މިއަހަރުގެ އަޟްޙާ ޢީދު ފާހަގަކުރުމުގެ ގޮތުން ޞަދަޤާތު ފައުންޑޭޝަނުން "ޢީދުފޯރި" ގެ ނަމުގައި ހުޅުމާލޭގައި ކުލަގަދަ ޙަރަކާތްތަކެއް ހިންގަން ހަމަޖައްސައިފިއެވެ.
އެ ޖަމްޢިއްޔާއިން ބުނާގޮތުގައި އަންނަ ހޯމަ ދުވަހު ހުޅުމާލެ ސެންޓްރަލް ޕާކްގައި "ޢީދު ފޯރި" ގެ ނަމުގައި ކުރިއަށްގެންދާ މި ޙަރަކާތް ފަށާނީ ހަވީރު 4 ޖަހާއިރުއެވެ. އަދި ރޭގަނޑު 9 ން މެންދަމު 12 އަށްވެސް މި ޙަރަކާތް ކުރިއަށް ގެންދާނެއެވެ.
މީޑިއާއަށް މަޢުލޫމާތުދެއްވަމުން މިކަންތައް އިންތިޒާމުކުރާ ފަރާތެއްކަމަށްވާ މުޙައްމަދު ނާޒިރު ވިދާޅުވީ އަޟްޙާ ޢީދުގައި އެކި ރަށްރަށަށް ނުވަތަ ރާއްޖެއިން ބޭރަށް ނުދެވި ތިބި މީހުންނަށް އަމާޒުކޮށްގެން ރާވާ ޢިދު ޙަރަކާތުގައި އުފާފާޅުކުރުމުގެ ވަގުތުކޮޅެއް ހޭދަކުރެވޭނެ ފަދަ ގޮތަކަށް އިންތިޒާމުތައް ހަމަޖެހިފައިވާނެ ކަމަށެވެ. އެގޮތުން މި ޙަރަކާތް ފަށާނީ ކުޑަކުދިންގެ ހަވީރަކުން ކަމަށާއި، މި ހަވީރުގައި ކުޑަކުދިންނަށް ޚާއްޞަ 29 ކުޅިވަރެއް ހިމެނަނާނެ ކަމަށް ވިދާޅުވިއެވެ. މި ޙަރަކާތް ކުރިއަށްގެންދާނީ ޚާއްޞަ އެހީއަށް ބޭނުންވާ ކުދިންނަށްވެސް ކުޅިވަރުތަކުގައި ބައިވެރިވެވޭނެ އިންތިޒާމުތަކާއި އެކުގައި ކަމަށް އޭނާ ވިދާޅުވިއެވެ.
އަދި ރޭގަނޑު ބާއްވާ ސްޓޭޖް ޝޯވްގައި ރާއްޖޭގެ މަޝްހޫރު ފަންނާނުންތަކެއްގެ ހުށަހެޅުންތަކެއް އޮންނާނެ ކަމަށް މުޙައްމަދު ނާޒިރު ވިދާޅުވިއެވެ. މީގެ އިތުރަށް ޢީދު ފޯރި ގެނައުމުގެ ގޮތުން ތަފާތު ވައްތަރުގެ މާލިތައްވެސް ފެނިގެންދާނެ ކަމުގައި އޭނާ ވިދާޅުވިއެވެ.
ހުޅުމާލެ ސެންޓްރަލް ޕާކްގައި ހިންގާ މިޙަރަކާތުގައި ކެންޓީނުގެ ޚިދުމަތާއި ތަފާތު އެކި ސްޓޯލްތައް ހުންނާނެ ކަމަށް ޞަދަޤާތު ފައުންޑޭޝަނުން ބުނެއެވެ. ޞަދަޤާތު ފައުންޑޭޝަނަކީ ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމްގެ އިސްނެންގެވުމާއެކު ހިންގާ ޖަމްޢިއްޔާއެކެވެ. އެހީއަށް ބޭނުންވާ ފަރާތްތަކަށް އެހީ ފޯރުކޮށްދިނުމުގެ މަޤްޞަދުގައި ހިންގާ މި ޖަމްޢިއްޔާއިން އެކި އެކި ފަރާތްތަކަށް ދަނީ އެހީ ފޯރުކޮށްދެމުންނެވެ. މި ޖަމްޢިއްޔާ ހިންގަން ފެށީ މިދިޔަ 2015 ވަނަ އަހަރުއެވެ.