުވަމުންނެވެ.

ރައްޔިތުންގެ ހޭލުންތެރިކަން ދީނީގޮތުން އިތުރުކޮށް، މިސްކިތްތަކުގައި ދީނީ ޢިލްމު ފެތުރުމަށް މަގުފަހިކުރާ ތަންތަނަށް ހެދުމަށް ސަރުކާރުންދަނީ މަސައްކަތްކުރަމުންނެވެ. އެގޮތުން ކީރިތި ޤުރުއާނަށް ލޯބިޖެއްސުމާއި ނަމާދަށް ލޯބިޖެއްސުން ފަދަ މުހިއްމު ޝިޢާރުތަކަށް މަސައްކަތް ކުރަމުންދާކަން ފާހަގަކޮށްލެވެެއެވެ.