ސިލޯނާއެކު ދިވެހީން ޓެލެތޯން: 3 މިލިޔަނެއްހާ ރުފިޔާ މިހާތަނަށް ލިބިއްޖެ
-
މިރޭ 7:30އާ ހަމައަށް 2.3 މިލިޔަނަށްވުރެ ގިނަ ރުފިޔާ
-
38 ހާހަށްވުރެ ގިނަ ޑޮލަރުވެސް ލިބިފައިވޭ
ސްރީލަންކާއަށް ދިމާވެފައިވާ ކާރިސީ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށް، ދިވެހި މީޑިއާތަކުން ފެށި ޚާއްސަ ޓެލެތޯނަށް މިހާތަނަށް 3 މިލިޔަން ރުފިޔާއާ ގާތްކުރާ އަދަދަކަށް އެހީ ލިބިއްޖެއެވެ.
މިއަދު ހެނދުނު 9:00 ޖެހިއިރު ފެށި މި ޓެލެތޯން މިރޭ މެންދަމު 1:00 އާ ހަމައަށް ކުރިއަށްދާނެއެވެ.
ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް މިއަދު މިރޭ 7:30އާ ހަމައަށް 2.3 މިލިޔަނަށްވުރެ ގިނަ ރުފިޔާ ވަނީ ލިބިފައެވެ. އަދި ޑޮލަރު އެކައުންޓަށް ވަނީ 38 ހާހަށްވުރެ ގިނަ ޑޮލަރު ލިބިފައެވެ.
މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް އަދި ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތުވަނީ ހުޅުވާލާފައެވެ.
މިމަހުގެ 26 ވަނަ ދުވަހު ސްރީލަންކާއަށް ކުރިމަތިވި ތޫފާން ދީތުވާއާއި ގުޅިގެން އެޤައުމުވަނީ ކާރިސީ ޙާލަތުގައެވެ.