މެންޗެސްޓާ ޔުނައިޓެޑުން ދާން ބޭނުންވެފައި ހުރި ޒުވާން މިޑްފީލްޑަރު ކޯބީ މައިނޫ ނުވިއްކާނެ ކަމަށާއި އަދި ޓީމުގެ މުހިންމު ދެ ކުޅުންތެރިން ކަމަށްވާ ހެރީ މެގުއާ އާއި ކަސެމީރީގެ ކުރިމަގާމެދު ވަކި ގޮތެއް ނުނިމޭ ކަމަށް ކޯޗު ރުބެން އަމޮރިމް ބުނެފި އެވެ.
މައިނޫ ޔުނައިޓެޑުން ދާން ބޭނުންވަނީ އޭނާ އަށް ކުޅުމުގެ ފުރުސަތު ލިބޭވަރު މަދު ވެގެންނެވެ. ނަމަވެސް ކޯޗު އަމޮރިމް ބުނީ މައިނޫ އަކީ ޔުނައިޓެޑްގެ ކުރިމަގާ ގުޅިފައި ހުރި ކުޅުންތެރިއެއް ކަމަށާއި އޭނާ ވިއްކާލުމުގެ ހިޔާލު ކުލަބުގައި ނެތް ކަމަށެވެ.
"އޭނާ އަކީ އަދި ވަރަށް ޒުވާން ކުއްޖެއް. އޭނާގެ ވަގުތު އައިސް ޖެހުމުން އޭނާ އަށް ކުޅުމުގެ ފުރުސަތު މިހާރަށްވުރެ ގިނައިން ލިބޭނެ. އެއްވެސް ކުޅުންތެރިއަކު ބޭނުންވާހާ ގިނަ ވަގުތެއް ފަހަރުގައި ނުލިބިދާނެ. އެކަމަކު މައިނޫ އަކީ މި ޓީމުގައި ކުރިމަގު އޮތް ކުޅުންތެރިއެއް. އެކަން މިހާރު އޭނާ އަށް ވެސް ސާފުވާނެ،" ކޯޗު ބުންޏެވެ.
އޭނާ ބުނީ އެފްރިކާ ކަޕް ފުޓްބޯޅަ މުބާރާތް ކުޅެން މުހިންމު ތިން ކުޅުންތެރިއަކު ވަގުތީ ގޮތުން ޓީމާ ވަކިވުމުން މިވަގުތު ޔުނައިޓެޑް ވޭތު ކުރަމުންދަނީ ދަތި ދުވަސްތަކެއް ކަމަށެވެ.
ޔުނައިޓެޑްގެ ތަޖުރިބާކާރު ދެ ކުޅުންތެރިއެއްގެ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. އެއީ ޑިފެންޑަރު ހެރީ މެގުއާ އާއި ބްރެޒިލްގެ މިޑްފީލްޑަރު ކަސެމީރޯ އެވެ.
"އަހަރެންނަށް ބުނާކަށް ނޭނގެ އެ ދެ ކުޅުންތެރިންނަށް ވާނެ ގޮތެއް. މިވަގުތު އެއްވެސް ކަމެއް ނުނިމޭ. އެ މީހުން ކުލަބުގައި ތިބޭނެކަން ނުވަތަ ނޫންކަން ބުނަން އެނގޭނީ އަހަރެންނަށް ހީވާ ގޮތުން ސީޒަން ނިމުމުން. އަހަރެން ވަރަށް ހިތްހަމަ ޖެހޭ އެ ދެ ކުޅުންތެރިންނާ މެދު. އެކަމަކު އެއީ އަހަރެންގެ އަތްމަތީގައި އޮތް ކަމެއް ނޫން. އެއީ ކުލަބާއި ކުޅުންތެރިން ވާހަކަ ދައްކައިގެން ނިންމަން ޖެހޭ ކަމެއް،" އަމޮރިމް ބުންޏެވެ.
އޭނާ ބުނީ ޔުނައިޓެޑްގައި ރަނގަޅަށް ކުޅެމުން އަންނަ އެއްވެސް ކުޅުންތެރިއަކު ޓީމު ދޫކޮށް ދިއުމަކީ އޭނާ އެދޭ ކަމެއް ނޫން ކަމަށެވެ. ނަމަވެސް އެއީ އޭނާގެ އަތުގައި އޮތް ބާރެއް ވެސް ނޫން ކަމަށެވެ.